Hechos 16

1Ax icx o pon Pablo tuc'ix Silas tuj tnam Derbe ex tuj tnam Listra; atzun ta' jun ocslal Timotey tbi, tal jun xu'j judiy ex ocslal, atzun tman Timotey grieg xjal. 2Atzun cye erman tuj tnam Listra ex tuj tnam Iconio in che yolin ba'n ti'j Timotey. 3O tajbe Pablo tu'n t-xi' Timotey tuc'il; xitzun ti'n tu'n t-sircunsidarinjtz tu'n cylaj ke xjal judiy axtok ate'; porque ba'ntok cyu'n cycyakil ka grieg xjal tman. 4Ex tej cyic' tuj junjun tnam, xi cyma'n cye erman tu'n tjapun cyu'n aju cyajni bant ti'j cyu'n apostl ex cyu'n ansyan ate'tok tuj Jerusalén. 5Cyja'tzun e cyuwsanjtz ke ocslal tuj cyocslabl tuj junjun tnam, ex in chmet-xi cybet junjun k'ij. 6Entons e mayonjtz Pablo tu'n Xewbaj Xjan tu'n mi'n t-xi cyma'n tyol Dios tuj tx'otx' Asia. Cyja'tzun e ic'x tuj tx'otx' Frigia ex tuj tx'otx' Galacia. 7Tejtzun cypon ttxlaj tx'otx' Misia, o cyajbe tu'n cyxi' tuj tx'otx' Bitinia, pero minti' tcuyi Xewbaj Xjan tu'n cyxi'. 8E ic'xtzun ttxlaj Misia, e cu'pun tuj tnam Troas. 9Ex at jun o til Pablo ic tza'n tuj witzic' te konic'an: Lu jun xinak aj Macedonia wa'ltok in cubsan twitz ex in tma'n: Tic'tza tuj Macedonia ex ko tonintza, chi xjal. 10Tej tlonte Pablo jlu ic tza'n tuj witzic', oc tilil ku'ne tu'n kxi' naje tuj tx'otx' Macedonia, cub kximane ka ax toc ate Dios in txocon keye tu'n t-xi kpacba'ne tkanil colbil cye. 11O extzune tuj tnam Troas, o'xtzune tuj barc, acu o canune tuj jun tal tx'otx' tmijil mar Samotracia tbi, ex te juntl k'ij o pone tuj tnam Neápolis. 12O extzune tuj tnam Neápolis, o pone tuj tnam Filipos, aju tnam lu mas ma' toclen cywitz mastl tnam tuj tx'otx' Macedonia, ex aj Rom ke xjal lu; ex axtzun o cyaj tene cab k'ij. 13Ex tuj jun k'ij te ojlabl o exe ti'jxi tnam, o pone ttzi jun nima jatum in che pon xjal na'l Dios. O cubtzun ke'ye, ex o yoline cyuc'il xu'j akeju otok pon cychmon cyib. 14At jun xu'j in bin, Lidia tbi, c'ayil xbalun puro tbanil ex wi'yilxix, aj Tiatira te xu'j lu, ex c'ulul te Dios; ex o tk'ajtza Kajaw tuj tanmi xu'j tu'n toc tk'o'n tcwent ti'j ju in tma'n Pablo. 15Tejtzun tbyan Lidia cyuc'ix keju ate' tuj tja, o cubsan kwitze chi cyja': —Ka ocslalxix kine ti'j Kajaw tuj cywitze, cyocxe tuj njaye, ex ax che posadiyine, chi Lidia. Ex o cubsanxix kwitze tu'n kcyaj tene tuc'il. 16Entons at jun k'ij cyja' kxi'ye na'l Dios, oc noj kwitze jun txin majen, at ju'ẍ tuj tanmi ba'n k'ijin; ex nim pwak in cycamba'n ke tpatrón txin tu'nju tk'ijbil. 17Ate txin lu oc lpe' ti'j Pablo ex ki'je, in jaw tk'ajk'ajel twi', in tma'n cye xjal cyja': —Akeju xjal lu tmajen Dios ke, aju Dios Ma'xix Toclen, in xi cypacba'n cyeye aju be te colbil. 