Hechos 2

1Tejtzun tjapun tk'ijlalil nink'ij Pentecostés, junx cybuyin cyib cycyakil ex junx cyximbetz. 2Ex minabencu tzaj jun tk'ajk'ajel tuj cya'j, ic tza'n jun cyk'ik' in xumin wen, ex nimxix tk'ajk'ajel ul tuja jatum k'ukl ke'tok. 3Ex o cyil jun señ ic que'yin ic tza'n k'ak' in julin, cub ten tibaj cywi' cycyakil. 4Ex cycyakil baj noj tuj cyanmi tu'n Xewbaj Xjan, ex e oc ten yolil tuj cyyol junxitl xjal, ic tza'nx in tk'o'n Xewbaj Xjan tu'n cyyolin ti'j. 5Ex cyuj ke k'ij lu ate'tok xjal judiy tuj Jerusalén, nimal Dios ke, otok che tzaj tuj tcyakil tnam twitz tx'otx'. 6Tejtzun cybinte aju tk'ajk'ajel tzaj tuj cya'j, baj cychmon cyib ke xjal; ex bi'x jaw naj cynabl porque teyle junjun xjal in tbi'ntok tex tyol, aju in che yolintok apostl ti'j. 7Ex bi'x jaw naj cynabl ex e labin ti'j, cyma cyxolx: —¿Ti cyten jlu? ¿Myapetzun aj Galiley cycyakil keju in che yolin? 8¿Tza'ntzun tten in kbi'n in che yolin ti'j kyol teyle junjun ke jatum xko itz'j? 9At junjun aj Partia, aj Media, aj Elam, ex at junjun ke najl tuj Mesopotamia, tuj Judey, tuj Capadocia, tuj Ponto, tuj Asia, 10tuj Frigia, tuj Panfilia, tuj Ejipt, ex tuj junjun tnej tx'otx' te Africa ti'jxi Cirene. Ex at junjun ke aj Rom ax najl tzalu ex at junjun ke ax toc judiy xjal, ex at junjun ke ma tz'oc te judiy xjal nok tu'nju ma tocsla cyley judiy. 11Ex at junjun ke aj Cret, ex junjun aj Arabia, pero in che'x kbi'n in che yolin ti'j tyol junjun ke, in che yolin ti'j tbinchben Dios nim tipumal. 12Ex bi'x jaw naj cynabl cycyakil in che labin ti'j, in cyma'n cyxolx: —¿Ti t-xilen tcyakil jlu? 13Pero at txkantl in che xmayin cyi'j: —C'al k'e'n ke jlu, che chi. 14Jawtzun we' Pedro cyuc'ix ke junlajtl apostl, jaw tk'ajk'ajel twi' cyuw, xi tma'n cye xjal: —Akeye xjal judiy ex cycyakile akeye najl tuj Jerusalén, lu jun tkanil cxel nma'ne cyeye, cybintze. 15Ke xinak lu mya c'al k'e'n ke, ic tza'n cyeye in cyma'ne, porque ma las nueve te prim. 16Atzun jlu aju o k'manjtz tu'n Joel aju t-sanjel Dios: 17Chi Dios: Tuj mancbil k'ij ctzajel nk'o'ne Nxewe tuj cyanmi cycyakil xjal; ke cycy'ajale ex ke cyme'jele che oquel te nsanjele tu'n t-xi cypacba'n nyole cye xjal, ex ke cu'xun ate' cyxole at ctzajel yec'un cye mer ic tza'n tuj witzic', ex ke tij xjal cyxole c'elel cynic' ti'j tuj witzic' aju wajbile cye. 18Ax icx ctzajel nk'o'ne Nxewe tuj cyanmi ke nmajene xinak ex ke nmajene xu'j tuj tk'ijlalil tzul, ex che oquel te nsanjele tu'n t-xi cypacba'n nyole. 19Ctzajel nyec'une ke nbinchbene ma' cyxilen twitz cya'j, ex che tzajel nk'o'ne ke señ twitz tx'otx': Chic', tuc'ix k'ak', tuc'ix sib in bukin. 20Cmeltz'ajel ju k'ij tu'n toc te klolj, ex aju xjaw c'oquel que'yin ic tza'n chic' na'nxtok tul tk'ijlalil tu'n tul Kman, jun k'ij nim toclen ex ckoptz'ajelxix. 21Ex cycyakil keju in che cubsan twitz Kman che cletel, chi tuj Tu'jil. 22Cybintze nyole akeye xinak aj Israel: Ate Jesús aj Nazaret, tej tten cyxole ba'n e'la tuj twitz Dios, ex o cyile ke tbinchben nim cyipumal ex ke señ e bant tu'n, ax Dios o k'onte tipumal, ex ba'n tcyakil jlu cyu'ne. 23Ate jlu xi tk'o'n Dios tuj cyk'abe, porque ximamajtl tu'n Dios ex ojtzki'majtl tu'n, tzaj cytzyu'ne ex xi cyk'o'ne tuj cyk'ab aj il tu'n tjaw cyk'o'n twitz crus ex tu'n tcub cybyo'n. 24Pero jatz ank'in tu'n Dios ex etz