2 SAMUEL 2

1Te tibajxi jlu xi tkanin David te Kman ex tma: —¿Ba'npe tu'n nxi'ye tuj jun tnam cyxol ke tnam ate' tuj Judá? Atzunte Kman tzaj ttzak'we'n: —Ba'n tu'n t-xi'ya. Atzunte David tma: —¿Jatum chin pole? Atzunte Kman tzaj ttzak'we'ntl: —Txi'ya tuj Hebrón. 2Xi'tzun David cyuc'ix cabe t-xu'jil: Ahinoam tbi jun ex atzun tzajni tuj tnam Jezreel, atzun juntl Abigail tbi, aju t-xu'jilben ktzan Nabal aju aj Carmel. 3Ax icx e je'x ti'n ke tuc'il cyuc'ix keju ate' tuj cyja, ex axtzun e ten cyuj ke tnam nikayin ate' ti'j tnam Hebrón. 4E pontzun ke xjal aj Judá tuc'il David ex oc cyk'o'n toclen te rey tuj Judá. Tejtzun tbinte David otok cu'x maku'n Saúl cyu'n aj Jabes aju tnam at tuj tx'otx' Galaad, 5xi t-sama'n junjun sanjel k'malte cye: Awt Kman cy'iwlante cyeye tu'nju ma cybinchaye xtalbil ti'j Saúl aju cyreye, tu'nju ma cu'x cymaku'ne. 6Ex awt Kman k'onte xtalbil cyeye ex cucx tu'n tjapun tyol cyuc'ile. Ax icx weye oc nbincha'ye ba'n cyeye tu'nju ma cybinchaye ba'n ti'j cyreye. 7Ja'lo tenx cyipune ex mi'n che xobe, masque ma cyim Saúl aju cyreye, pero ma tz'oc k'o'n woclene cyu'n aj Judá tu'n woque te cyrey. 8Pero ate Abner aju tcy'ajal Ner ex nejenel cye t-soldad Saúl tzaj ti'n Is-boset aju tcy'ajal Saúl, ex xi ti'n tuj tnam Mahanaim, 9ex atzun oc tk'o'n toclen tu'n toc te rey cyuj ke tx'otx' lu: Galaad, Gesuri, Jezreel, Efraín, Benjamín ex cye cycyakil aj Israel. 10Otok japun Is-boset twi' 40 abk'i tej ttzyet tcawin cyibaj aj Israel ex o cawin cab abk'i. Atzun cye tiyjil Judá, tocsa'ntok David cyu'n te rey, 11cyja'tzun tten oc David te rey cye aj Judá tuj wuk abk'i tuc' mey, ex aju tnam jatum o cawin, atzun Hebrón. 12Etztzun Abner aju tcy'ajal Ner tuj tnam Mahanaim tu'n tpon tuj tnam Gabaón, nejni cywitz t-soldad Is-boset aju tcy'ajal Saúl. 13Ax icx te Joab aju tal Sarvia, cyuc'ix t-soldad David e etz tuj tnam Hebrón, ex atzun oc cyc'ulban cyib cyuc'il, ttzi' nintz tanc te chmobl a' tuj Gabaón. Ex cycabil c'loj soldad ax e cub we' jatum chmo'n a', jun c'loj cub ten tuj jun pac' ex juntl c'loj aj ten tuj juntl pac'. 14Xitzun tma'n Abner te Joab: —E cyetz junjun cu'xun tu'n cyk'ojin kwitz kcyakil. —Ax ba'n, chi Joab xi ttzak'we'n. 15Cyja'tzun, akeju tu'n cyk'ojin te cyxel aj Benjamín ex te Is-boset aju tcy'ajal Saúl, e je'tz cablaj xinak cyxol, ex cablaj e je'tz cyxol ke t-soldad David. 16Teyle junjun tzaj ttzyu'n aju taj k'oj ti'j ti'j ttzmal twi' ex xi cyxayu'n cyspad tuj cyxu'c cyaj k'oj cyi'j; cyja'tzun e cyim cycyakil. Tu'n jlu, aju lugar at tuj Gabaón oc tbi Cojbil jatum oc k'oj tu'n spad. 17Cyuwxix aju k'oj oc tuj k'ij lu, ex ate Abner cyuc'ix ke soldad cye aj Israel cub cyi'j cyu'n ke t-soldad David. 