Hechos 19

1Atxtok Apolos tuj tnam Corint, xi'tzun Pablo betel tuj tcyakil lugar tuj tiwitz tx'otx'; pontzun tuj tnam Efeso, ex atzun e cnet junjun ocslal tu'n. 2Xitzun tma'n cye: —¿Ope cyc'ame Xewbaj Xjan tej cyocslane? Atzun cye tzaj cytzak'we'n: —Bajx kbiye ka at Xewbaj Xjan. 3Xitzun tma'n Pablo: —¿Alcyetzun byabl ma cyc'ame? Tzajtzun cytzak'we'n: —Aju byabl tu'n Juan, atzunju ma kc'ame, che chi. 4Xitzun tma'n Pablo cye: —Ate Juan e byan xjal tu'n tuj a', ex tma tu'n tajtz ti'j cyanmi, ex xi tma'n cye tu'n cyocslan ti'j ju lepchix ttzaj ti'j, atzun Jesúsju, aju Crist aju at toclen tu'n Dios, chi Pablo. 5Tejtzun cybinte jlu, e byantzun tuj a' tuj tbi Kajaw Jesús. 6Ex cub tk'o'n Pablo tk'ab tibaj cywi', cubiltzun Xewbaj Xjan cyuc'il; ex e yolin tuj junxitl yol, ex e oc ten chic'balte aju in tzaj tma'n Dios cye. 7Tu'n tcyakil balo cablaj cybet xinak. 8Ex tuj ox xjaw coc'x xi aj Pablo tuj ja te c'ulbil cye xjal judiy, in yolintok ti'j tcawbil Dios, minti' t-xobil ex in cub ti'j cynabl tu'n. 9Pero at junjun minti' ocx tuj cywi', ex cyc'i' txi cyocsla'n, e yolin mya ba'n ti'j ju Ocslabl lu cywitz xjal. Cyja'tzun el tpa'n tib Pablo cyi'j, ax icx ke ocslal e je'tz ti'n, ex tcyakil k'ij xi' pacbal tuj t-scwel jun xjal Tirano tbi. 10Axtzun pacban tuj cab abk'i; cyja'tzun cycyakil keju najl ke tuj tx'otx' Asia o cybi tyol Kajaw Jesús, tza'nx ke xjal judiy ax icx ke xjal mya judiy. 11Ex o tbincha Dios tbinchben nim cyipumal nok tu'n Pablo; na'nxtok tbinchanjtz jun maj icju, 12porque oc cyk'o'n xjal ke tal c'albil ex gavach ti'j t-ximlal Pablo, ex xi cyi'n tu'n tcub cyk'o'n cyibaj ke yab ex bi'x in che banixtok, ex ke ju'ẍ in che etztok tuj cyanmi xjal. 13Pero at junjun xjal judiy nok jachak in che bet, oc tilil cyu'n tu'n tajben tbi Kajaw Jesús cyu'n tu'n cyetz ke ju'ẍ tuj cyanmi xjal, ex in cyma'n cyja': —Akeye ju'ẍ, cyetze tu'n tipumal tbi Jesús aju in pacbanjtz tu'n Pablo. 14Entons at jun xjal judiy Eseva tbi, nejenel cye pal, at wuk tcy'ajal in cybincha'n jlu. 15Pero tej t-xi cyma'n te ju'ẍ tu'n tetz tuj tanmi xjal, tzaj ttzak'we'n ju'ẍ cyja': —Ojtzki'n Jesús wu'ne; ex ba'n wu'ne alcye Pablo; yajtzun cyeye, ¿alcyetzun keye? Chi ju'ẍ. 16Atzunte xinak aju attok ju'ẍ tuj tanmi, xi tzokpaj cyi'j, ex cub cyi'j tu'n tu'nju at-xix tipun cywitz; cyja'tzun e je'tz ok tuja, minti' cyxbalun ex otok che c'ixbi. 17Cycyakiltzun keju najl tuj Efeso, o cybi jlu, tza'nx ke xjal judiy ax icx ke xjal mya judiy; cyja'tzun tzaj nimxix cyxobil cycyakil ex in jaw cynimsa'ntok tbi Kajaw Jesús. 18Ex nimcu xjal otok che ocslan in che ul, in jatz cypa'n cyil ex in cyma'n aju cybinchben mya ba'n. 19Ex nimcu xjal ba'n mañ cyu'n nej, tzaj cyi'n cylibro, cub cypatun cywitz cycyakil xjal; ex jaw cyi'n tajlal twi', japuntzun tajlal twi' 50 mil sak pwak. 20Ex cyja'tzun tten o ch'iy tyol Kajaw ex ocxix tipumal. 