tco'pin tjak' tipumal camic, porque minti' xcye' camic ti'j tu'n tcub ttzyu'n. 25Porque o yolin rey David ti'j Jesús, chi cyja': Cucx toc nque'yine Kman tcub nwitze; mlay chin yucche, porque at ntxlaje tuj nbank'abe. 26Cyja'tzun in tzalaj wanmiye, ex in chin yoline tu'nju in chin tzalaje. Ex k'ukl nc'u'je ti'j, icx nximlale cjawil ank'in; 27porque mlay cyaj tk'o'na wanmiye tuj cynajbil cyimni, ex mlay chin cyaj tk'o'na tu'n ttzuwix nximlale, akine tmajena nimal teya. 28Ma tzaj tyec'una weye ke be te chwinklal, ex ctzajel tk'o'na tzalajbil nim weye oc ntene tuc'ila, chi David tuj Tu'jil. 29Akeye erman, axix toc cxel nma'ne cyeye ti'j kxe'chel David o cyim ex o cu'x maku'n, ex aju tpantyón atx kxol ja'lo. 30Pero tu'nju t-sanjel Dios te David, ex ba'n tu'n otok tzaj ttziyan Dios jun yol axix toc te, ka ti'j tiyjil tu'n titz'j ju Crist aju at toclen tu'n Dios, ex tu'n tcub ke' Crist tuj tk'ukbil David tu'n tcawin. 31Bi'majtl jlu tu'n David, cyja'tzun o yolin ti'j tu'n tjatz ank'in Crist aju at toclen tu'n Dios, ex o yolin ti'j tu'n mi'n tcyaj ten tanmi tuj cynajbil cyimni, ex tu'n mi'n ttzuwix tchibjal. 32Ate Jesús jatz ank'in tu'n Dios, ex kcyakile ma ko oque testiw ti'j. 33Ma jaw nimsa'n Jesús ex ma pon ttxlaj Dios tuj bank'abaj, ex ma tc'am Jesús Xewbaj Xjan, aju tziyimaj te tu'n Dios Mambaj, cyja'tzun ma cu'tz tchitun jlu aju ma cyile ex ma cybiye. 34Porque mya ate David jax tuj cya'j; pero ax o k'mante ju yol lu: Tma Kman te Wajawe: Ke'cuya tuj nbank'abe, 35acutzun in cub cyi'j ke aj k'oj ti'ja wu'ne, chi David tuj Tu'jil. 36Cybintze cycyakile jun yol axix toc, akeye aj Israel: Ate Jesús aju jaw cyk'o'ne twitz crus, ma tz'oc tk'o'n Dios te Kajaw ex ma tzaj tk'o'n toclen tu'n toc te Crist, chi Pedro cye. 37Tejtzun cybinte xjal jlu, bi'x oc ta'w yol ti'j cyanmi, ex xi cyma'n te Pedro ex cye txkantl apostl: —Akeye erman, ¿alcye oc kbincha'ye? 38Atzunte Pedro xi tma'n cye: —Tajtz ti'j cyanmiye ex tu'n tbyan teyle junjun cyeye tuj tbi Jesucrist tu'ntzun tnajset cyile; ex ctzajeltzun tk'o'n Dios Xewbaj Xjan te jun oyaj cyeye. 39Porque te cyeye tzaj ttziyan Dios jlu, icx cye cyc'wa'le, ex cye cycyakil keju ate' najchak; aju yol lu cye cycyakil keju che txconjtzel tu'n Kman aju Kdios, chi Pedro. 40Xi tchic'ba'n Pedro aju yol axix toc, xi tk'o'n cynabl, ex xi tma'n nimcu yol cye: —Cyclom cyibe cyxol ke xjal ate' ja'lo jumajx mya ba'n ke, chi Pedro. 41Cyja'tzun e byan ke xjal akeju xi cyocsla'n aju yol tma Pedro; ax k'ij e ocslan balo ox mil xjal. 42Ex ax e cyaj ten cycyakil tuj xnak'tzbil cyu'n apostl, ex at cymojbabl cyib, ex cucx nno'c cychmon cyib tu'n tcub cysipan wabj cyxol, ex cucx in che na'n Dios. 43Ex tzaj nim t-xobil cyi'j cycyakil xjal; ex o cybincha apostl nimcu binchben ma'xix cyxilen tu'n tipumal Dios. 44Cycyakil keju otok che ocslan ate' junx, ex tcyakilju at cye in baj cysipan cyxolx. 45In xi cyc'ayin cytx'otx' ex ju at cye, ex in xi cysipan pwak cye cycyakil, nok alcye at tajbenxix te junjun. 46Tcyakil k'ij in che pon tuj tja Dios, in cub cysipan wabj tuj cyja ex in che wa'n junx tuc'il tzalajbil ex mans cyanmi. 47In cyk'o'n chjonte te Dios, ex ba'n e je'l tuj cywitz cycyakil xjal. Ex tcyakil k'ij in che chmet-xi ocslal tu'n Kajaw, akeju in che clet-xi junjun k'ij.

will be added

X\