2 SAMUEL 19

1Tejtzun cybinte xjal ka in ok'tok rey ex in bisuntok tu'n tlaj otok cyim Absalón aju tcy'ajal, e je'xtzun k'malte te Joab. Cyja'tzun, aju tzalajbil tej tcub cyi'j aj k'oj tuj k'ij lu oc te bis. 3Tuj ewaj e ocx ke soldad tuj tnam, in che ch'ixwi mer ic tza'n otok che el ok tuj k'oj. 4Atzunte rey oc tmaksi'n twitz ex jaw tk'ajk'ajel twi' cyuw wen: Ay nc'wa'l Absalón, ay nc'wa'l Absalón, nc'wa'l Absalón. 5Xi'tzun Joab tuj tja rey ex xi tma'n te: —Ja'lo ma che el ke ajbel teya tuj cych'ixwi tu'na, Tat Rey, akeju ẍe clonte teya cyuc'ix ke tcy'ajala, ke tme'jela ex ke t-xu'jila. 6Matzun tyec'uya ja'lo ka minti' taja cyi'j ke nejenel cye t-soldadiya ex ke xjal ma' cyoclen ate' ttxlaja, porque c'ujla'n tu'na keju in che ic'un teya, ex ic'un tu'na keju in che c'ujlan teya. Matzun tz'el nnic'e ti'j ja'lo Tat Rey, mas ba'n te teya nokwit itz'x Absalón, ex masque kcyakile otok ko cyime. 7Txi naja ja'lo Tat Rey, ex k'ukbanxa cyc'u'j ke xjal lepchke'c ti'ja, porque ka mi'n, cxel nma'ne teya jun yol axix toc twitz Kman, tuj konic'an ja'lo mi jun xjal cyjel ten tuc'ila. A jlu, masxix mya ba'n c'elel te teya twitz tcyakilju mya ba'n o tzaj ti'ja tej atxix cu'xuna ex asta ja'lo, chi Joab. 8Jawtzun we' rey ex xi' tu'n tcub ke' ttzi tpwertil tnam. Tej t-xi k'ma'n cye cycyakil xjal ka k'ukltok rey ttzi tpwertil tnam, e je'xtzun cycyakil tuc'il rey. Atzun cye soldad aj Israel cycyakil otok che aj ok cyja. 9Ex cycyakil c'loj cyiyjil aj Israel in che yolintok ti'j ex in cyma'ntok: Tu'n rey David o ko clet tuj cyk'ab aj Filistey ex tuj cyk'ab aj k'oj ki'j, pero nok tu'n tlaj Absalón ma tz'ex ok tzalu tuj ktanmi. 10Atzunte Absalón aju otok tz'oc kk'o'n te krey ya ma cyim tuj k'oj. ¿Ti in baj ke? ¿Tiku'n mi'n sajtz kxmoxin rey David kuc'il? Che chi. 11Pon tkanil max tuj tja rey David ti'j tcyakilju yol in che yolin aj Israel ti'j. Atzunte rey David xi t-sama'n jun xjal k'malte cye pal Sadoc ex Abiatar: Che yoline cyuc'il ke cytijil xjal tuj Judá ex cykaninxe cye tiku'n na'nx ttzaj cyma'n weye tu'n waj meltz'aje tuj njaye, porque cycyakil mastl c'loj cyiyjil aj Israel ma tzaj cyma'n weye tu'n waj meltz'aje. 12Cymanxe cye ka mya tuj tumel tu'n ake tu'n cycyaj ten te mancbil tu'n cymante jun yol tu'n waj meltz'aje, porque ax kerman ke kib cyuc'il, chi David. 13Ax icx xi tma'ntl tu'n t-xi cyma'n te Amasa cyja': Chi rey in tma'n teya: Ax wermaniya, cyja'tzun aya c'oquel te nejenel cye nsoldadiye te t-xel Joab. Katzun mi'n ma japun wu'ne icju, cubwit ncastiwoye cyuwxix wen tu'n Dios. 14Cyja'tzun tten cub ti'j cynabl cycyakil aj Judá ex cycyakil xjal lu oc junx cyximbetz, xitzun cysama'n tkanil te rey tu'n tajtz meltz'aj cyuc'ix cycyakil ke t-soldad. 