Hechos 10

1Attok jun xjal tuj Cesarey Cornelio tbi, toctok te cycapitán jun c'loj soldad Italiano cybi. 2Ate xjal lu nimal Dios ex at tchi Dios tuj twitz, ax icx cycyakil keju ate' tuj tja. Ex nimcu cycotz xjal judiy in xi tk'o'n, ex cucx in na'n Dios. 3At jun k'ij balo las tres te kale, o til Cornelio ic tza'n tuj witzic' k'ancha'lxix, ocx jun t-anjel Dios tuc'il ex tma: —Cornelio, chi anjel. 4Octzun tque'yinxix Cornelio ti'j anjel, ex tzaj t-xobil: —¿Ti taja, Tat? Chi Cornelio. Atzunte anjel tma te: —Ma tbi Dios ke tna'j Diosa ex ma til ke cotzbaj in che'x tk'o'na cye meba. 5Ja'lotzun samanxa cabe xjal tuj tnam Jope txcol te Simón, aju Pedro tcabin tbi. 6Atzun ta' tposad jlu tuj tja jun xjal Simón tbi, aju tzk'ajsal tz'u'm, aju tcub tja ttzi mar. [Ate Pedro ctzajel k'mante teya alcye ilxix ti'j tu'n tbinchanteya, chi anjel.] 7Tajlenxitzun anjel aju otok yolin tuc'il Cornelio, e tzaj ttxco'n Cornelio cabe tmajen tuc'ix jun soldad nimal Dios cyxol keju in che ajben te. 8Tbajlenxi ttx'olba'n tcyakil jlu cye, e je'xtzun t-sama'n tuj tnam Jope. 9Ex te juntl k'ij, cyja'tok cyxi' ke xjal lu tuj be, ch'ixtok cycanun tuj tnam Jope, jax Pedro na'l Dios twi' ja, te chilcuk'ij. 10Ex tzaj elxix tc'u'j, ex o tajbe tu'n twa'n; pero matok in bant ch'in twa, o til ic tza'n tuj witzic', 11ex o til catl ttzi cya'j, ex cu'tz jun ic que'yin ic tza'n jun nintz xbalun, ex cubil twitz tx'otx', c'alo'n cycyajil ttxa'n. 12Tujtzunju nintz xbalun lu attok ela' txcaj jil cyaje cykan, cyuc'ix ke lobaj, ex ke chyu'j. 13Ex tzaj jun tk'ajk'ajel in tma'n: —We'ctza, Pedro, byoncuya te tchi'ya. 14Atzunte Pedro xi ttzak'we'n: —Mlay, Tat, porque bajx txi nchyo'ne jun ti'xti mya ba'n ex ka tz'il. 15Tbitzun Pedro tcabmaji'n tk'ajk'ajel in tma'n: —Aju tx'jo'maj tu'n Dios, mi'n tz'oc tk'o'na te mya ba'n. 16Ox maj o k'manjtz jlu; atzunju nintz xbalun jax k'i'ntl tuj cya'j. 17Ex matok in ximan Pedro ti'j jlu, ti t-xilen aju otok til ic tza'n tuj witzic', e pon ke xinak ttzi pwert, aju otok che tzaj sama'n tu'n Cornelio, in che kanin ti'j jatum ta'tok tja Simón. 18E ocxtzun k'ajt, xi cykanin ka axtok in posadiyin Simón aju Pedro tcabin tbi. 19Matok in ximan Pedro ti'j aju otok til ic tza'n tuj witzic', tzaj tma'n Xewbaj Xjan te: —Ate' ox xinak in jyonjtza cyu'n. 20We'ctztzuna, ex tcu'xa, txi'ya cyuc'il, ex mi'n jawje' tc'u'ja, porque akine ma chin tzaj saman cye, chi Xewbaj Xjan. 21Cubiltzun Pedro jatum ate'tok keju xinak otok che tzaj sama'n tu'n Cornelio, ex tma cye: —Lu kine lu aju in cyjyo'ne; ¿tiku'n ma che tzaje wuc'ile? 22Atzun cye xi cytzak'we'n: —Ma ko tzaj sama'ne tu'n Cornelio aju capitán, jun xinak tz'aklxix ex nimal Dios, ex cycyakil xjal judiy in che yolin ba'n ti'j. Ma tzaj k'ma'n te tu'n jun t-anjel Dios tu'n tpona tja ex tu'n tbinte aju tyola. 23Xitzun tma'n Pedro tu'n cyocx tuja, ex xi tk'o'n cyposad. Ex te juntl k'ij cub be tu'n Pedro, xi' cyuc'il; ex at junjun erman e je'x tuc'il, akeju najl ke tuj tnam Jope. 24Tujtzun juntl k'ij e canun tuj Cesarey. Atzunte Cornelio in ayontok cyi'j, otok che tzaj ttxco'n keju at cyxilen tuc'il ex ke tamiw akeju c'ujla'nxix tu'n. 25Tejtzun tpon Pedro tja Cornelio, etz naj Cornelio k'olbel te, ex cub ẍmeje' c'ulul twitz. 