Hechos 12

1Tujx tk'ijlalil lu e tzyettzun junjun ocslal tu'n rey Herodes tu'n cyc'ixbisanjtz. 2Ex xi tma'n Herodes tu'n tcub byo'n Jacobo tu'n spad, aju ttzic Juan. 3Ex tej tbinte ka ba'n e'la jlu tuj cywitz xjal judiy, ax icx xi tma'n tu'n ttzyet Pedro. Atzun nink'ij tu'n t-xi cywa'n xjal pan minti' t-samel tuj tu'n tjaw mal tc'u'j. 4Tejtzun ttzyet Pedro tu'n Herodes, ocx tk'o'n tuj pres, ex xi tk'o'n tuj cycwent cyaje c'loj soldad tu'n toc cyxk'ukin, te cyajcyaj soldad junjun c'loj. Cub t-ximan Herodes tu'n tetz ti'n tuj pres tbajlenxi Xjan K'ij, tu'ntzun tcub tk'o'n cywitz xjal. 5Cyja'tzun o xk'ukinjtz Pedro tuj pres, atzun cye ocslal minti' e k'ajen tu'n cyna'n Dios ti'j. 6Nchi'jtok tu'n tetz k'i'n Pedro tu'n Herodes tu'n tcub tk'o'n cywitz xjal, lu te Pedro in tan cyxol cabe soldad te konic'an, c'alo'n tu'n cabe caden, ax icx ate' soldad in che xk'ukin twitz tpwertil ja jatum ate' ke pres. 7Entons ul naj jun t-anjel Kajaw, cub we' ttxlaj Pedro, ex at jun spic'un cub koptz'aj tuj pres; octzun tmaco'n anjel ttxlaj t-xu'c Pedro, jaw tc'asun, ex xi tma'n te: —Juratx we'ctza. Atzun ke caden e je'l tz'ak ti'j tk'ab Pedro. 8Xitzun tma'ntl anjel te: —C'alo'nc tc'u'ja ex k'o'nc t-xajbiya. Ex tbinchatzun Pedro icju. Xitzun tma'ntl anjel te: —Balk'i'nc ttxo'wa ti'ja, ex lpe'tza wi'je. 9Etztzun Pedro, oc lpe' ti'j anjel; ex minti' el tnic' ti'j ka axix toc aju tbincha anjel, tuj tnabl Pedro ka in witzcy'an. 10E je'tztzun cywitz tnejel xk'ukil ex cywitz tcabin; tejtzun cye'lel twitz ju pwert c'uxbil tetz ttzi cay, jakettzun pwert tu'nx tib; ex tej cyetz, e je'x bet ch'in tuj jun cay, ex eltzun tpa'n naj tib anjel ti'j. 11Eltzun spic'e'xix tuj twitz Pedro, ex tma: —Matzun tz'el nnic'e ti'j ja'lo ax toc ma tzaj t-sama'n Kajaw t-anjel ex ma chin etz tzokpi'ne tu'n tjak' tcawbil Herodes, tu'ntzun mi'n tbinchanjtz wi'je aju in che ximan xjal judiy ti'j tu'n cybinchante, chi Pedro. 12Tejtzun tel tnic' Pedro ti'j jlu, xi'tzun tja Mariy aju ttxu' Juan aju Marcos tcabin tbi, jatum cybuyintok cyib nimcu xjal in che na'n Dios. 13Tejtzun toc tk'ajtza'n Pedro tpwertil sawan, etztzun jun txin Rode tbi, que'yil te alcye in k'ajtzan. 14Eltzun tnic' txin ti'j tk'ajk'ajel twi' Pedro, pero minti' ocx tjako'n pwert tu'n tzalajbil, nok o'cx aj kelan tuja k'malte tkanil ka wa'ltok Pedro ttzi ja. 15Atzun cye ocslal xi cyma'n te txin: —Balo tuj twitza ma tzaj. Pero ate txin o tcyuwsaxix ka ax toc. Atzun cye cyma: —Mya ate Pedro ma tzul; balo nok t-anjel, che chi. 16Atzunte Pedro cucxtok toc tk'ajtza'n pwert; tejtzun tjaket pwert cyu'n ex tej cyque'yinte, bi'x naj cynabl. 17Atzunte Pedro xi tyucun tk'ab tu'n cyk'ajen, ex xi ttx'olba'n cye tza'n tten otok tz'etz k'i'n tu'n Kajaw tuj pres. Ex xi tma'n cye: —Cyk'onxe tkanil jlu te Jacobo ex cye erman, chi Pedro. Etztzun, ex xi' tuj juntl lugar. 18Tejtzun kskix, e jaw tilj ke soldad in che yolin ti'j tza'n otok txi' Pedro. 19Atzunte Herodes xi tma'n tu'n cyoc ten jyolte Pedro, pero minti' cnet cyu'n, e octzun ke soldad tuj xjel tu'n, ex xi tk'o'n orden tu'n cycub byet. Etztzun Herodes tuj Judey cu'pun tuj Cesarey, ex axtzun cyaj ten. 20Tzajtzun tk'oj Herodes cyi'j xjal aj Tiro ex aj Sidón; atzun cye moje' cyyol ex e ultzun tuc'il; ex cub ti'j tnabl Blasto cyu'n, aju tnejel cwentil tuj tja rey Herodes, xi cykanin tu'n mi'n tk'ojintl rey cyi'j, porque atzun in tzaj cywa tuj tx'otx' jatum in cawin rey. 21Tejtzun tpon k'ij aju k'ma'maj tu'n Herodes tu'n cypon xjal, octzun tk'o'n t-xbalun tbanilxix, cub ke' tuj tk'ukbil jatum in cawin, ex oc ten yolil cyuc'il xjal. 22Atzun cye xjal jaw tk'ajk'ajel cywi' cyuwxix ex cyma: —Tk'ajk'ajel twi' jun dios te jlu, mya te jun xjal, che chi. 23Ex jurat c'ixbisanjtz Herodes tu'n jun t-anjel Kajaw, tu'nju minti' jaw tnimsa'n tbi Dios; in che wa'ntok ẍuk' ti'j tchibjal, ex cyimtzun. 24Atzunju tyol Dios mas in xi cyocsla'n xjal ex in pacbanjtz tuj tcyakil lugar. 25Atzunte Bernabé tuc'ix Saulo e ajtz meltz'aj t-xilenxi cyk'o'n ju oyaj tuj Jerusalén, ex tzaj cyi'n Juan cyuc'il, aju Marcos tcabin tbi.

will be added

X\