1 At jun k'ij tma David: ¿Atpe jun ma cyaj clet cyxol ke tiyjil Saúl, tu'n nbinchanteye xtalbil te tu'n tlaj ktzan Jonatán? 2 Attok jun cymajen ke tc'wa'l Saúl, Siba tbi, tzaj cytxco'n tu'n tul tuc'il David. Tejtzun tul Siba, xi tkanin rey David te: —¿Apeya Siba? —Lu kine lu te ajbel teya Tat Rey, chi Siba. 3 Atzunte rey xi tkanin te: —¿Atxpe jun tiyjil Saúl tu'n nbinchanteye xtalbil te ic tza'n xi ntziyane twitz Dios? Atzunte Siba xi ttzak'we'n: —At jun tc'wa'l ktzan Jonatán, cox cycabil tkan. 4 —¿Jatum ta'? Chi rey. —Max ta' tuj tnam Lodebar, tuj tja Maquir aju tcy'ajal Amiel, chi Siba. 5 Atzunte rey David xi tma'n tu'n ttzaj k'i'n. 6 Tejtzun tul Mefi-boset aju tcy'ajal Jonatán ex tal tchman Saúl twitz David, cub moc'e' te jun techal te nimbil. —Mefi-boset, chi David. —Lu kine lu ajbel teya, Tat Rey, chi Mefi-boset. 7 Xitzun tma'n David: —Mi'n xoba, porque oc nbinchaye ba'n teya tu'n nc'ujlalile ti'j ktzan tmana Jonatán. Tcyakilju ttx'otx' ktzan tchmana cyjel ten te teya ex ax cwa'la ti'j nmese. 8 Atzunte Mefi-boset cub muc'e' ex tma: —¿Tiku'n ma chin tzaj tna'na Tat Rey, akine tmajena? Porque tuj nwitze ic ntene ic tza'n jun cyimni tx'yan. 9 Tzajtzun ttxco'n rey ju xinak Siba tbi, aju ojtxi tmajen Saúl, ex xi tma'n te: —Ma txi nk'o'ne tuj tk'ab Mefi-boset, aju tal tchman ktzan tpatrona, tcyakilju etzan tu'n nej, cyuc'ix keju etzantok cyu'n ke tc'wa'l. 10 Cyja'tzun, aya cyuc'ix ke tc'wa'la ex ke tmajena che ak'nale ti'j ttx'otx'; ex cjawil tc'u'na tcyakil twitz awal, tu'ntzun cyc'a'chet ke tiyjil tpatrona; atzunte Mefi-boset aju tal tchman Saúl, ax cwa'l wuc'ile ti'j nmese, chi David. Atzunte Siba attok olaj tcy'ajal ex winkin tmajen. 11 Xi ttzak'we'n Siba te rey: —Tcyakilju ma tzaj tma'na weye Tat Rey cbantel wu'ne akine tmajena. Cyja'tzun, ate Mefi-boset ax o wa'n ti'j tmes David ic tza'n jun tc'wa'l rey. 12 Ax icx attok jun tal tc'wa'l Mefi-boset, tal ch'intok, Micaía tbi; ex cycyakil keju ate' tuj tja Siba in che ajben te Mefi-boset. 13 Ate Mefi-boset coxtok cycabil tkan, ex atzun najl tuj Jerusalén porque axtok in wa'n tuc'il rey ti'j tmes.
