Hechos 15

1Entons at junjun xjal e pon tuj Antioquiy, tzajni ke tuj Judey, in cyk'o'n xnak'tzbil cye erman in cyma'n: Ka minti' ma che sircunsidarinjtze ic tza'nx in tma'n tley Moisés, mlay che clete, che chi. 2Atzunte Pablo tuc'ix Bernabé nim e yolin ti'j jlu cyuc'il, ex jaw jun yol cyuw cyxol; banttzun ti'j tu'n t-xi' Pablo tuc'ix Bernabé tuj Jerusalén cyuc'ix junjuntl cyuc'il, tu'n cypon cywitz ke apostl ex cywitz ke ansyan tu'n cyyolin ti'j jlu. 3E je'xtzun sama'n cyu'n ke ocslal tuj tnam Antioquiy, e ic'xtzun tuj tx'otx' Fenicia ex tuj tx'otx' Samaria, xi cytx'olba'n tza'n tten otok che ocslan txkantl xjal mya judiy ke, cyaj cyk'o'n ojtxi cyten e oc lpe' ti'j Dios. Ex nim e tzalaj cycyakil erman tej cybinte jlu. 4Tejtzun tpon Pablo tuc'ix Bernabé tuj Jerusalén, ba'n e c'monjtz cyu'n cycyakil ocslal ex cyu'n apostl ex cyu'n ansyan, ex xi cytx'olba'n tcyakilju otok tbincha Dios tu'n cyak'unben. 5Pero at junjun parisey otok che ocslan, e jaw we' k'malte cyja': —Ilxix ti'j tu'n cysircunsidarinjtz keju ma che ocslan mya judiy ke, ex tu'n t-xi k'met cye tu'n tjapun cyu'n aju ley cyaj tk'o'n Moisés, che chi. 6Octzun cychmon cyib ke apostl cyuc'ix ke ansyan tu'n cyyolin ti'j jlu. 7Ex cybajlenxi yolin nim ti'j, jawtzun we' Pedro ex xi tma'n cye: —Erman, bi'maj cyu'ne, ela'xi k'ij njawlen sc'o'ne tu'n Dios cyxole tu'n t-xi nma'ne tkanil colbil cye txkantl xjal mya judiy ke, ex tu'n cyocslan. 8Ate Dios ojtzki'n tuj cyanmi xjal tu'n, ex tzaj tyec'un ka ba'n tu'n cyclet, porque tzaj tk'o'n Xewbaj Xjan cye, ic tza'n tzaj tk'o'n ke. 9Ex minti' o tma Dios ka junxitl ko' ex ka junxitl ke txkantl xjal, o'cx sakix tuj cyanmi tu'n cyocslabl ic tza'n ke. 10Ja'lotzun, ¿tiku'n cyaje tu'n tmaket t-xtalbil Dios cyu'ne? Porque in cub cyk'o'ne jun iktz cyibaj ke erman lu, aju minti' c'isj cyu'n kxe'chel ojtxi, ax icx ke minti' in c'isj ku'n. 11Mya tuj tumel aju in cyma'ne, porque ic tza'n ke ma ke' kc'u'j ti'j ma ko clet tu'n t-xtalbil Kajaw Jesús, ic tza'nx cye ma che clet, chi Pedro xi tma'n cye. 12Entons cycyakil xjal minti' e k'ajt, xi cybi'n aju tyol Bernabé ex tyol Pablo tzaj cytx'olba'n, tza'n tten tbincha Dios ke señ ex ke tbinchben nim cyipumal cyxol txkantl xjal mya judiy ke, xi tk'o'n Dios cyipumal Pablo tu'n cybant ke señ lu. 13Tejtzun cybaj yolin Pablo, oc ten Jacobo yolil ex tma: —Akeye erman, cybintze nyole: 14Ma tzaj ttx'olba'n Simón tza'n tten cub t-ximan Dios tu'n ttzaj tk'o'n t-xtalbil tnejel maj cye txkantl xjal mya judiy ke ma che jaw t-sc'o'n junjun cyxol tu'n cyoc etzan tu'n. 15Ax yol jlu ic tza'n cyaj cytz'iban ke t-sanjel Dios in tma'n tuj Tu'jil, chi cyja': 16Tbajlenxi jlu chin ultle juntl maj, ex aju tcawbil David aju otok cub xitj cjawil nbincha'ne juntl maj ex cjawil nbincha'ne ju xitben te, ex cjawil nwabane juntl maj, 17tu'ntzun cyjyon mastl xjal ti'j Kman, ax icx cycyakil nasyon mya judiy ke, akeju etzan wu'ne, 18chi Kman, aju tzaj ttx'olba'n tcyakil jlu atxix ojtxi, chi tuj Tu'jil. 19Cyja'tzun ma cub nximane tu'n mi'n klabt cyi'j ke txkantl xjal mya judiy ke, akeju in che ocslan, ma cyaj cyk'o'n ojtxi cyten ex ma che oc lpe' ti'j Dios. 20O'cx tu'n t-xi tz'ibet jun u'j cye tu'n mi'n t-xi cychyo'n cychibjal alumaj in cub k'o'n te chojbil cywitz ke tilbilal, ex tu'n mi'n cybinchante aj pajil, ex tu'n mi'n t-xi cychyo'n tchibjal alumaj aju nno'c jatz'o'n tkul, ex tu'n mi'n t-xi cychyo'n chic'. 