15Cubtzun be tu'n rey ex ajtz meltz'aj ex ul ttzi nima Jordán. Atzun cye aj Judá pon cychmon cyib tuj Gilgal tu'n cyxi' canul ti'j ex te onilte tu'n tic'tz tuj nima Jordán. 16Ax icx te Simei aju tcy'ajal Gera, aju tiyjil Benjamín ex aj Bahurim, tzaj naj ex cubil cyuc'il aj Judá tu'n t-xi' cyuc'il c'molte rey David, 17uc'in jun mil xjal tiyjil Benjamín tu'n. Atzunte Siba aju cymajen ke tiyjil Saúl, tuc'ix olaj tcy'ajal ex winkin tmajen uc'in tu'n, otok pon nej tej tpon David. 18Ic'xtzun Siba tuj xajbil a' tu'n tonin cyi'j keju ate' tuj tja rey David, tu'n cyic'tz tuj nima ex tu'n tbant tu'n nok alcye ctzajel tma'n rey te. Tej cyja'tok tic'tz rey tuj nima Jordán, cub mutze' Simei twitz, 19ex xi tma'n te: —In chin cubsane twitza Tat Rey tu'n mi'n ttzaj tna'na npaltile, ex tu'n mi'n ttzaj tna'na wile, aju o nbinchaye twitza tej tetza tuj Jerusalén. Mi'n tzaj tlo'ch tc'u'ja wi'je, 20porque ma tz'el nnic'e ti'j, akine at npaltile, ex tu'ntzun jlu akine ma chin ul neje canul ti'ja, cywitz cycyakil ke tiyjil José, chi Simei. 21Atzun te Abisai aju tal Sarvia tma: —¿Myapetzun il ti'j tu'n tcyim Simei tu'nju tzaj tkanin castiw tibaj rey sc'o'maj tu'n Kman? 22Atzunte David xi ttzak'we'n: —Minti' cyoclene ti'j jlu akeye tal Sarvia. ¿Tiku'n in che oc meltz'aje wi'je? Ja'lo ba'n wu'ne akine rey cye aj Israel, cyja'tzun mi jun aj Israel cnajel tuj k'ij lu. 23Te tibajxitzun o yolin rey tuc'il Simei, ex xi tma'n jun yol axix toc te ka minti' tu'n tcyim. 24Ax icx te Mefi-boset aju tal tchman Saúl tzaj canul ti'j rey. Atxix tej tetzlen rey ex tejxi tpon meltz'aj tcublenxi cyi'j ke aj k'oj tu'n, na'nxtok tel ttx'jo'n Mefi-boset ti'j tkan mi ti'j t-xbalun, ex na'nxtok tel tmatzo'n ttxa'n t-xmatz tu'n tlaj tbis. 25Tej tul canul ti'j rey tuj Jerusalén xi tma'n rey te: —Mefi-boset ¿tiku'n minti' xi'ya wuc'ile? 26Atzunte xi ttzak'we'n: —Tat Rey, in cub sbu'ne tu'n nmajene. Tu'nju cox kine, xi nma'ne te tu'n toc tk'o'n t-siy jun bur tu'ntzun njaxe chejil tibaj tu'ntzun nxi'ye tuc'ila, 27pero aju nmajene nok ma nic'an yol wi'je twitza. Masque icju, pero aya Tat Rey ic ttena ic tza'n jun t-anjel Dios, ex binchama nok alcye ba'n tuj twitza. 28Masque cycyakil wermaniye iltok ti'j tu'n kcyime tu'na Tat Rey, pero akine tmajena in txconjtze tu'na ax tu'n nwa'ne tuc'ila ti'j tmesa. Ya minti'tl mas tu'n t-xi nkanine teya Tat Rey, chi Mefi-boset. 29Atzunte rey xi ttzak'we'n: —Ti til mastl yol tu'n kyolin ti'j. Ya ma txi nma'ne tu'n tcub tmij ttx'otx'a tuc'il Siba. 30Atzunte Mefi-boset xi ttzak'we'n: —E tcyaj ten tcyakil tx'otx' te Siba. Aju weye mas ba'n tuj nwitze, chjonte ba'n ma tzul meltz'aja tuj tjaya, chi Mefi-boset. 