Hechos 11

1Atzun cye apostl ex ke erman ate' tuj Judey, o cybi ka otok txi cyocsla'n txkantl xjal aju tyol Dios, akeju mya judiy ke. 2Tejtzun tul meltz'aj Pedro tuj Jerusalén, tzaj jun cyyol ocslal judiy ti'j Pedro. 3Ex xi cykanin te: —¿Tiku'n ma tz'ocxa tuj cyja xjal mya judiy, ex ma wa'na cyuc'il? Che chi. 4Octzun ten Pedro tx'olbalte cye tuj tumelxix aju otok baj, chi tma: 5—Atintoke tuj tnam Jope, in chin na'ne Dios, ex at jun o wile ic tza'n tuj witzic', ic que'yin ic tza'n jun nintz xbalun, cu'tz tuj cya'j c'alo'n cycyajil ttxa'n, ex cubil nwitze. 6Tej toc nque'yinxixe ti'j, e wile ke txcup cyaje cykan, ke lobaj, ke chyu'j ex ke mastl jil. 7Ex o nbiye jun tk'ajk'ajel tzaj tma'n weye: We'ctza Pedro, byoncuya ke jlu te tchi'ya, chi weye. 8Pero xi nma'ne cyja': Mlay Tat, porque bajx txi nchyo'ne jun ti'xti mya ba'n ex ka tz'il. 9Tzajtzun k'ajt tcabmaji'n tuj cya'j, tma weye: Aju tx'jo'maj tu'n Dios mi'n tz'oc tk'o'na te mya ba'n. 10Ox maj o k'manjtz jlu, ex jaxtzun k'i'ntl tcyakil tuj cya'j. 11Ex jurat e pon ox xinak jatum in chin posadiyine, otok che tzaj sama'n tuj tnam Cesarey te txcol weye. 12Tzajtzun tma'n Xewbaj Xjan weye tu'n nxi'ye cyuc'il ex tu'n mi'n tjawje' nc'u'je. Ax icx ke kak erman lu e je'x wuc'ile, ex o ocxe tuj tja jun xinak. 13Tzajtzun ttx'olba'n keye ka otok cub tyec'un tib jun anjel twitz tuj tja; cub we' anjel twitz, ex tma te: Samanxa cabe xjal tuj tnam Jope txcol te Simón, aju Pedro tcabin tbi; 14ate jlu ctzajel tma'n jun yol teya, tza'n tten tu'n tcleta, aya, ex cycyakil keju ate' tuj tjaya, chi anjel xi tma'n te. 15Tejtzun tke' nyoline, cubil Xewbaj Xjan cyibaj, ic tza'n cubil kibaj nej. 16Ultzun tuj wanmiye aju o tma Kajaw: Ax toc o che byan xjal tuj a' tu'n Juan, atzun cyeye oc che byale tuj junxitl tumel oc cyc'monteye Xewbaj Xjan, chi Kajaw. 17Katzun ax oyaj tzaj tk'o'n Dios cye, aju tzaj tk'o'n ke tej kocslan ti'j Kajaw Jesucrist, ¿titzun woclene tu'n tmaket Dios wu'ne? Chi Pedro xi tma'n cye. 18Tejtzun cybinte erman tcyakil jlu, akeju ate' tuj Jerusalén, minti' e k'ajt, nok o'cx jaw cynimsa'n tbi Dios, ex cyma: —Entons ma tzaj tk'o'n Dios t-xtalbil cye txkantl xjal mya judiy ke tu'n tajtz ti'j cyanmi tu'n tten cychwinklal. 19Atzun cye mastl ocslal otok che el sputj tu'n tlaj yajbil cye tzaj xe't tej tcub byo'n Esteban, max e pon tuj tx'otx' Fenicia, ex tuj Chipre, ex tuj Antioquiy, minti' xi cyma'n tyol Dios cye mastl xjal, o'cx cye xjal judiy. 20Pero at junjun ocslal aj Chipre ex aj Cirene cyxol, tejtzun cypon tuj tnam Antioquiy, ax icx xi cyma'n tyol Dios cye txkantl xjal mya judiy, ex xi cyma'n tkanil ba'n cye ti'j Kajaw Jesús. 21Aju tipumal Kajaw attok cyuc'il, ex nimcu xjal cyaj cycolin ojtxi cyocslabl ex e ocslan ti'j Kajaw. 22Pontzun tkanil jlu cyuc'il ke ocslal ate'tok tuj tnam Jerusalén, ex xi cysama'n Bernabé tu'n tpon tuj tnam Antioquiy. 23Tejtzun tpon Bernabé, ex tej tque'yinte nim t-xtalbil Dios tzaj tk'o'n cye, jaw tzalajxix, ex xi tk'o'n cynabl cycyakil tu'n cycyaj ten wa'lxix tuj cyocslabl, ex tu'n cyxi lpe' ti'j Kajaw tu'n tcyakil cyanmi. 24Porque ate Bernabé jun xinak ba'nxix, ex nojni tuj tanmi tu'n Xewbaj Xjan, ex at-xix tocslabl. Cyja'tzun nim xjal e ocslan ti'j Kajaw. 25Tbajlenxi jlu xi' Bernabé tuj tnam Tarso jyolte Saulo; tejtzun tcnet tu'n, ul ti'n tuj Antioquiy. 26Ex axtzun e cyaj ten jun abk'i cyuc'il ocslal, ex xi' cyk'o'n xnak'tzbil cye nimcu xjal. Tnejelxix tuj Antioquiy oc cyk'o'n xjal cybi ocslal, ocslal ti'j Crist. 27Axtoktzun ta' Bernabé tuc'ix Saulo tuj Antioquiy tej cypon junjun t-sanjel Dios tzajni ke tuj Jerusalén. 28Ex at jun cyxol jlu Agabo tbi, jaw we' yolil cyxol ocslal ex tzaj tchic'ba'n tu'n Xewbaj Xjan, ex tma: —Tzul nimxix we'yaj tuj tcyakil twitz tx'otx'. O japun tyol Agabo, porque tzaj nimxix we'yaj tuj tk'ijlalil tej tcawin president Claudio. 29Atzun cye ocslal tuj Antioquiy cub cyximan tu'n t-xi cysama'n ch'in onbil cye erman najl ke tuj Judey, teyle junjun tu'n t-xi t-sama'n ic tza'nx ju at te. 30Cybinchatzun icju, xitzun cysama'n jun oyaj cye erman; ate Bernabé tuc'ix Saulo xi k'inte, ex xi cyk'o'n cye ansyan ate' tuj Judey.

will be added

X\