Hechos 18

1Tbajlenxitzun jlu etztzun Pablo tuj tnam Atenas ex xi' tuj tnam Corint. 2Ex cnet jun xjal judiy tu'n Pablo, Aquila tbi, tzajni tuj tx'otx' Ponto. C'itzketok tetzlen Aquila tuj Italia tuc'ix Priscila aju t-xu'jil, porque otok tz'etz jun orden tu'n president Claudio tu'n cyetz baj cycyakil xjal judiy tuj tnam Rom. Pontzun Pablo tja Aquila, 3ex ax cyaj ten cyuc'il, porque ax tak'un Pablo ic tza'n cyak'un Aquila; e ak'nantzun junx, ex aju cyak'un binchal ja lona. 4Ex tcyakil k'ij te ojlabl ocx Pablo tuj ja te c'ulbil yolil cyuc'il xjal, ex oc tilil tu'n tu'n tcub ti'j cynabl xjal judiy, ax icx ke xjal mya judiy. 5Tejtzun tul Silas tuc'ix Timotey, tzajni ke tuj Macedonia, bi'x xi tk'on tib Pablo tu'n tpacban ti'j tyol Dios ex in tma'n cye xjal judiy ka ax toc ate Jesús ju Crist aju at toclen tu'n Dios. 6Atzun cye xjal judiy e oc ten makolte ex e oc ten yasul ti'j, eltzun tchto'n Pablo ti'j t-xbalun te jun yec'bil cyi'j ka mya ba'n ke, ex tma cye: —Tuj cyilxe ka ma che cyime, minti' woclene ti'j. Texju ja'lo ma chinxe cyxol txkantl xjal mya judiy ke, chi Pablo cye. 7Etztzun Pablo cyxol, ex xi' tja jun xjal Ticio Justo tbi; ate xjal lu in c'ulun te Dios, ex ax tcub tja ttxlaj ja te c'ulbil cye xjal judiy. 8Ex ocslan Crispo ti'j Kajaw cyuc'ix cycyakil keju ate' tuj tja, nejeneltok Crispo tuj ja te c'ulbil. Ex nimcu xjal aj Corint, tej cybinte tyol Pablo, xi cyocsla'n ex e byan. 9Atzunte Kajaw tzaj tma'n te Pablo te konic'an ic tza'n tuj witzic': —Mi'n xoba, cucx yolina ex mi'n k'ajena. 10Porque atine tuc'ila, ex mi a'l jun ctzajel tzyunte teya tu'n tc'ixbisanjtza, porque nimcu xjal etzan wu'ne at tuj tnam lu, chi Kajaw. 11Ex axtzun cyaj ten Pablo jun abk'i tuc'il kak xjaw tuj tnam Corint, in tk'o'n xnak'tzbil cye xjal ti'j tyol Dios. 12Pero tej toctok Galión te gobernador tuj tx'otx' Acaya, e oc tzokpaj ke xjal judiy ti'j Pablo, mojl cyyol ti'j. Xi cyi'n tuj jusgad, 13ex xi cyma'n te gobernador: —Ate xjal lu in cub ti'j cynabl xjal tu'n tu'n cyc'ulun twitz Dios tuj junxitl tumel, mya ic tza'n in tma'n ley, che chi. 14O tajbe Pablo tu'n tyolin, pero xi tma'n naj Galión cye xjal judiy: —Akeye xjal judiy, nokwit jun mya ba'n ma tbincha jlu ex nokwit ma'xix til, atwitlo tumel ex jacwitlo txi nbi'ne cyyole. 15Pero ka tu'n tlaj yol ma che ule tzalu, ex ka tu'n tlaj cybi xjal, ex ka ti'j cyleye, cyque'yinxe ti c'oquel ti'j cyu'ne; porque mi'n wajbile tu'n woque te jwes ti'j jlu, chi Galión. 16E je'tztzun tlajo'n tuj jusgad. 17Atzun cye cycyakil xjal [grieg] tzaj tzyu'n Sóstenes cyu'n, aju nejenel tuj ja te c'ulbil, ex baj cybju'n twitz jusgad. Atzunte Galión minti' taj ti'j jlu. 18Atzunte Pablo nim k'ij o tentl tuj Corint, e cyajtzun tk'olbe'n ke erman ex xi' tuj barc tu'n tpon tuj tx'otx' Siria; ex tuc'ix Priscila ex Aquila xi' tuc'il. Na'nxtok t-xi' Pablo tuj barc otok tz'el tmatzo'n ttzmal twi' tuj tnam Sencrey, porque otok txi ttziyan jun yol te Dios. 19E pontzun tuj tnam Efeso, ex axtzun e cyaj k'o'n Aquila tuc'ix Priscila tu'n Pablo; ocxtzun Pablo tuj ja te c'ulbil cye xjal judiy, ex o yolin cyuc'il. 20Atzun cye xjal judiy e cubsan twitz Pablo tu'n tcyaj ten nim k'ij cyuc'il; atzunte Pablo minti' cub tuj twitz, 21nok o'cx e cyaj tk'olbe'n, chi cyja': —[Ilxix ti'j tu'n nxi'ye tuj Jerusalén tu'n tcub wic'sa'ne aju nink'ij tzul; pero] ka ic tajbil Dios, chin ultle juntl maj cyuc'ile, chi Pablo. Etztzun tuj Efeso, ex xi' tuj barc. 22Tejtzun tpon Pablo tuj tnam Cesarey, jaxtzun k'olbel cye ocslal tuj Jerusalén, ic'tzun ex cu'pun tuj tnam Antioquiy. 23Ex axtzun cyaj ten ela' k'ij; etztzun, ex xi betel tuj tcyakil tx'otx' Galacia ex tuj Frigia, txolsa'n ti'j tu'n, in che tcyuwsa'n cycyakil ocslal. 24Entons at jun xjal judiy aj Alejandriy, Apolos tbi. Pontzun Apolos tuj tnam Efeso, ex mejorxix yolin, ex at-xix tnabl ti'j ju in tma'n tuj Tu'jil. 25Xnak'tzamni te xjal lu ti'j ju xnak'tzbil te Kajaw; at t-sec'al tu'n tyolin ex in tk'o'n xnak'tzbil tuj tumelxix ti'j Jesús, pero o'cxtok ojtzki'n tu'n aju byabl tu'n Juan. 26Entons oc ten Apolos yolil tuj ja te c'ulbil minti' t-xobil; tejtzun cybinte Priscila tuc'ix Aquila, xi cyi'n cyuc'il, ex xi cychic'ba'n te mas tuj tumelxix aju xnak'tzbil tu'n Dios. 27Entons cub t-ximan Apolos tu'n t-xi' tuj tx'otx' Acaya, xitzun cyk'ukba'n erman tc'u'j, ex xi cytz'iban jun u'j cye ocslal tu'n tc'monjtz Apolos cyu'n. Tejtzun tpon Apolos tuj Acaya, nimxix o tz'ajben cyxol keju otok che ocslan tu'n t-xtalbil Dios, 28porque xi tchic'ba'nxix cywitz xjal aju in tma'n tuj Tu'jil, ka ate Jesús ju Crist aju at toclen tu'n Dios, cyja'tzun minti' tumel tu'n tcub cyewan xjal judiy ka mya ax toc jlu.

will be added

X\