Hechos 13

1Ate'tok t-sanjel Dios ex xnak'tzal cyxol ocslal tuj tnam Antioquiy. Atzun ke jlu: Bernabé, tuc'ix Simón (aju K'ek xjal tbi cyu'n xjal), tuc'ix Lusio aju aj Cirene, tuc'ix Manaén (aju junx o ch'iysanjtz tuc'il Herodes aju gobernador) ex tuc'ix Saulo. 2In che c'uluntok jlu te Kajaw, ex in cub cyyo'n we'yaj, tzaj tma'n Xewbaj Xjan cye cyja': —Cypa'mile Bernabé tuc'ix Saulo te weye, porque ma che txconjtz wu'ne tu'n cyajben tuj ak'untl, chi Xewbaj Xjan. 3Tcublenxitzun cyyo'n we'yaj ex cybajlenxi na'n Dios, cubtzun cyk'o'n cyk'ab tibaj cywi', ex e je'xtzun cysama'n. 4Atzunte Bernabé tuc'ix Saulo e je'x sama'n tu'n Xewbaj Xjan, e pon tuj tnam Seleucia, atzun e je'x tuj barc, e pon tuj jun tx'otx' Chipre tbi. 5Ex tej cypon tuj tnam Salamina, xi cypacba'n tyol Dios cyuj ja te c'ulbil cye xjal judiy. Ex tuc'ix Juan uc'in cyu'n te onil cye. 6Ex baj cybetin tuj tx'otx' Chipre, e pon tuj tnam Pafos; ex atzun oc noj jun xjal judiy cywitz, Barjesús tbi, chman te xjal lu ex in tma'n ka t-sanjel Dios te, pero nic'al yol. 7Axtok ta' chman lu tuc'il gobernador Sergio Paulo tbi, ex at-xix tnabl gobernador lu. Txquettzun Bernabé tuc'ix Saulo tu'n gobernador porque tajbil tu'n tbinte tyol Dios. 8Atzunte chman, aju Elimas juntl tbi tuj yol grieg, oc ten makolte tu'n mi'n t-xi tocsla'n gobernador. 9Atzunte Saulo, aju ax Pablo tbi, nojni tuj tanmi tu'n Xewbaj Xjan, oc tque'yinxix ti'j chman, 10ex xi tma'n te: —Aya, nimxix in sbuna ex nimxix mya ba'n in tbincha'na, ex tc'wa'l tajaw ila, ex aj k'oja ti'j tcyakilju ba'n. ¿Tiku'n minti' in cyaj tcolina tu'n t-ẍocsanteya ke tbe Kajaw jikun cyi'j? 11Ja'lotzun, cbel tcastiwoya tu'n Kajaw; c'oquela moẍ, ex ela' k'ij ctela mlay bant tu'n toc tque'yina tkan k'ij, chi Saulo. Ex jurat naj cub kloljxix tuj twitz, in tacpaje', ex in jyon ti'j alcye tu'n t-xi lach'on te. 12Atzunte gobernador, tej tque'yinte jlu ocslantzun, porque in labin ti'j ju xnak'tzbil ti'j Kajaw. 13E etztzun Pablo cyuc'ix ke tuc'il tuj tnam Pafos, e ocx tuj barc tu'n cypon tuj tnam Perge tuj tx'otx' Panfilia; atzunte Juan el tpa'n tib cyi'j, aj meltz'aj juntl maj tuj Jerusalén. 14E ic'tzun tuj Perge, e pon tuj tnam Antioquiy tuj tx'otx' Pisidia; e ocxtzun tuj ja te c'ulbil tuj k'ij te ojlabl ex e cub ke'. 15Tbajlenxitzun sch'i'n tuj tu'jil ley ex tuj cyu'jil t-sanjel Dios, atzun cye nejenel tuj ja te c'ulbil tzaj cysama'n jun xjal k'malte cye Pablo cyja': —Akeye erman, ka at jun cyyole te k'obl cynabl xjal, cymantze, che chi. 16Jawtzun we' Pablo, xi tyec'un tk'ab tu'n mi'n cyk'ajt, ex tma: —Akeye xinak aj Israel, ex akeye xjal mya judiy in che xobe twitz Dios, cybintze nyole. 