21Porque atxix ojtxi in pacbanjtz tley Moisés cyuj cycyakil tnam cyuj ja te c'ulbil, ex atzun in jaw sch'i'n tuj tcyakil k'ij te ojlabl, chi Jacobo. 22Ba'ntzun e'la tuj cywitz apostl cyuc'ix ke ansyan ex cycyakil ocslal tu'n cyjaw sc'et cabe xinak cyxolx ex tu'n t-xi cysama'n tuj tnam Antioquiy junx tuc'il Pablo ex Bernabé; ate Judas jaw sc'o'n, aju Barsabás tcabin tbi, tuc'ix Silas; akeju xinak lu nejenel ke cyxol erman. 23Ex xi cytz'iban jun u'j tu'n t-xi cyi'n Pablo; ex atzun in tma'n tuj u'j cyja': Ako'ye apostl, cyuc'ix ke ansyan ex ke erman, in che'x kk'olbe'ne akeye erman mya judiy keye ate'ye tuj tnam Antioquiy, ex tuj tx'otx' Siria ex tuj tx'otx' Cilicia. 24Ma kbiye at junjun xjal e je'x kxole, ma che labt cyi'je tu'n cyyol, ex ma jolpaje' cyc'u'je cyu'n, [in cyma'n tu'n cysircunsidarinjtze ex tu'n tjapun cyu'ne aju ley cyaj tk'o'n Moisés,] pero minti' xi kk'o'ne orden cye tu'n cymante icju. 25Cyja'tzun bant ti'j ku'ne ex ba'n e'la tuj kwitze tu'n cyjaw sc'et cabe xinak kxole ex tu'n t-xi ksama'ne tu'n cypon cyuc'ile tuc'ix Bernabé ex Pablo, akeju at kc'u'je cyi'j; 26akeju erman lu cyk'on cyib tu'n cycyim nok tu'n tlaj ocslal ke ti'j Kajaw Jesucrist. 27Cyja'tzun ma txi ksama'ne Judas tuc'ix Silas, ax jlu cxel cyma'n cyeye oc cypon cyuc'ile. 28Ba'n ma tz'e'la tuj twitz Xewbaj Xjan ex tuj kwitze tu'n mi'n tcub kk'o'ne jun iktz cyibaje, nok o'cx tu'n cybinchanteye aju ilxix ti'j: 29tu'n mi'n txi cychyo'ne cychibjal alumaj in cub k'o'n te oyaj cywitz ke tilbilal, ex tu'n mi'n t-xi cychyo'ne chic', ex tu'n mi'n t-xi cychyo'ne tchibjal alumaj aju nno'c jatz'o'n tkul, ex tu'n mi'n cybinchanteye aj pajil. Ka ma tz'oc cycwentin cyibe tu'n mi'n cybinchanteye jlu, ba'n oc cybincha'ye. Cylomtzun cyibe, chi tuj u'j. 30Cyja'tzun, akeju e je'x sama'n e pon tuj tnam Antioquiy, e oc cychmo'n ke ocslal, ex xi cyk'o'n ju u'j cye. 31Tejtzun tjaw cysch'i'n erman ju u'j lu, e jaw tzalajxix tu'nju k'ukbabl cyc'u'j. 32Ex ate Judas tuc'ix Silas t-sanjel Dios ke, xi cyk'ukba'n cyc'u'j erman ex nimcu yol xi cyma'n cye tu'n cywe'xix tuj cyocslabl. 33Axtzun e cyaj ten nim k'ij; yajxitzun e ajtz sama'ntl cyu'n erman tuj tzalajbil tu'n cyul juntl maj cyuc'il keju e je'x saman cye. 34[Atzunte Silas ba'n e'la tuj twitz ax tu'n tcyaj ten.] 35Ax icx te Pablo tuc'ix Bernabé ax e cyaj ten tuj tnam Antioquiy, in cyk'o'n xnak'tzbil ti'j tyol Kajaw ex in cypacba'n tkanil ba'n, cyuc'ix nimcutl erman. 36Tel-lenxitzun ch'in k'ij xi tma'n Pablo te Bernabé: —Ko' juntl maj visitaril cye erman cyuj cycyakil tnam jatum o txi kpacba'n tyol Kajaw, tu'ntzun tkil tza'n ate', chi Pablo. 37O tajbe Bernabé tu'n t-xi' Juan cyuc'il, aju Marcos tcabin tbi; 38atzunte Pablo, mya ba'n e'la tuj twitz tu'n t-xi' Juan cyuc'il, porque otok tz'el tpa'n tib cyi'j max tuj tx'otx' Panfilia, ex minti' xi' cyuc'il tuj ak'untl. 39Ex jaw jun yol cyuw cyxolx, cyja'tzun cub cypa'n cyib; ate Bernabé xi uc'inte Marcos, e je'x tuj barc tu'n cypon tuj tx'otx' Chipre; 40atzunte Pablo jaw sc'onte Silas tu'n t-xi' tuc'il; atzun cye erman e na'n Dios cyi'j tu'n cyxi' tuj ak'untl ex tu'n ttzaj tk'o'n Dios t-xtalbil cye. 41E ic'xtzun tuj tx'otx' Siria ex tuj tx'otx' Cilicia, in cycyuwsa'n cynabl ocslal tuj junjun tnam.

will be added

X\