2 SAMUEL 20

1Attok jun xinak puro mya ba'n, tiyjil Benjamín, Seba tbi, ex tcy'ajal Bicri, attok tuj Gilgal. Oc tk'ajtza'n Seba chun tu'n cybinte tnam xjal, ex xi tma'n cye cyja': Minti' koclen ex minti' ketzbil tuc'il David aju tcy'ajal Isaí. Akeye aj Israel, ba'n tu'n cyaje cyjaye cycyakile. 2Cycyakiltzun ke xinak aj Israel cyaj colin David cyu'n, tu'n cyxi lpe' ti'j Seba aju tcy'ajal Bicri. Atzun cye aj Judá, xi'ynix ttzi nima Jordán ponin baj max tuj Jerusalén, cucx e oc lpe' ti'j cyrey. 3Tejtzun taj meltz'aj David tuj tja ma tuj Jerusalén, e tzaj ti'n keju laj t-xu'jil akeju otok che cyaj tk'o'n xk'ukil tja, ex e ocx tk'o'n tuj juntl ja ex e oc tk'o'n xjal te cwentil cye. Cucx e oc tcwentin rey ke xu'j lu, pero minti' cub tmojban tib cyuc'il. Cyja'tzun e cyaj tlamo'n ke ex e ten ic tza'n meba xu'j ke tejxi cycyim. 4Te tibajxi xi tma'n rey te Amasa cyja': —Txcontza ke xinak aj Judá, ex tuj ox k'ij ja'lo bix tzula tzalu cyuc'ix ke xjal tuc'ila. 5Xi'tzun Amasa chmolte cye aj Judá, pero mas nim tyemp ten ic tza'nju otok bant ti'j. 6Xitzun tma'n David te Abisai: —Ate Seba cbantel mas mya ba'n ki'j tu'n ic tza'n te Absalón. Cyja'tzun k'inxa ke nsoldadiye ex lpexa ti'j tu'ntzun mi'n tocx tclon tib cyuj ke tnam toc muro cyi'j, ex tu'n jlu jacu txi tzokpaj ku'n. 7Ke xinak ate' tuc'il Joab, cyuc'ix ke aj Seretey ex ke aj Peletey akeju xk'ukil tja rey, ex cyuc'ix ke soldad cyuw cyc'u'j tuj k'oj, e etz tuj Jerusalén tuc'il Abisai tu'n cyoc lpe' ti'j Seba. 8Tej ch'ixtok cypon nikayin jatum ta' nintz pic at tuj Gabaón, etz Amasa canul cyi'j. Ate Joab toctok t-xbalun in ajben tuj k'oj; te ti'jxi tocsa'n jun c'albil tc'u'j, ex toctok jun spad tc'u'j xi'yni tuj tjayil. Tej t-xi lak'e' Joab tuc'il Amasa, jatz tz'ak t-spad tuj tjayil, 9ex tzaj tzyu'n Amasa ti'j t-xmatz tu'n Joab tu'n tbank'ab tu'n tel ttz'uban twitz, ex xi tkanin te: —¿Ba'npe ta'ya erman? 10Atzunte Amasa minti' oc tk'o'n tcwent ti'j spad k'i'ntok tu'n Joab tuj tk'ab. Jurattzun xi t-xayu'n Joab ju spad tuj tc'u'j, ex bi'x e cub tz'ak cycyakil ke tuj tc'u'j twitz tx'otx'. Minti'tl xi' Joab bantzalte, porque tu'n jlu bi'x o cyim. Atzunte Joab tuc'ix Abisai aju terman, e ic' tu'n cyxi lpe' ti'j Seba aju tcy'ajal Bicri, tu'n tcub ti'j cyu'n. 11At jun cyxol ke t-soldad Joab cub we' ttxlaj t-ximlal Amasa ex xi tma'n cyja': —Alcye tk'on tib tuc'il Joab ex tuc'il David, lpextzun ti'j Joab. 12Pero ate Amasa tcubsa'ntok t-ximlal tuj be ex nojni ti'j tu'n chic'; ex tej ttil soldad ka cycyakil xjal in che cub we' ti'j, ic'x ti'n t-ximlal Amasa ttxlaj be ex ic'x tmaksi'n tibaj tu'n jun xbalun, porque o til cycyakil xjal in che pon ax e cub we' que'yilte. 