2 Timoteo 3

1Ax icx tz'elx tnic'a ti'j jlu: Tuj mancbil tk'ijlalil tzul nim yajbil. 2Porque che ul xjal o'cx toc cyc'u'j cyi'jx, ex o'cx toc cyc'u'j ti'j pwak, ex in jaw cyniman cyib, ex jawni ke, ex yasul ke, ex miban che niman tyol cyman, ex minti' in cyk'o'n chjonte ti'j ju in cyc'mo'n, miban che niman te Dios, 3ex minti' cyc'ujlalil, ex minti' in chewix cyc'u'j, ex si'mil yol ke, ex minti' in cyjac'un cyib, ex minti' ch'in cylastmi cyi'j xjal, ex nne'l cyic'un aju ba'n, 4ax in che oc meltz'aj cyi'j cyuc'il, tx'u'j cywi', ex in jaw cyniman cyib, mas toc cyc'u'j ti'j achbil ex mya ti'j Dios. 5Mer nimal Dios che que'yin, pero minti' cyaj ti'j tipumal tu'n cyclet. Pa'mil tiba cyi'j jlu. 6Cyxol jlu at junjun cheba nno'cx cylamon cyib tuj cyja xjal, jurat in cub cysbu'n ke xu'j minti' cynabl ex aj ilxix ke. Ke xu'j lu mer ic tza'n jawo'n ke tu'nju in pon cyc'u'j ti'j nimcu, 7nim cygan tu'n cyxnak'tzan, pero minti' nne'l cynic' ti'j ju yol axix toc. 8Icxtzun cymod xjal lu ic tza'n Janes tuc'ix Jambres, e k'ojin ti'j Moisés. Icx ke jlu in che k'ojin ti'j ju yol axix toc, mya tuj tumel ta' cynabl, ex mlay che c'met tuj ocslabl. 9Pero mlay che'x lak'e' mastl, porque cycyakil xjal c'elel cynic' cyi'j ka minti' cynabl, ic tza'n ojtxi el cynic' xjal ti'j Janes ex Jambres ka minti' cynabl. 10Atzun teya ma tz'oc lpe'ya ti'j nxnak'tzbile, ex ti'j nbinchbene, ex ti'j nnable, ex ti'j wocslable, ex ti'j npasense, ex ti'j nc'ujlalile, ex nnic'x tu'na ic tza'n weye. 11Ex o tena wuc'ile tuj yajbil weye ex tuj tcyakilju ic'x wu'ne tuj tnam Antioquía ex tuj Iconio ex tuj Listra; nim yajbil ic'x wu'ne, pero tuj tcyakil ma chin clete tu'n Kajaw. 12Ex cycyakil keju cyajbil cucx tu'n cynimante Jesucrist, oc che yajlanjtzel. 13Atzun ke xjal mya ba'n ex ke sbul, cyja' cyxi lak'e' mastl tuj mya ba'n, in che sbun ax icx cye in che sbunjtz. 14Atzun teya ax tu'n tcyaj tena tuj ju xnak'tzbil ma tc'ama ex ma ke' tc'u'ja ti'j, porque ba'n tu'na alcye ma xnak'tzan teya. 15Ex atxix tuj tne'yila el tnic'a ti'j ju Xjan Tu'jil, tu'ntzun jlu ma tzaj k'o'n tnabla tza'n tten tu'n tcleta tu'n tocslabla ti'j Jesucrist. 16Tcyakil aju tz'iban tuj Tu'jil, a Dios o k'mante ex at tajben te xnak'tzbil ke, ex tu'n kmayonjtz tu'n mi'n kbinchante mya ba'n, ex tu'n tjikumanjtz ti'j knabl, ex tu'n kxnak'tzanjtz tu'n kbet tuj tumelxix, 17tu'ntzun tten tnabl ju xjal in ajben te Dios, ex banin tten tu'n tbinchante tcyakil ak'untl ba'n.

will be added

X\