2 Tesalonicenses 1

1Akine Pablo, tuc'ix Silvano ex Timotey ate' wuc'ile, in xi ntz'ibane cyeye, akeye ocslal keye ti'j Kman Dios ex ti'j Kajaw Jesucrist, ate'ye tuj tnam Tesalónica. 2Awt Kman Dios tuc'ix Kajaw Jesucrist che tzaj k'onte xtalbil cyeye ex tu'n tke'xix cyc'u'je. 3Il ti'j cucx tu'n t-xi kk'o'ne chjonte te Dios cyi'je erman; tuj tumelxix jlu porque aju cyocslable cucx tch'iy ex cycyakile cucx tch'iy tc'ujlalil teyle junjun cyxolxe. 4Cyja'tzun ax ko'ye in ko tzalaje cyi'je, ex in xi kma'ne cye mastl ocslal etzan tu'n Dios tuj junjun tnam tza'n cytene, porque cucx tke' cyc'u'je ti'j Dios tuj tcyakil cybise ex yajbil cyeye. 5A jlu jun yec'bil ka ate Dios tz'aklxix ex in tbincha'n tcyakil tuj tumelxix, cyja'tzun ma tzaj tk'o'n Dios cyoclene tu'n cyocxe tuj tcawbil Dios, porque tu'n tlaj tcawbil Dios nnic'x cyu'ne. 6Porque tuj tumelxix ctzajel tk'o'n Dios yajbil cye keju in che yajlan cyeye, 7ex tuj tumelxix ctzajel tk'o'n Dios ojlabl cyeye, akeye in che yajlanjtze, tu'n cyojlane junx kuc'ile oc tyec'unte tib Kajaw Jesús, ctzajel tuj cya'j cyuc'ix ke t-anjel at nim cyipumal, ex in c'ant tkan k'ak' cyi'j. 8Tzul k'olte castiw cye keju cyc'i' tu'n cyojtzki'nte Dios, ex minti' in xi cyniman aju tkanil colbil tu'n Kajaw Jesucrist. 9Ctzajel k'o'n cycastiw jlu tu'n cynaj te jumajx, bi'x che elel k'i'n twitz Kajaw, mlay che ten twitz, tu'nju at nim tipumal ex in koptz'aj t-spic'umal. 10Ctzajel k'o'n cycastiw jlu tuj tk'ijlalil tzul, oc tul Jesucrist tu'n tjaw nimsa'n tbi cyu'n ke ocslal ti'j, ex oc che jawil labin cycyakil keju ma che ocslan ti'j, ax icx cyeye porque ma txi cyocsla'ne aju yol xi kchic'ba'ne cyeye. 11Cyja'tzun, cucx in ko na'ne Dios cyi'je tu'n ttzaj tk'o'n Dios cyipumale tu'n cybete tuj tumelxix twitz, porque ma che txconjtze tu'n, ex tu'n tjapun tcyakilju cyximbetze ba'n tu'n tipumal Dios, ex tu'n tjapun tcyakil ak'untl in cybincha'ne tu'n cyocslable, 12tu'ntzun tjaw nimset tbi Kajaw Jesucrist cyu'ne, icx cyeye tu'n cyjaw nimsa'ne tu'n tu'nju t-xtalbil Kdios ex tu'n t-xtalbil Kajaw Jesucrist.

will be added

X\