18Ex ate'tok ox tal Sarvia ma chixin: Joab, tuc'ix Abisai ex tuc'ix Asael. Ate Asael cyuwxix ojkelan wen, mer ic tza'n ojkelan jun masat tuj cojbil, 19oc lpe' ti'j Abner ex minti' xi tk'o'n ambil tu'n tcolpaj. 20Ex tej taj tque'yin Abner ti'jxi, xi tma'n te: —¿Myapetzun aya Asael? —Ax toc akine, chi Asael xi ttzak'we'n. 21Xitzun tma'n Abner te: —Mi'n tz'oc lpe'tla wi'je. Mejor tzyuma jun cye keju cu'xun ex k'inxa tcyakilju k'i'n tu'n. Pero minti' cub tuj twitz Asael tu'n mi'n toc lpe' ti'j. 22Cyja'tzun xi tma'n Abner juntl maj te: —Mi'n tz'oc lpe'tla wi'je, ex katzun taja tu'n tnaja wu'ne. Nok o'cx, ¿chi toc wu'ne cxel nma'ne te termaniya Joab ka ma cuba wu'ne? 23Tu'nju minti' cub tuj twitz Asael tu'n tel tpa'n tib ti'j, xitzun t-xayu'n Abner t-xe lans tuj tc'u'j, ex bi'x elpun ttzal ti'j, ex axtzun cub tz'ak Asael ex cyim ma chixin. Ex cycyakil keju e pon tuj lugar jatum otok cyim Asael, e cub we' que'yilte. 24Atzunte Joab tuc'ix Abisai e je'x lpe' ti'j Abner. Nok nne'xcu k'ij tej cypon twi' tal witz Amma aju tcubsa'n tumlal twitz lugar Gía, tuj ju be in xi' tuj tzkij tx'otx' te Gabaón. 25Maxtzun ma chixin oc cychmon cyib ke soldad tiyjil Benjamín tuc'il Abner, ex junxtzun e ela ex e cub ten twi' jun witz. 26Xitzun sch'i'n Abner ti'j Joab ex tma: —¿Jtoj ban t-xi cycoline tu'n cycub cybyone ke xjal? ¿Na'nxpetzun tel tnic'a ti'j, ate jlu nok bis in tzaj ti'n? ¿Jtoj ban t-xi tma'na cye ke t-xjalila tu'n mi'n cyxi lpe'tl cyi'j ke cyerman? 27Xitzun ttzak'we'n Joab: —Cxel nma'ne jun yol teya axix toc twitz Dios, nokwit minti' ma tmaya jlu, mawtlo che'x lpe' ke nxjalile cyi'j ke cyerman ocxi tcub k'ij. 28Xitzun tma'n Joab tu'n cyoc k'ajtza'n ke chun, ex cycyakiltzun xjal e we' ex minti' e oc lpe'tl cyi'j aj Israel tu'n cyk'ojin cyi'j. 29Atzunte Abner cyuc'ix ke xinak uc'in tu'n, o che bet tuj enter ak'bil tuj chk'ajlaj at tuj Arabá, ex e ic'x tuj nima Jordán ex tuj tcyakilju tkan xak Bitrón, ex e pon tuj tnam Mahanaim. 30Minti'tl xi lpe' Joab ti'j Abner. Oc tchmo'n cycyakil ke t-soldad, ex tejtzun tjaw list cyi'j, otok che cyim belajlaj xinak t-soldad David ke, ex part te Asael. 31Ex atzun ke t-soldad David otok che cub cybyo'n 360 xinak aj Benjamín, akeju ate'tok tuc'il Abner. 32Atzunju t-ximlal Asael xi k'i'n tuj Belén, ex atzun cu'x maku'n ma chixin tuj tpantyón ktzan tman. Atzunte Joab cyuc'ix ke xinak uc'in tu'n e bet tuj enter ak'bil lu, ex tej tcub k'ij otok che pon tuj tnam Hebrón.

will be added

X\