13Te tibajxi, tej tic'len k'i'n tuj be, e ic'tzun cycyakil keju in che bettok tuc'il Joab tu'n cyxi lpe' ti'j Seba, tu'n tcub ti'j cyu'n. 14Ate Seba ic' tuj cytx'otx' cycyakil cyiyjil aj Israel tejxi tpon max tuj tnam Abel-bet-maaca, ex cycyakil keju tiyjil Bicri baj cychmon cyib ex e ocx lpe' ti'j tuj tnam. 15Tejtzun cypon ke xinak uc'in tu'n Joab tuj tnam Abel-bet-maaca, oc cyjocun tx'otx' ti'j muro te ti'jxi tu'ntzun cyocx tu'n cyoc tzokpaj ti'j tnam, ex tu'n cycyakil o cyajbe tu'n tcub cyxitun muro. 16Attok jun xu'j at tnabl etz sch'in tujxi muro ex tma cyja': —Cybinchame xtalbil, chin cybintze. Chin cybintze. Cyk'manxe te Joab tu'n ttzaj lak'e' porque waje tu'n nyoline tuc'il. 17Tejtzun tpon lak'e' Joab, xi tkanin xu'j te: —¿Apeya Joab? —Akine, chi Joab xi ttzak'we'n. Xitzun tma'n xu'j te: —Bintza ke nyole, akine ajbel teya. —Jacu txi nbi'ne, chi Joab xi ttzak'we'n. 18Tzyettzun tyolin xu'j ex tma: —Ojtxi attok jun yol in k'manjtz cyja': Ka at jun taj tu'n tbinte jun ti'xti, ba'n tu'n txi tkanin tuj tnam Abel. Ex cyja'tzun in bant ti'j jun ti'xti. 19Aju ktanmiye, atzun jun tnam miban k'ojin ex tz'aklxix cyxol aj Israel, ex ma' toclen. Masque icju, atzun teya taja tu'n tcub t-xituna. ¿Tiku'ntzun tajbila tu'n tnaj aju tnam etzan tu'n Kman? 20Xitzun ttzak'we'n Joab: —Minti' in chin ximane ti'j jlu. Mya we nximbetz tu'n tcub nxitune ex mi tu'n tnaj. 21Mya icju, nok tu'nju at jun xinak najl tuj tiwitz tx'otx' cye aj Efraín, Seba tbi, aju tcy'ajal Bicri, ma jaw ti'n tib ti'j rey David. K'ontza o'cx ju xinak lu weye, ex jacutzun chin el lak'e'ye ti'j tnam, chi Joab. —Jacu tz'ex kxo'ne twi' teya max twi muro, chi xu'j xi ttzak'we'n te Joab. 22Xi'tzun xu'j yolil tuc'il nabl cyuc'il cycyakil xjal tuj tnam, ex el cytx'emin twi Seba ex ex cyxo'n te Joab. Xitzun tma'n Joab tu'n toc k'ajtza'n chun tu'n cyel lak'e' xjal, ex e je'ltzun lak'e' ti'j tnam, ex teyle junjun aj tja, atzunte Joab aj meltz'aj tuj Jerusalén tu'n tyolin tuc'il rey. 23Ate Joab nejenel cye cycyakil soldad aj Israel, atzunte Benaía aju tcy'ajal Joiada, atzun nejenel cye aj Seretey ex aj Peletey akeju xk'ukil te rey. 24Atzunte Adoram nejenel tuj ak'untl in che oc lajwersin xjal ti'j tu'n tbant, ex atzunju aj tz'ibal te rey, atzun Josafat aju tcy'ajal Ahilud. 25Atzunte Seva juntl aj tz'ibal, ex ate Sadoc tuc'ix Abiatar pal ke. 26Atzunte Ira aju aj Jair ax icx in ajben te pal te David.

will be added

X\