2 SAMUEL 4

1Tejtzun tbinte Is-boset aju tcy'ajal Saúl ka otok cyim Abner tuj Hebrón, bi'xtzun tzaj baj tc'u'j te jumajx, ex cycyakil aj Israel tzaj nim cyxobil. 2Attok cabe xinak in che ajbentok te Is-boset, ex nejenel ke jlu cye txkan soldad elek' ke. Baana tbi jun, ex atzun juntl Recab tbi, tcy'ajal Rimón ke jlu aju aj Beerot, ex tiyjil Benjamín ke porque aju tnam Beerot toctok tuj cycwent ke tiyjil Benjamín, 3ex otok che ex ok ke xjal ate' tuj tnam Beerot tu'n cypon tuj Gitaim, ex atzun e najan ic tza'n betin xjal ke, ax icx ja'lo. 4Ex ate Jonatán aju tcy'ajal Saúl attok jun tcy'ajal, Mefi-boset tbi, ex coxtok ke tkan. Matok jwe' abk'i Mefi-boset tej ttzaj jun xjal tuj Jezreel k'malte tkanil ka otok che cyim Saúl tuc'ix Jonatán. Tzajtzun k'i'n Mefi-boset tu'nju xu'j cwentil te ex el ok tuc'il, pero tu'nju in kelan wen tej tel ok, el tz'ak Mefi-boset tu'n, ex tu'ntzun jlu bi'x oc te cox. 5Atzunte Recab tuc'ix Baana akeju tcy'ajal Rimón aju aj Beerot, e je'x tu'n cypon jatum ta' tja Is-boset, ex atzun e pon tuj or tej at nimtok ta'w cyak, ex matok in tan Is-boset tbajlen wa'n. 6Aju xu'j xk'ukil ttzi ja otok tz'oc ten saksal tuj triw, pero te tibajxi ic' tan, cyja'tzun tten e ocx Recab tuc'ix Baana aju terman, ex mi a'l jun o que'yinte cye. 7Tej cyocx tuj ja, lutok Is-boset in tan twi twatbil tuj cwart jatum in tan; cubtzun cybyo'n ex el cytx'emin twi', ex te tibajxi jlu xi cyi'n twi', ex tuj enter ak'bil e bet tuj be tuj lugar Arabá tbi, 8tu'ntzun t-xi cyk'o'n te David, tu'nju atzun ta'tok David tuj tnam Hebrón. Ex xi cyma'n te cyja': —Tat Rey, lu twi' Is-boset lu, aju tcy'ajal Saúl, aju aj k'oj ti'ja ex oc tilil tu'n tu'n tcyima tu'n. Pero ja'lo ma tzaj tk'o'n Kman ambil tu'n t-xelin tu'na ti'j Saúl, ex cyi'j ke tiyjil. 9Xitzun ttzak'we'n David cye: —Cxel nma'ne jun yol axix toc twitz Kman aju ma chin clete tu'n tuj tcyakil xobajil, 10tej tpon jun xjal wuc'ile, tuj twitz ka jun ba'n tkanil tu'n ttzaj tk'o'n weye, pon k'malte ka otok cyim Saúl, pero tu'nju tkanil lu bi'x tzyet wu'ne ex cub nbyo'ne tuj tnam Siclag. 11Tu'n jlu ax cbantel wu'ne cyi'je akeye binchal mya ba'n, tu'nju ma cub cybyo'ne jun xinak minti' til tej matok in tan tuj tex tja. Cyja'tzun cchjetel cyu'ne tu'nju ma cub cybyo'ne Is-boset. Che najele wu'ne tu'n mi'n cytentle twitz tx'otx'. 12Xitzun tk'o'n David orden cye keju at cyoclen ttxlaj, ex cyu'ntzun ke jlu e cub byo'n; el cytx'emin ke cyk'ab cyuc'ix ke cykan, ex e jaw cyyoban jatum ta' nintz pil tuj tnam Hebrón. Te tibajxi tzaj cyi'n twi' Is-boset ex cu'x cymaku'n tuj Hebrón, tujx tpantyón Abner.

will be added

X\