2 SAMUEL 17

1Te tibajxi jlu xi tma'n Ahitofel te Absalón: —K'ontza ambil weye tu'n tjaw nsc'o'ne cablaj mil xinak, ex tujx konic'an ja'lo chin elexe tu'n tcub ti'j David wu'ne. 2Octzun tbaj tipun ex oc t-sict wen, chin oquel tzokpaje ti'j tu'n ttzaj t-xobil wu'ne, ex cycyakiltzun ke xjal ate' tuc'il che elel ok. Nok o'cx te rey David cbel nbyo'ne, 3ex bi'x che tzajel wi'ne cycyakil xjal tu'n cyten tuc'ila. Aju teya tajbil atzun, tu'n tcyim o'cx jun xinak, tu'ntzun cycyaj ten cycyakil xjal tuj txubtxaj. 4Aju t-ximbetz Ahitofel ba'n ela tuj twitz Absalón ex tuj cywitz cycyakil ke cytijil xjal aj Israel. 5Pero ax icx xi tma'n Absalón tu'n t-xi txocbaj Husai aju aj Arquit, tu'ntzun tmante jun te tyol ti'j jlu. 6Tejtzun tpon Husai twitz Absalón, xi tma'n Absalón te: —Aju t-ximbetz Ahitofel atzun jlu, ¿ocpelo cbantel ku'n ex ka mi'n? K'mantz jun teya tyol ti'j jlu. 7Atzunte Husai xi ttzak'we'n: —Aju t-ximbetz Ahitofel ja'lo mya ba'n ta', 8porque ba'n tu'na, aju tmana ex ke t-soldad puro cyuw cyc'u'j tuj k'oj, ex pyorlo ja'lo malo tzaj nimxix cyk'oj, ic tza'n in tzaj tk'oj jun ttxu oso te tjak' c'ul oc in che el k'i'n ke tal. Ax icx tmana jun xinak at nim tnabl tu'n tk'ojin, ex mlay ten cyxol xjal tuj konic'an ja'lo. 9Ya malo txi tewan tib tuj jun toy' pic ex ka tuj juntl lugar. Ex ka bi'x ma che cub junjun teya t-soldad oc ttzyet k'oj, ex ka at junjun ma cybi jlu, oclo cyma cyja': Ke xjal ma che oc lpe' ti'j Absalón ma cub cyi'j, che chilo. 10Cyja'tzun, cyuc'ixpe ke xinak cyuw cyc'u'j tuj k'oj ex ke xinak at nim cyipun ic tza'n tipun jun nintz balun, jumajx ctzajel baj cyc'u'j tu'n jlu; porque cycyakil ke aj Israel ba'n cyu'n, ate tmana ex ke xinak lepcho'c ti'j, puro cyuw cyc'u'j tuj k'oj. 11Ja'lotzun cxel nk'o'ne jun tconseja: Chmon baja cycyakil xjal aj Israel, ctzajelx ke' tuj Dan tu'n tpon baj max tuj Beerseba, porque aju cyajlal xjal lu ic tten ic tza'n ttxa tza'n at ttzi mar, ex twitzelcuya c'oquel te nejenel cyxol tuj k'oj. 12Jacutzun ko oc tzokpaj ti'j tmana nok alcyex lugar jatum ta'. Nok minaben ctzyetel k'oj ku'n cyi'j, tu'nju nimxix ke kbaj, ex mi jun cyjel ank'in ku'n, mi tmana ex mi ke soldad uc'in tu'n. 13Ka ma pon cyclon cyib tuj jun tnam, kcyakil aj Israel ko' cxel ki'n ksakbak ti'j tnam lu, tu'ntzun cycu'tz jawet ke abj cyoc te muro ti'j, ex che xel kjawo'n cycyakil abj tu'n cypon jawet max tuj tk'ab xak, ex mi jun abj cyjel ten ma chixin, chi Husai. 14Atzunte Absalón ex cycyakil aj Israel moje' cyyol ka aju te Husai tconsej mas ba'n ela twitzju te Ahitofel. (Porque tu'n Kman baj ttzacsa'n t-ximbetz Ahitofel aju otok tma tuj tumelxix, tu'ntzun tcub tz'ak ju mya ba'n tibaj Absalón.) 15Te tibajxi xi tma'n Husai cye pal Sadoc ex Abiatar aju consej otok txi tk'o'n Ahitofel te Absalón ex cye ke cytijil xjal aj Israel, ax icx aju te tconsej otok txi tma'n. 16Xi tma'n cye tu'n t-xi cyma'n naj tkanil te David, tu'n mi'n tcyaj ten David tuj konic'an lu cytxlaj xajbil a' tuj lugar minti' cynajbil xjal tuj, nok o'cx tu'n tic'x jlajxi nima Jordán tu'ntzun mi'n cycub byo'n, mi a David ex mi ke t-soldad. 