1 Junxtzun e ocx Pablo tuc'ix Bernabé tuj ja te c'ulbil cye xjal judiy tuj tnam Iconio, e yolintzun tuj tumelxix, cyja'tzun e ocslan nim xjal, ke xjal judiy ex ke xjal mya judiy. 2 Atzun cye xjal judiy mya ocslal ke, baj cytzpet-sa'n cynabl txkantl xjal mya judiy ke tu'n cyk'ojin cyi'j erman. 3 Cyja'tzun ax e ten apostl nim k'ij, in che yolin minti' in che xob, k'ukl cyc'u'j ti'j Kajaw; ex tzaj tyec'un Kajaw ka ax toc ju yol ti'j t-xtalbil Dios, tzaj tk'o'n cyoclen apostl tu'n cybinchanjtz ke señ ex ke binchben nim cyipumal. 4 Atzun cye xjal tuj tnam attok jun pabl tib cyxol; jun c'loj in che oc lpe' cyi'j ke xjal judiy, ex juntl c'loj cyi'j apostl. 5 Entons bant ti'j cyu'n xjal judiy cyuc'ix txkantl xjal mya judiy ke ex ke nejenel cyxol, tu'n cyyajlanjtz apostl cyu'n ex tu'n cyoc cyxo'n tu'n abj. 6 Pero tej cybinte apostl jlu, e ex ok e pon tuj tnam Listra ex tuj tnam Derbe, ex cyuj mastl tnam ti'jele, atzun ate' tnam lu tuj tx'otx' Licaonia, 7 ex atzun e pacban ti'j tkanil jun colbil. 8 Ex at jun xjal aj Listra minti' tipun tkan tu'n tbet, k'ukltok porque cox titz'jlenx, ex minti' bant ch'in tbet. 9 Tbitzun xjal lu in yolin Pablo, atzunte Pablo oc tque'yinxix, ex tej tlonte ka at tocslabl xjal tu'n tbanix, 10 jaw tk'ajk'ajel twi' Pablo cyuw ex tma: —We'ctza, jikumanx ti'ja, chi Pablo. Atzunte cox jaw t'icpaj ex oc ten betel. 11 Tejtzun cyque'yinte xjal aju tbincha Pablo, e jaw sch'in in cyma'n tuj cyyol xjal aj Licaonia: —Ma che cubil dios kuc'ile, ic che que'yin ic tza'n ke xjal. 12 Octzun cyk'o'n tbi Bernabé Júpiter, atzunte Pablo oc cyk'o'n tbi Mercurio, porque ate Pablo o yolin. 13 Atzun tja dios Júpiter tcub ttxa'n tnam; atzunte pal teju dios Júpiter pon ti'n cabe tor tuc'ix bech ttzi tpwertil tnam, ex o tajbe pal ex ke xjal tu'n cycub ke wacẍ te jun oyaj cywitz apostl. 14 Tejtzun cybinte Bernabé tuc'ix Pablo jlu, el cysbit'un cyxbalun, e ocx kelan cyxol xjal ex jaw tk'ajk'ajel cywi' cyuwxix: 15 —Akeye xinak. ¿Tiku'n in cybincha'ne jlu? Icx keye xjal ko'ye icx tza'n cyeye, ex in xi kpacba'ne cyeye tu'n tcyaj cyk'o'ne aju nokx gan, ex tu'n cyoc lpe'ye ti'j Dios itz', aju binchante cya'j tuc'ix tx'otx' ex tcyakilju at twitz, tuc'ix mar ex tcyakilju at tuj. 16 Cyuj ke tk'ijlalil ojtxi xi tk'o'n Dios ambil cye cycyakil xjal tu'n cybet tuj cyex cybe; 17 pero minti' cyaj ten Dios minti'wt testiw ti'j, porque tzaj tk'o'n aju ba'n cye, ex in cu'tz tk'o'n jbal kibaj, ex in tzaj tk'o'n tk'ijlalil tu'n tchmet kawal, ex in tzaj tk'o'n kwa tu'n ttzalaj kanmi, che chi apostl xi cyma'n cye xjal. 18 Penitzun e mayet ke xjal cyu'n apostl tu'nju yol lu, tu'n mi'n tcub cybyo'n ke wacẍ te jun oyaj cywitz apostl. 19 E ultzun junjun xjal judiy tzajni ke tuj Antioquiy ex tuj Iconio, cub ti'j cynabl xjal cyu'n, octzun xo'n Pablo tu'n abj cyu'n; ex ex cyjawo'n ti'jxi tnam, tuj cynabl ka otok cyim. 20 Pero baj cytxolba'n cyib ocslal ti'j, atzunte Pablo jaw we' ex ocx tuj tnam; ex te juntl k'ij ex tuj tnam tuc'ix Bernabé, pon tuj tnam Derbe. 21 Xi cypacba'n tkanil colbil tuj tnam Derbe, ex nim xjal e ocslan; e ajtztzun meltz'aj ke apostl tu'n cyul tuj tnam Listra, ex tuj tnam Iconio, ex tuj tnam Antioquiy. 22 In cycyuwsa'ntok cyanmi ke ocslal, ex in cyk'o'ntok cynabl tu'n cywe'xix tuj cyocslabl, ex in cyma'n ka ilxix ti'j tu'n ttzaj nim yajbil ke, tu'ntzun kocx tuj tcawbil Dios. 23 Ex octzun cyk'o'n cyoclen ansyan cyxol ocslal tuj junjun tnam, ex cybajlenxi na'n Dios ex tcublenxi cyyo'n we'yaj, cyajtzun cyokxenan tuj tk'ab Kajaw, aju otok che ocslan ti'j. 24 E ic'xtzun tuj tx'otx' Pisidia, e pon tuj tx'otx' Panfilia. 25 Ex t-xilenxi cypacba'n tyol Dios tuj tnam Perge, e cu'pun tuj tnam Atalia. 26 E etztzun tuj tnam Atalia, e ocx tuj barc tu'n cypon tuj tnam Antioquiy, atzun tzaj xe't cyak'un tuj tnam lu nej, ex oc na'j Dios cyi'j tu'n ttzaj tk'o'n Dios t-xtalbil cye tu'n cyex ak'nal; japuntzun ak'untl cyu'n aju otok tzaj k'ma'n cye. 27 Tejtzun cypon tuj tnam Antioquiy e baj cychmo'n ke ocslal, ex xi cytx'olba'n tcyakilju otok tbincha Dios tu'n cyak'unben, ex tza'n tten otok txi tk'o'n Dios ambil cye txkantl xjal mya judiy ke tu'n cyocslan. 28 Ex axtzun e cyaj ten Pablo tuc'ix Bernabé nim k'ij cyuc'il ke ocslal.
Copyright ℗ 2000 Hosanna Grabado por Producciones Cristianas Vina