2 Tesalonicenses 2

1Atzun ja'lo, erman, at jun kyole cxel kma'ne ti'j tulel Kajaw Jesucrist ex ti'j ju k'ij oc tul tu'n kc'lunte kib tuc'il; ko cubsale cywitze 2tu'n mi'n tch'expet naj cynable, ex mi'n naj cynable. Ka at jun pacbal yol ma pon cyuc'ile ex ka jun yol ex ka jun u'j in tma'n ka ya ma tzul tk'ijlalil tu'n tul Kajaw, ex in cyma'n ka keye kyol, mi'n txi cynimane. 3Mi'n txi cyk'on cyibe tu'n cycub sbu'ne cyu'n xjal, porque na'nxtok tul Kajaw, nej che oquel ten xjal k'ojlel ti'j Dios, ex oc tyec'u tib ju xjal binchal ilxix, aju cxel tuj najen. 4Ate jlu c'oquel tzokpaj ti'j tcyakilju nno'c cyk'o'n xjal te cydios ex in che c'ulun xjal cywitz, ex c'oquel ten k'ojlel cyi'j; cbel ke' tuj tja Dios ic tza'n axte Dios, oc tma' ka ax Dioste. 5¿Minti'pe na'n cyu'ne, xi nma'ne jlu cyeye tej atinxtoke cyuc'ile? 6Ex bi'n cyu'ne ja'lo alcyeju in makonte te tu'n mi'n tyec'unjtz naj ja'lo, maxi ctzajel yec'un oc tpon tk'ijlalil. 7Porque aju tipumal mya ba'n in ak'nan tuj ewaj ja'lo, pero at jun in makonte te ja'lo. Octzun tel k'i'n aju in makonte, 8maxitzun c-yec'etel ju xjal binchal ilxix, pero cbeltzun byo'n jlu tu'n Kajaw tu'nju t-xew nne'tz tuj ttzi', ex bi'x cnajel tu'n t-spic'umal Kajaw oc tul. 9Tu'n Satanás tzul te xjal lu, aju binchal ilxix, nim tipumal ex oc tbincha' ke señ cyuc'ix tbinchben nim cyipumal, pero mya ax toc. 10Ex tu'nju tbinchben mya ba'n che bel t-sbu'n ke xjal, akeju tu'n cyxi' tuj najen tu'nju minti' cygan ti'j tu'n t-xi cyniman ju yol axix toc tu'n cyclet. 11Cyja'tzun, che xel ttzokpi'n Dios tu'n cysbunjtz tu'ntzun t-xi cyocsla'n ju nic'aj yol, 12tu'ntzun tcub cysentens cycyakil keju minti' ma txi cyocsla'n ju yol axix toc, nok o'cx in che tzalaj ti'j ju mya ba'n. 13Pero il ti'j tu'n t-xi kk'o'ne chjonte te Dios cyi'je, akeye erman c'ujla'n keye tu'n Kajaw, porque ma che jaw sc'o'ne tu'n Dios atxix t-xe tnejel tu'n cyclete, tu'nju ma che el pa'ne tu'n Xewbaj Xjan tu'n cyajbene o'cx te Dios, ex ma txi cyocsla'ne ju yol axix toc. 14Cyja'tzun e txconjtze tu'n Dios tu'nju tkanil colbil xi kma'ne cyeye, tu'ntzun cyc'monteye jun cyoclene ma'xix junx tuc'il Kajaw Jesucrist tuj tajwalil. 15Cyja'tzun erman, mi'n che yucche, cytzyumxixe ju xnak'tzbil aju ma bant cyu'ne, ka aju xi kma'ne cyeye ex ka aju xi ktz'ibane cyeye tuj u'j. 16Ma ko c'ujlanjtz tu'n Kajaw Jesucrist ex tu'n Kman Dios, ex ma k'ukbanjtz kc'u'j te jumajx tu'n, ex ma tzaj tma'n tu'n tke' kc'u'j ti'j jun ba'n tzul tk'o'n Dios ke nok tu'n t-xtalbil. 17Awt k'ukbante cyc'u'je, ex awt cyuwsante cyeye tuj tcyakil, tu'n cyyoline ba'n ex tu'n cybinchanteye ba'n.

will be added

X\