17Aj Israel ko', aju Kdios jaw sc'onte cye kxe'chel, ex e chmet-xix kxjalil tej cyten tuj tx'otx' Ejipt jatum e ten te stranjer xjal; ex tu'n tipumal Dios e je'tz ti'n tuj Ejipt. 18Ex 40 abk'ilo ten tpasens Dios cyi'j tuj lugar minti' cynajbil xjal tuj; 19ex tej cynaj wuk nasyon tu'n Dios tuj tx'otx' Canaán, xi tk'o'n cytx'otx' xjal aj Canaán te cyetzbil kxe'chel. 20Te tibajxitzun, oc tk'o'n Dios ke jwes cyxol, balo cyaje syent tuc'il 50 abk'i e ten jwes, o canun ti'j Samuel aju t-sanjel Dios. 21Xitzun cykanin tu'n toc jun cyrey, ex tzaj tk'o'n Dios jun cyrey Saúl tbi, aju tcy'ajal Cis ex oc te cyrey, ate xinak lu tiyjil Benjamín, ex o ten 40 abk'i te cyrey. 22Tej tel k'i'n jlu, oc tk'o'n Dios juntl cyrey aju David tbi; ex o yolin Dios ti'j: Ma tz'el nnic'e ti'j David aju tcy'ajal Isaí, ate jlu jun xinak ic tza'nx wajbile, oc tbincha' tcyakil alcye wajbile, chi Dios. 23Ti'jtzun tiyjil David ul itz'j Jesús aju tzaj sama'n tu'n Dios tu'n toc te Colol cye aj Israel, ic tza'nx otok tzaj ttziyan. 24Na'nxtok tul Jesús, xi tpacba'n Juan cye cycyakil aj Israel tu'n cybyan ex tu'n tajtz ti'j cyanmi. 25Tej ch'ixtok tjapun baj tak'un Juan, tma: ¿Alcye kine tuj cynable? Mya we kin aju Crist; pero lu jun xjal lepchix ttzaj wi'je mya ba'n kine tu'n tel npaju'ne tak'al t-xajab ti'j tkan, chi Juan. 26Erman, akeye tiyjil Abraham, ex ke xjal mya judiy ate' cyxole in che xob twitz Dios: te ke ma tzaj k'o'n ju yol lu te colbil. 27Porque ke xjal najl tuj Jerusalén cyuc'ix ke nejenel cyxol, minti' el cynic' ti'j Jesús, ex minti' el cynic' ti'j aju in tma'n tuj cyu'jil t-sanjel Dios, aju in jaw sch'i'n tuj tcyakil k'ij te ojlabl; pero o japun cyu'n aju tz'iban tuj Tu'jil tej tcub t-sentens Jesús cyu'n. 28Ex masque minti' cnet jun til cyu'n tu'n tcyim, pero xi cykanin te Pilat tu'n tcub byet. 29Ex tjapunlenxitzun baj tcyakil cyu'n aju tz'ibamaj ti'j tuj Tu'jil, cu'tztzun cyi'n twitz crus, ex ocx cyk'o'n tuj jun pantyón. 30Pero tu'n Dios jaw ank'in cyxol cyimni. 31Ex nimcu k'ij cub tyec'un tib Jesús cywitz keju e tzaj tuc'il tuj Galiley e pon tuj Jerusalén; atzun ke jlu ma che oc te testiw ti'j cywitz xjal ja'lo. 32Ax icx keye in xi kma'ne ba'n tkanil cyeye ti'j ju yol tzaj ttziyan Dios cye kxe'chel. 33Ako' cyiyjil xjal lu, cyja'tzun ma tzaj tk'o'n Dios ke aju tziyimaj tu'n cye kxe'chel, porque ma jaw ank'in Jesús tu'n; ic tza'n tz'iban tuj tcabin salmo in tma'n: Aya ncy'ajale, ma chin oque te tmana ja'lo, chi tuj Tu'jil. 34Ex ma jaw ank'in Jesús tu'n cyxol cyimni tu'n mi'n ttzuwix t-ximlal. Ti'jtzun jlu tma Dios cyja': Cjapunel wu'ne cyeye aju yol axix toc xi ntziyane te David, tu'n cycub ncy'iwla'ne, chi Dios tuj Tu'jil. 35Cyja'tzun in tma'n tuj juntl salmo: Mlay cyaj tk'o'na tu'n ttzuwix nximlale, akine tmajena nimal teya, chi tuj Tu'jil. 36Porque ax toc ate David ajben cye t-xjalil ic tza'nx tajbil Dios, ex cyimtzun, ex cu'x maku'n cytxlaj ke tman, ex tzuwix t-ximlal. 