18Ex nim k'ij tma txin icju, pero mya ba'n e'la tuj twitz Pablo; cyja'tzun ajtz tque'yin Pablo, ex xi tma'n te ju'ẍ: —Cxel nma'ne teya tu'n tipumal Jesucrist tu'n tetza tuj tanmi txin. Ex jurattzun etz naj ju'ẍ. 19Pero tej cyque'yinte ke tpatrón txin otok tz'etz ju'ẍ tuj tanmi txin ex atzun k'ukltok cyc'u'j ti'j tu'n tul cypwak, tzyettzun Pablo cyu'n tuc'ix Silas, e je'x cyi'n tuj plas cywitz aj sanjelal; 20xitzun cyi'n cywitz ke jwes ex cyma: —Akeju xinak lu judiy xjal ke, ma che jaw tilj xjal cyu'n tuj ktanmi, 21in cyma'n tu'n kbinchante aju mya k'o'n ke tu'n kc'monte ex tu'n kbinchante, porque aj Rom ko', che chi. 22E pontzun tilj xjal cyi'j Pablo; atzun cye jwes xi cyma'n tu'n tel sbit'un cyxbalun ex tu'n cybaj asyalin tu'n tk'ab tze'. 23Ex cybajlenxi asyalin nim, e ocx cyk'o'n tuj pres, ex xi cyma'n te xk'ukil pres tu'n cyoc cwentinxix. 24Tejtzun tc'monte xk'ukil pres aju orden lu, e ocx tk'o'n tuj calabós max tujxi, ex ocx tk'o'n cykan tuj sep. 25Pero te tmij ak'bil in na'n Pablo Dios tuc'ix Silas, ex in che bitzan te Dios; ex ke mastl pres in che bintok cyi'j. 26Entons minaben tzaj jun cyaknajnab nimxix, bi'x e baj yucch ke t-simyentil cyja pres; ex jurat naj jaket tcyakil pwert, ex e je'l pujl caden cyi'j cycyakil pres. 27Ultzun tnabl ju xk'ukil pres ex tej tque'yinte otok che jaket tpwertil ja jatum ate' ke pres, jatz ti'n t-spad, o tajbe tu'n tcub tbyon tib, tuj tnabl ka otok che etz ok ke pres. 28Atzunte Pablo jaw tk'ajk'ajel twi' cyuw ex tma: —Mi'n tc'ixbisa tiba, lu ko'ye ato'ye kcyakile. 29Xitzun tkanin xk'ukil pres jun ttxan tzaj, ex ocx kelan max tujxi, ex cub ẍmeje' twitz Pablo ex twitz Silas in lu'lun tu'n tchi. 30E je'tztzun ti'n, ex xi tkanin cye: —Akeye tat, ¿ti oc nbincha'ye tu'n nclete? 31Xitzun cyma'n Pablo te: —Ocslama Kajaw Jesucrist, ex oc cleteltzuna, aya ex keju ate' tuj tjaya. 32Xitzun cyma'n tyol Kajaw te ex cye cycyakil keju ate' tuj tja. 33Ax or te konic'an baj ttx'jo'n cyc'ixblen; ex jurat o byan cyuc'ix cycyakil keju ate' tuj tja. 34E je'xtzun ti'n tja, xi tk'o'n cywa; ex o tzalajxix cyuc'ix keju ate' tuj tja tu'nju otok che ocslan ti'j Dios. 35Tejtzun kskix, xi cysama'n jwes cabe polisiy k'malte te xk'ukil pres tu'n t-xi tzokpet Pablo tuc'ix Silas. 36Xitzun tma'n xk'ukil pres ju yol lu te Pablo: —Ma tzaj cysama'n jwes cabe xjal k'malte tu'n cyxi tzokpete; cyja'tzun ba'n tu'n cyexe ja'lo, mi'n che bisune, chi xjal. 37Atzunte Pablo xi tma'n cye polisiy: —Ma ko baj asyaline cyu'n cywitz cycyakil xjal ex minti' ksentense tcub, ex ax aj Rom ko'ye ma ko ocx k'o'ne tuj pres, ¿ja'lotzun, maj tuj ewajtzun ko elex lajo'ne cyu'n? Mlay. E cytzaj xjal lu k'il keye tu'n kexe, chi Pablo. 38Atzun cye polisiy xi cyma'n ju yol lu cye jwes; tzajtzun cyxobil jwes tej cybinte ka aj Rom ke. 39E ultzun ke jwes ex e cubsan cywitz Pablo che chi cyja': —Cynajsame, mya ba'n ma kbinchaye cyi'je, che chi. Entons e je'tz cyi'n ex e cubsan cywitz tu'n cyex tuj tnam. 40Cyetzlenxitzun tuj pres, e je'x tuj tja Lidia; ex tej cybaj yolin cyuc'il erman, cyaj cyk'ukba'n Pablo cyc'u'j, ex e je'tztzun.

will be added

X\