31Ax icx te Barzilai aju aj Galaad otok tzaj tuj Rogelim onil te rey tu'n tic'x tuj nima Jordán, ex axtzun tu'n tbaj tk'olben tib tuc'il rey. 32Ex toctok Barzilai twi' 80 abk'i. Otok tijin wen ex tuj tk'ijlalil tej tten rey tuj lugar Mahanaim otok txi tk'o'n Barzilai tcyakilju at tajben te rey, porque k'inuntok. 33Xitzun tma'n rey te Barzilai: —Ko' wuc'ile tuj Jerusalén ex jacu tz'oc ncwentine ma chixin. 34Atzunte Barzilai xi ttzak'we'n: —Tat Rey, ya nok nic'xi abk'i tu'n ntene twitz tx'otx', ex tza'n tten tu'n nxi'ye tuc'ila tuj Jerusalén. 35Ma chin japune twi' 80 abk'i, ya minti' tc'oc'jal nnic'beble ex tc'oc'jal nc'aye tuj ntzi'ye, ja'lo mlay txi nma'ne ka at tc'oc'jal ex ka minti' tc'oc'jal nnic'beble, ex ya minti' in nbi'ntle tk'ajk'ajel cywi' ke bitzal. Ex mi'n waje tu'n t-sicta wu'ne oc woc tcwentina. 36Nok o'cx ẍin ul ch'ine te tuc'ila Tat Rey oc tic'xa tuj nima Jordán, ex mi'n bisuna ti'j tu'n ttzaj tk'o'na jun chojbil weye. 37Nok o'cx chin cubsale twitza tu'n ttzaj tk'o'na ambil weye tu'n waj meltz'aje tuj ntanmiye tu'n ncyime ma chixin ex tu'n ncu'x maku'ne jatum cu'x maku'n ktzan nmane ex ktzan ntxu'ye. Pero lu juntl ajbel teya lu, Tat Rey: Aju ncy'ajale Quimam. E t-xi' tuc'ila, bix tila ti c'oquel tu'na ex binchama ti'j alcye ba'n tuj twitza, chi Barzilai. 38Atzunte rey xi ttzak'we'n: —E t-xi' Quimam wuc'ile, ex oc nbinchaye ti'j nok alcye ba'n tuj twitza. Ex tcyakilju ctzajel tkanina weye, jacu txi nk'o'ne, chi rey. 39Cycyakiltzun xjal e ic'x tuj nima Jordán. Ex tej tic'x rey, el ttz'uban twitz Barzilai tu'n tbaj tk'olben tib tuc'il. Ajtzun Barzilai tu'n tpon tja. 40Atzunte rey cyja' xi' tuj Gilgal, uc'in Quimam tu'n, cyuc'ix cycyakil xjal aj Judá, ex mij aj Israel. 41Cycyakil aj Israel e je'x que'yilte rey ex xi cyma'n te: —¿Tiku'n ake kermaniye aj Judá ma che'x k'inte teya Tat Rey, ex minti' ma cyma keye, ex ake ma che onin teya tej sic'tza tuj nima Jordán cyuc'ix keju ate' tuj tjaya, cyuc'ix cycyakil t-soldadiya? Che chi. 42Xitzun cytzak'we'n cycyakil aj Judá cye aj Israel: —Tu'nju at kxilene tuc'il rey. ¿Tiku'n in che k'ojine tu'n tlaj jlu? Baka at jun ti'xti te rey ma txi knic'be'ne, ex ka ma tz'el ki'ne tu'n toc te keye. 43Atzun cye aj Israel xi cytzak'we'n: —Pero laj c'loj cyiyjil aj Israel kbaje, cyja'tzun mas nim keye koclen ti'j rey cywitze. ¿Tiku'ntzun in ko el cyic'une? ¿Baka mya ako'ye o cub ximante tnejel tu'n tajtz meltz'aj krey? Che chi. Pero mas cyuw e yolin aj Judá ti'j jlu cywitz aj Israel.

will be added

X\