37Atzunte Jesús minti' tzuwix t-ximlal, porque jaw ank'in tu'n Dios. 38Tz'elxtzun cynic'e ti'j jlu, akeye erman: In xi kma'ne tkanil cyeye, nok tu'n Jesús cnajsetel cyile. 39Minti' tumel tu'n tnajset cyile tu'n tley Moisés, atzun ja'lo cycyakil keju ma che ocslan, cnajsetel cyil tu'n Jesús. 40Cyk'o'nctzune cwent ti'j tu'n mi'n ttzaj cyibaje aju in tma'n tuj cyu'jil t-sanjel Dios, chi cyja': 41Cybintze, akeye xmayil, ex che labine ti'j, ex cycub naje; porque at jun ti'xti oc nbincha'ye tuj cyk'ijlalile, ex mlay txi cynimane, masquelo at jun ma k'mante cyeye, chi tuj Tu'jil, chi Pablo. 42Tejtzun cyetz Pablo tuj ja te c'ulbil cye xjal judiy, e cubsan ke txkantl xjal mya judiy cywitz tu'n cypontl cyuc'il tuj juntl k'ij te ojlabl tu'n cyyolin ch'intl ti'j jlu. 43Ex tej cyetz pax xjal tuj ja te c'ulbil, nimcu xjal judiy e oc lpe' ti'j Pablo ex ti'j Bernabé cyuc'ix keju otok cyocsla cyley judiy ex nimal Dios ke. Octzun ten Pablo ex Bernabé yolil cyuc'il, xi cyk'o'n cynabl ex ax tu'n cyten tuj t-xtalbil Dios. 44Tuj juntl k'ij te ojlabl oc cychmon cyib cycyakil xjal tuj tnam tu'n cybinte tyol Dios, nic'xi junjun minti' pon. 45Tejtzun cylonte xjal judiy nim xjal otok tz'oc cychmon cyib, tzaj tlo'ch cyc'u'j, ex e oc ten makolte aju in tma'n Pablo, in cyma'n ka mya ax toc, ex in che yasun ti'j. 46Atzunte Pablo tuc'ix Bernabé e yolin minti' cyxobil: —Ax toc, che chi, tnejel ilxix ti'j tu'n t-xi kma'ne tyol Dios cyeye akeye xjal judiy; pero ma tz'el cyic'une, ex cyc'i'ye cyc'ame aju chwinklal te jumajx, cyja'tzun ko xe'le cyxol txkantl xjal mya judiy ke. 47Porque ictzun tten tzaj tma'n Kajaw keye: Aya ma cub nk'o'ne te jun spic'un cye xjal cyuj mastl nasyon, tu'ntzun t-xi tma'na tuj tcyakil twitz tx'otx' aju colbil wu'ne, chi Kajaw, chi Pablo. 48Tejtzun cybinte txkantl xjal jlu, akeju mya judiy, e jaw tzalaj ex e yolin ti'j ka ba'n te Kajaw tyol; ex e ocslan cycyakil keju sc'o'maj tu'n tten cychwinklal te jumajx. 49Atzunju tyol Kajaw nne'l lak'e'tok tkanil tuj tcyakil lugar te Pisidia. 50Pero ke xjal judiy e oc ten ocsalte cyc'u'j ke xu'j nimal Dios ex at cyoclen, ax icx ke cytijil xjal tuj tnam, ex e oc ten k'ojlel ti'j Pablo ex ti'j Bernabé, ex e ex cylajo'n tuj cytanmi. 51Atzunte Pablo tuc'ix Bernabé el cychto'n kuk ti'j cykan te jun yec'bil cyi'j xjal ka mya ba'n ke, ex e je'x tuj tnam Iconio. 52Atzun ke ocslal nimxix in che tzalaj ex nojni tuj cyanmi tu'n Xewbaj Xjan.

will be added

X\