21Tbajlenxitzun jlu, cub t-ximan Pablo tu'n t-xi' tuj Jerusalén tic'lenxi aj tuj tx'otx' Macedonia ex tuj tx'otx' Acaya, ex tma: —Nponlenxitzune tuj Jerusalén, ax icx ilxix ti'j tu'n nxi'ye tuj tnam Rom. 22E je'xtzun t-sama'n Pablo cab erman tuj Macedonia, akeju in che onin tuc'il, atok Timotey tuc'ix Erasto; atzun te cyaj ten cabe k'ijtl tuj tx'otx' Asia. 23Atxtok Pablo tuj tnam Efeso, e jaw tilj nimcu xjal tu'n tlaj in che ocslan xjal ti'j tyol Dios. 24Porque at jun xjal tx'inol sak pwak Demetrio tbi in binchantok cyi'j ke tal ja sak pwak cytx'otx'il, tal ch'in ke, ic che que'yin ic tza'n tja ju dios Diana tbi, ex tu'nju negosyo lu nim pwak in cycamba'n keju in che onin tuc'il. 25E baj tchmo'n Demetrio ke tuc'il cyuc'ix mastl ax cyak'un lu, ex xi tma'n cye: —Akeye tat, ba'n cyu'ne, ti'j ju ak'untl lu in cnet kk'inumabl; 26pero in cyque'yine ex in cybi'ne aju in tbincha'n Pablo, in tma'n, mya dios keju in che binchanjtz tu'n cyk'ab xjal. Cyja'tzun, nimcu xjal ma cub ti'j cynabl tu'n ex ma che el txalpuj tu'n, mya nok o'cx tuj Efeso, icx tuj tcyakil tx'otx' Asia. 27Cyja'tzun mya yajcu mi'n tz'ajbentl kak'unben, ax icx c'elel ic'un tja ktxu Diana, aju nintz dios, ex cnajel tajwalil Diana, aju in c'ulunjtz cyu'n cycyakil xjal tuj Asia ex cyu'n cycyakil xjal twitz tx'otx'. 28Tejtzun cybinte xjal ju yol lu, tzaj nimxix cyk'oj ex e jaw sch'in in cyma'n: —Ma'xix toclen Diana aju cydios aj Efeso. 29Cycyakiltzun xjal te tnam el tzpet cynabl, ex e ocx kelan tuj lugar jatum nno'c cychmon cyib tnam xjal, tzyu'n Gayo cyu'n tuc'ix Aristarco, aj Macedonia ke, ex tuc'il Pablo ke. 30O tajbe Pablo tu'n tocx yolil cyxol xjal, pero minti' xi tzokpi'n cyu'n ocslal. 31Ax icx at junjun aj sanjelal te Asia tamiw Pablo ke, xi cysama'n jun xjal k'malte te Pablo tu'n mi'n tocx cyxol xjal. 32Atzun cye xjal otok tz'oc cychmon cyib in che sch'in, junxitl in cyma'n junjun, ax icx txkantl; porque tzpetnitok ta' cynabl, atzun tnimal xjal minti' el cynic' ti'j tiku'n otok tz'oc cychmon cyib. 33Pero at junjun cyxol xjal xi cyma'n te Alejandro tu'n tcub we' yolil, porque otok txi lamo'n cyu'n xjal judiy tu'n tcub ten cywitz xjal. Xitzun tyec'un tk'ab Alejandro tu'n cyk'ajen xjal, o tajbe tu'n tyolin te tcolbil tib cywitz xjal cyuc'ix ke tuc'il. 34Pero tej tel cynic' xjal ti'j ka judiy xjal, cycyakil e jaw sch'in junx, balo tuj cabe or in cyma'n: —Ma'xix toclen Diana aju cydios aj Efeso. 35Atzunte secretario te tnam, tej cyk'ajen xjal tu'n, tma: —Akeye xinak aj Efeso, cycyakil xjal ba'n cyu'n ka ake aj Efeso cwentil tja ktxu Diana, aju nintz dios, ex cwentil ju tilbilal aju tzaj tz'ak tuj cya'j. 36Ate jlu mi a'l jun ba'n tmante ka mya ax toc, cyja'tzun mas ba'n tu'n mi'n cyk'ajte ex minti' tu'n cybinchanteye jun ti'xti te jurat naj. 37Porque ma che ul cyi'ne ke xjal lu, minti' in che elk'an tuj tja kdios ex minti' in che yolin mya ba'n ti'j. 38Katzun at tk'oj Demetrio ti'j jun xjal, cyuc'ix keju in che ak'nan tuc'il, atzun til jusgad at, ex ate' ke jwes; ba'n tu'n ttzaj cyma'n alcye cyk'oj at ti'j juntl. 39Ex ka at juntl cyajbile, jacu bant ti'j cywitz ke nac'ul ti'j ley oc toc sesyon cyu'n. 40Mya yajcu ko cub tz'ak tuj kil oc tpon tkanil tuc'il jwes ti'j ju ma che jaw tilje ti'j ja'lo, porque minti' jun yol ba'n tu'n t-xi kma'n tiku'n ma tz'oc cychmon cyibe ex ma che jaw tilje, chi secretario. 41Tejtzun tbaj tma'n secretario jlu, xitzun tma'n tu'n cyetz cycyakil keju otok tz'oc cychmon cyib.

will be added

X\