2 SAMUEL 22

1Xi tbitzan David ju bitz lu te Kman, tej tclet tu'n tu'n mi'n tcub tz'ak tuj tk'ab Saúl ex tuj cyk'ab cycyakil aj k'oj ti'j. 2Ex tma: Nman, aya colol wi'je, aya jun lugar te colbil wibe, ex tzokpilte weye. 3Aya Ndiose ic ttena te weye ic tza'n jun pic in chin clete tu'n, ic ttena te weye ic tza'n jun makbil in ajben tuj k'oj, ex tu'nju nim tipumala in chin clete. Ic ttena ic tza'n jun ewbil wibe, ex ic tza'n jun colbil wibe cyuw tten. Aya colol weye, o chin clete tu'na tuj cyk'ab aj k'oj wi'je. 4Aya Nman, ba'n tu'n tjaw nimset tbiya; oc in chin txocone ti'ja in chin clete tu'na tuj cyk'ab aj k'oj wi'je. 5Tuj nwitze mer ic tza'n otok chinx mulk'aje tuj a' tu'n camic; tzaj nxobile tej cyja'tok nnaje mer ic tza'n tu'n tipumal txkan a'. 6Mer ic tza'n otok chin cub xwacune tu'n sakbak tu'n ncyime; ex mer ic tza'n otok chin tzyete tu'n c'obil te camic. 7Tej in chin bisuntoke in oc tene txcolte Kman, xi nkanine onbil te Ndiose ex in tzaj bi'ne tu'n max tuj tja; pon tk'ajk'ajel nwi'ye tuj t-ẍcyin. 8Tzajtzun jun nintz cyaknajnab twitz tx'otx' ex e tzaj yucch ke tk'ukbil cya'j; bi'x e baj yucch tu'n ttx'u'jil Kman. 9Etz sib tuj ttxa'n, atzun tuj ttzi' etz jun k'ak' in baj tz'e'y nimcu tu'n; ax icx etz xk'a'l tuj ttzi' in c'ant wen. 10Jaket twitz cya'j tu'n ex cu'tztzun, cub we' tibaj txkan k'ek muj attok tjak' tkan. 11Jax ten tibaj jun querubín ex tzaj lipan; tibaj cyk'ik' tzaj lipan. 12Ocx tewan tib tuj klolj ex tuj k'ek muj nojni tu'n a'. 13Twitz etz jun spic'un in koptz'aj wen; tzaj tkan k'ancyok ic tza'n xk'a'l in c'ant. 14Ate Kman aju ma'xix toclen in binjtz tk'ajk'ajel twi' max tuj cya'j in julin wen: 15e tzaj t-xo'n ke plech tuc'ix tkan k'ancyok, atzun ke aj k'oj wi'je bi'x e jel ok tu'n, ex bi'x baj cysputun cyib. 16Bi'x k'ancha'lin aju t-xe'pun mar ex ke tk'ukbil tx'otx' tu'n tk'ajk'ajel twi Kman puro cyuw wen, ex tu'nju cyuwxix tzaj t-xupin. 17Max tuj cya'j tzaj tnukpi'n Dios tk'ab wi'je, ex tu'n tk'ab in jatze tuj nintz mar. 18Ma chin clete tu'n tuj cyk'ab aj k'oj wi'je, akeju in el ic'une cyu'n ex at mas cyipun nwitze. 19E oc tzokpaj wi'je tej atintoke tuj yajbil, pero ate Kman tzaj oninte weye. 20In tzokpete tu'n, tu'n ntene tuj jun chk'ajlaj ma' twitz; in clete tu'n, tu'nju at tc'ujlalil wi'je. 21Ma tzaj tk'o'n Kman chojbil weye tu'nju tz'aklxix kine ex tu'nju minti' npaltile twitz, 22ex tu'nju cucx nbete tuj tbe Kman ex mi jun maj ma tz'el npa'n wibe ti'j. 23Cucx in chin ximane cyi'j ke tmandamyent, ex mi jun maj ma tz'el wic'une tley. 24Ma chin tene twitz minti' npaltile; ma tz'el npa'n wibe ti'j ju mya ba'n. 25Ma tzaj tk'o'n Kman chojbil weye tu'nju tz'aklxix kine ex tu'nju minti' npaltile twitz. 