26Atzunte Pedro jaw twaban, ex tma: —We'ctza, porque ax xjal kine. 27Octzun ten Pedro yolil tuc'il ex ocx tuja, ex o til nimcu xjal otok tz'oc cychmon cyib. 28Xitzun tma'n Pedro cye: —Akeye ba'n cyu'ne ka mya k'o'n tu'n cyley xjal judiy tu'n toc tmojban tib jun xjal judiy tuc'il jun xjal te junxitl tnam ex mya k'o'n tu'n tocx tuj tja. Pero ma tzaj tyec'un Dios weye tu'n mi'n t-xi nma'ne ka mya ba'n ex ka tz'il juntl xjal. 29Cyja'tzun, tej nbinteye txocbil weye, minti' cub nxc'ayin wibe. Wajbile tu'n nbinteye: ¿Titzun cyajbile weye tu'nju ma chin tzaj cytxco'ne tu'n wule tzalu? 30Atzunte Cornelio xi ttzak'we'n: —Ma bant-xi cyaje k'ij ax or ic tza'n ja'lo [ayo'nx we'yaj wu'ne;] ex las tres te kale matok in chin na'ne Dios tuj njaye, o wile jun xinak cub we' nwitze toc t-xbalun in koptz'aj wen, 31ex tma weye: Cornelio, ma tzaj tbi'n Dios aju tna'j Diosa, ex ma tzaj tque'yin ke cotzbaj in xi tk'o'na cye meba. 32Samanxtzuna cabe xjal tuj tnam Jope txcol te Simón, aju Pedro tcabin tbi. Atzun in posadiyin Pedro tuj tja jun xjal Simón tbi aju tzk'ajsal tz'u'm, aju tcub tja ttzi mar. [Octzun tul Pedro oc c-yolil tuc'ila, chi xinak.] 33Cyja'tzun e je'x nsama'n naje cabe xjal txcol teya; ex ba'n ma tbinchaya ma tzula. Ja'lotzun kcyakile ato'ye tzalu twitz Dios kaje tu'n kbinteye tcyakil aju ma tzaj tma'n Dios teya, chi Cornelio. 34Octzun ten Pedro yolil ex tma: —Axix toc ma tz'el nnic'e ti'j, minti' in tque'yin Dios aju cyxilen xjal, 35nok o'cx in tzalaj cyi'j xjal at tchi Dios cye tuj tcyakil nasyon, ex in cybincha'n aju tz'aklxix. 36Tzaj tma'n Dios tyol cye aj Israel ex tzaj tma'n tkanil ba'n tu'n tbant cyten xjal tuc'il Dios nok tu'n Jesucrist, aju Tajaw Tcyakil. 37Ba'n cyu'ne aju yol lu el tkanil tuj tcyakil Judey, atzun tzaj xe't tuj Galiley tbajlenxi tpacba'n Juan ka ilxix ti'j tu'n cybyan xjal. 38Ex ba'n cyu'ne tza'n tten tzaj tk'o'n Dios tipumal Jesús aj Nazaret, ex o noj tu'n Xewbaj Xjan tu'n tc'monte toclen, ex ba'n cyu'ne tza'n tten o bet Jesús in tbincha'n ba'n, ex cycyakil keju in che yajlanjtz tu'n tajaw il e banix tu'n Jesús, porque attok Dios tuc'il. 39Ex a ko'ye testiw ti'j tcyakilju o tbincha Jesús tuj tx'otx' Judey ex tuj tnam Jerusalén; jaw k'o'n twitz crus cyu'n xjal ex cub cybyo'n. 40Pero tuj toxin k'ij jatz ank'in tu'n Dios, ex tma Dios tu'n tcub tyec'un tib Jesús kwitze. 41Mya cywitz cycyakil xjal cub tyec'un tib, nok o'cx kwitze, ako'ye sc'o'maj tu'n Dios tu'n koque te testiw ti'j, porque o ko wa'ne ex o ko c'ane tuc'il tjatzlenxi ank'in cyxol cyimni. 42Ex tzaj tma'n Jesús keye tu'n t-xi kpacba'ne cye xjal ex tu'n t-xi kchic'ba'ne cye ax toc tu'n Dios ma tz'oc k'o'n Jesús te Jwes cyibaj xjal itz' ex cyibaj ke xjal cyimni. 43Atxix ojtxi cycyakil t-sanjel Dios in tzaj cychic'ba'n ti'j Jesús, in cyma'n ka cycyakil keju ma che ocslan ti'j Jesús, cnajsetel cyil tu'n, chi Pedro cye. 44Matok in yolin Pedro ti'j jlu, cubiltzun Xewbaj Xjan cyibaj cycyakil keju in che bin tyol Pedro. 45Atzun cye ocslal judiy, akeju otok che tzaj tuc'il Pedro, bi'x naj cynabl, tu'nju tzaj tk'o'n Dios Xewbaj Xjan cye xjal mya judiy ke. 46Porque in cybi'ntok in che yolin tuj cyyol txkantl tnam ex in cynimsa'n tbi Dios. 47Atzunte Pedro xi tma'n: —¿Jacupelo tma jun xjal tu'n mi'n cybyan ke jlu tuj a'? Mlaylo tma, porque ma cyc'am Xewbaj Xjan ic tza'n ke. 48Xitzun tma'n Pedro tu'n cybyan tuj tbi Jesucrist. Entons e cubsan twitz Pedro tu'n tcyaj ten nok jte' k'ijtl cyuc'il.

will be added

X\