2 SAMUEL 24

1Tzaj juntl maj tk'oj Kman cyi'j aj Israel, oc tk'o'n il ti'j David tu'n tjaw ti'n cyajlal aj Israel ex aj Judá. 2Xitzun tma'n rey te Joab aju nejenel cye soldad, aju attok ttxlaj: —Txi'ya cyxol cycyakil c'loj cyiyjil aj Israel, tzajx ke' tu'na max tuj Dan tu'n tpon baj tuj Beerseba, ex k'in jawa cyajlal cycyakil tnam xjal, tu'ntzun tel nnic'e ti'j nic'pun xjal at. 3Atzunte Joab xi ttzak'we'n: —Tat Rey, awt Kman aju Tdiosa binchante tu'n tchmet mastl cybaj tnam xjal etzan tu'n, jun syent maj mas ic tza'n keju ate' ja'lo, ex cucxwit itz'xa Tat Rey tu'ntzun ttila; pero ¿titzun tajben teya tu'n tjaw jun cyajlal xjal? 4Masque icju, pero tu'nju mas at tipun tyol rey, o japun tu'n Joab ex cyu'n ke nejenel cye soldad aju xi k'ma'n cye. Cyja'tzun ate Joab cyuc'ix ke nejenel cye soldad e je'x tu'n tjaw cyi'n cyajlal tnam xjal aj Israel. 5E ic'x tuj nima Jordán ex atzun e cub ten nikayin ttxlaj tnam Aroer aju tcub tuj tmijil chk'ajlaj tumlal cytx'otx' tiyjil Gad ex tumlal tnam Jazer. 6Te tibajxi e je'x tuj Galaad ex tuj Cades, tuj cytx'otx' aj Hetey. E pon tuj Dan ex maxtzun tuj Dan e k'o'n welt tu'n cypon tuj Sidón. 7Te tibajxi e je'x tuj tnam Tiro ex cyuj cycyakil tnam cye aj Hevey ex cye aj Canaán, tu'n cycu'pun tuj tx'otx' Néguev aju at tuj tcwent Judá, ex max tuj Beerseba. 8Tbajlenxi cybetin tcyakil tx'otx' belaj xjaw tuc' winkin k'ij xi ti'n, ex te tibajxi e pontzun tuj Jerusalén. 9Xitzun tk'o'n Joab te rey aju tajlal otok jaw ti'n cyi'j tnam xjal, ex cyxol aj Israel o japun jun tajlal te wajxak syent mil xinak otok bant tu'n cyxi' tuj k'oj, ex cyxol aj Judá japun jun tajlal te jwe' syent mil xinak. 10El tnic' David ti'j ka ate at til ti'j tajlal otok jaw ti'n cyi'j tnam xjal, ex xi tma'n te Kman cyja': —Ma bant jun il ma'xix wu'ne tu'nju ma nbinchaye jlu. Pero in chin cubsane twitza Nman tu'n tcub tnajsa'na ja'lo aju il ma bant wu'ne, akine tmajena, porque ma nbinchaye jlu ic tza'n jun xjal minti' tnabl, chi David. 11Tuj juntl k'ij tej tjaw we' David, xi tma'n Kman te Gad aju t-sanjel, aju in ajbentok ttxlaj David: 12Txi'ya tuc'il David ex k'manxa te cyja': Ox castiw cbel nk'o'ne twitza, sc'on jawa jun cyxol ke jlu alcye tajbila tu'n nbinchanteye, chicuya te David, chi Kman. 13Xi'tzun Gad tuc'il David ex xi tkanin te: —¿Alcye ba'n tuj twitza: Ka tu'n ttzaj wuk abk'i we'yaj tuj cytx'otx' aj Israel, ka tu'n cyel oke ox xjaw cywitz aj k'oj cyi'je, ex ka tu'n ttzaj ox k'ij tx'u'j yabil cyxol aj Israel? Ximana ti'j ja'lo ex k'mantza alcye tzak'webl cxel nma'ne teju saj samante