17Atzun ate'tok Jonatán tuc'ix Ahimaas jatum in jatz jlet twi a' En-rogel tbi, porque minti' tumel tu'n t-xi cyyec'un cyib tuj tnam, cyja'tzun nok jun majen xu'j pon k'malte tkanil cye, e je'xtzun naj tu'n t-xi cyma'n te rey David. 18Pero e ilwaj tu'n jun cu'xun, ex xi' naj ju cu'xun k'malte te Absalón. Pero ate Jonatán tuc'ix Ahimaas jurat e ic' naj ex e pon tja jun xinak at tuj Bahurim, ex e cu'x naj tuj jun jul jatum in jatz a', tcub ttxa'n pe'n. 19Aju t-xu'jil ju xinak lu jurat naj cub tlic'un jun xbalun te maksibl ttzi jul, ex cub t-sputun triw bajumaj tibaj ju xbalun tcub ttzi jul. Cyja'tzun mi jun el tnic' ti'j. 20Tejtzun cypon ke xinak otok che'x sama'n tu'n Absalón, xi cykanin te xu'j: —¿Jatum ta' Ahimaas tuc'ix Jonatán? —Atzun ẍe ex tzalu tu'n cypon ttzi nima, chi xu'j xi ttzak'we'n. Atzun cye xinak e je'x jyol cye, ex tu'nju minti'x e cnet cyu'n e aj meltz'aj juntl maj tu'n cypon tuj tnam Jerusalén. 21Cyajlenxitzun ke xinak lu, e jatz Ahimaas tuc'ix Jonatán tuj jul, ex e je'x ojkelan tu'n cypon k'olte tkanil te rey David; ex xi cyma'n te tu'n tic' ex tu'n tic'x naj tuj nima, porque ate Ahitofel otok baj consejarinte cye xjal tu'n cyoc tzokpaj cyi'j. 22Atzunte David cyuc'ix cycyakil xjal ate' tuc'il e ic' naj ex e ic'x tuj nima Jordán. Ya tej kskix te juntl k'ij, cycyakil otok che ic'x tuj nima. 23Tejtzun tel tnic' Ahitofel ti'j ka minti' otok txi cyniman xjal ju tconsej otok txi tma'n, oc tk'o'n t-siy tbur ex aj meltz'aj tja max tuj ttanmi. Tbajlenxitzun tma'n cye keju ate' tuj tja alcye tu'n tbant cyu'n, oc tc'alo'n tkul ex jaw tyoban tib tu'n tcyim. Cyja'tzun tten cyim Ahitofel, ex ax cu'x maku'n jatum otok cu'x maku'n ktzan tman. 24Otok pon David tuj tnam Mahanaim tej tic'x Absalón tuj nima Jordán cyuc'ix cycyakil aj Israel. 25Otok tz'oc tk'o'n Absalón ju xjal Amasa tbi te nejenel cye soldad te t-xel Joab. Ate Amasa tcy'ajal jun xinak aj Israel Itra tbi, aju otok cub tmojban tib tuc'il ju xu'j Abigail tbi, aju tme'jel Nahas ex terman Sarvia aju ttxu' Joab. 26Ate Absalón cyuc'ix ke aj Israel, atzun e cub ten tuj tx'otx' Galaad. 27Tejtzun tpon David tuj tnam Mahanaim, e etz ox xjal canul ti'j, ex atzun ke jlu: Sobi aju tcy'ajal Nahas aju aj Rabá aju ta' tuj tcwent Amón; tuc'ix Maquir aju tcy'ajal Amiel aju aj Lodebar; ex tuc'ix Barzilai aju aj Rogelim aju ta' tuj tcwent Galaad. 28Tzaj cyi'n ke pop te cyjak' xjal, cyuc'ix ke palangán ex ke c'il; ax icx tzaj cyi'n triw, sebad, arin, triw tx'ilsamaj, xcarbans, tuc'ix jun wik chenak' lenteja tbi, 29tuc'ix ta'l cab, manteca, cyes, ex cyuc'ix ke ẍne'l, tu'ntzun tajben te tchi' David ex cyuc'ix ke xjal ate' tuc'il, porque cub cyximan ka otok che sict ex nne'l cyc'u'j ex in txket ti'j cyc'u'j tu'nju otok che tzaj tuj lugar minti' cynajbil xjal tuj.

will be added

X\