26Aya Nman, in japun tyola tuc'il ju xjal in japun tyola tu'n, ex tz'aklxixa tuc'il ju xjal tz'aklxix. 27Puro ba'na tuc'il ju xjal sak tuj tanmi, pero ax cyuwa ti'j ju xjal elni twitz tu'n t-sbun. 28Tu'na in che clet ke xjal mans, atzun keju in jaw cyniman cyib, toc tcwenta cyi'j ex in tzaj mya ba'n cyibaj tu'na. 29Nman, aya in tzaj k'onte spic'un weye; Nman Dios, tu'na in tzaj tk'o'na spic'un tuj klolj jatum atine. 30Tu'nju onbil tu'na chin oquel tzokpaje cyi'j aj k'oj wi'je, ex chin oquexe twi muro toc ti'jele cytanmi. 31Aju be te Dios tz'aklxix te, ex minti' tpaltil tyol; ate Dios colol cye cycyakil keju in ke' cyc'u'j ti'j. 32O'cx jun Dios at, aju Kman, ex o'cx a Dios jacu ko clet tu'n. 33Ate Dios in tzaj k'onte wipune, ex a onil weye tu'n ntene minti' npaltile. 34A in tzaj k'onte tipumal nkane tu'n tbant nkelane ic tza'n jun masat, ex a in jax k'inte weye twi' jun lugar ma'xix tjaw jatum tu'n ntene segurxix; 35A in tzaj k'onte xnak'tzbil weye tu'n tbant nk'ojine, ex a in tzaj k'onte wipune tu'n tli'pj ti'j xobl plech wu'ne, aju k'an c'uxbil ttx'otx'il. 36Aya in colin wi'je, ex in chin clete tu'na; tu'n t-xtalbila tcyakil ba'n ma tz'el weye. 37Ba'n ma tz'el nbeye tu'na, ex bajx che ex jilj ke nkane. 38Inx lpe'ye cyi'j aj k'oj wi'je ex e naj wu'ne, ex maxi in ajtz meltz'aje tejxi cycub baj wu'ne. 39Bi'x e cub baj, ex paẍu'n e oc wu'ne. Ya minti' e jaw we'tl; e cub tz'ak tjak' nkane. 40Aya tzaj k'onte wipumale tuj k'oj; o tbinchaya tu'n cycub ẍmeje' nwitze ke aj k'oj wi'je. 41Tu'na e je'l ok ke aj k'oj nwitze; cyja'tzun e naj wu'ne akeju e el ic'unte weye. 42E kanin onbil, pero mi jun o onin cyi'j; e cubsan twitz Kman, pero minti' e tzaj tzak'we'n tu'n. 43Bi'x e cub naj wu'ne mer ic tza'n tkukil tx'otx'. E baj nwabane mer ic tza'n tx'otx' tuj cay. 44Ma chin clete tu'na tej cyk'ojin ke nxjalile wi'je, ma chin tene tu'na te nejenel cyibaj ke nasyon, ke xjal minti' ojtzki'n wu'ne in che ajben weye. 45Oc in chin binjtze cyu'n, in chinx cyniman; ex in chin cub bi'ne cyu'n ke stranjer xjal. 46Ke stranjer xjal in tzaj tchi cyi'j ex in che lu'lun oc cyetz tuj lugar te cycolbil cyib. 47Itz'te Kman. Cxel nk'o'ne chjonte te tu'nju a Colol wi'je. Jawxwit nimsa'n tbi Dios aju clol weye ex colol wi'je. 48Atzunju Dios ma k'onte t-xel cyi'j aj k'oj wi'je, ex ma che cyaj tk'o'n ke tnam tjak' ncawbile. 49Ate Kman ma clon weye cye aj k'oj wi'je, akeju jaw cyi'n cyib tu'n cyk'ojin wi'je. 50Cyja'tzun in jaw nnimsa'ne tbiya cyxol ke nasyon, ex in chin bitzane te nimbil tbiya. 51In tzaj tk'o'na tipumal ju rey sc'o'maj tu'na tu'n tcub cyi'j aj k'oj tu'n; cucx in tbincha'na xtalbil te David ex cye ke tiyjil.

will be added

X\