weye, chi Gad. 14Atzunte David xi ttzak'we'n: —Atine tuj jun bis ma'xix. Mas ba'n tu'n kcub tz'ake tuj tk'ab Kman, porque aju t-xtalbil ma'xix te, ex mya tu'n kcub tz'ake tuj cyk'ab xjal. 15Te prim ax k'ij lu tzaj t-sama'n Kman tx'u'j yabil cyibaj aj Israel; o ten ox k'ij ic tza'nx banimaj ti'j, tzajx ke' tuj Dan ex tejxi tpon baj max tuj Beerseba e cyim 70 mil xjal. 16Ex tej cyja'tok tnaj tnam Jerusalén tu'nju anjel, tzaj tbis Kman tu'n tlaj otok che cyim nim xjal ex xi tma'n teju anjel in che najtok tnam xjal tu'n: Acux jlu, ya mi'n che cub tbyo'na mastl xjal. Tujxju or lu otok pon t-anjel Kman ttxlaj lugar jatum nne'l ttxc'omil triw tu'nju xjal Arauna tbi, aju aj Jebusey. 17Ex tej ttil David aju anjel in c'ixbisantok cye tnam xjal, xitzun tma'n te Kman: —Akine ma chin binchan il. Akine at wile. Atzun ke xjal lu minti' cyil. In chin cubsane twitza tu'n tcub tz'ak ju castiw lu tu'na wibaje ex cyibaj keju ate' tuj njaye. 18Tujx k'ij lu xi' Gad tuc'il David, ex xi tma'n te tu'n tjaw tbincha'n jun altar te Kman tuj lugar jatum nne'l ttxc'omil triw tu'n Arauna aju aj Jebusey. 19Xi'tzun David binchalte aju otok tma Gad, ic tza'nx otok tzaj tma'n Kman. 20Atzunte Arauna o til tej cyja'tok t-xi' rey cyuc'ix ke xjal at cyoclen ttxlaj tu'n tpon jatum ta'tok. Tzajtzun Arauna canul ti'j rey, cub ẍmeje' twitz tejxi tpon tacl tibaj twitz twitz tx'otx', 21ex xi tma'n: —Tat Rey, ¿ti ma tzaja lolte wuc'ile akine tmajena? Xi ttzak'we'n David: —Waje tu'n tcyaj nlak'one teya aju lugar jatum nne'l ttxc'omil triw tu'na, tu'n tjaw nbincha'ne jun altar te Kman tu'ntzun twe' tx'u'j yabil cyi'j tnam xjal. 22Atzunte Arauna xi ttzak'we'n: —Tat Rey, tzyuma nok alcye ba'n tuj twitza ex k'onxa ke oyaj te Kman. Lu ke tor ate' tzalu tu'n cyajben te oyaj patun tu'n cycub, ex ke tze' in che ajben te k'ibl ttxc'omil triw ex ke yuw jacu che ajben te si'. 23Tcyakil jlu jacu txi nk'o'ne teya Tat Rey, chi Arauna. Ax icx xi tma'ntl: —Txi'wt tc'mo'n Kman aju Tdiosa aju chojbil cxel tk'o'na. 24Atzunte rey xi ttzak'we'n: —Chjonte teya tu'n jlu, pero ctzajel nlak'o'ne tcyakil teya ex cchjetel wu'ne ic tza'nx twi', porque mlay txi nk'o'ne te Kman Dios ke oyaj patun tu'n cycub, ka mya lok'aj otok tzaj wu'ne. Cyja'tzun tten o lak'et tu'n David aju lugar lu ex cyuc'ix ke tor tu'n 50 sak pwak, 25ex atzun jaw tbincha'n jun altar te Kman ex e je'x tk'o'n ke oyaj patun in che cub ex ke chojbil te mojbabl tibil. Tzajtzun tbi'n Kman aju tna'j Dios David cyi'j tnam xjal, ex atzunju tx'u'j yabil bi'x we' cyxol aj Israel.

will be added

X\