2 SAMUEL 14

1Ate Joab aju tal Sarvia el tnic' ti'j rey, ka otok tzaj nim tgan tu'n tque'yin twitz Absalón, 2cyja'tzun xi t-sama'n Joab jun xjal tu'n t-xi k'ibaj jun xu'j at tnabl, najl tuj tnam Tecoa, ex xi tma'n te: —K'o'n oc tiba ic tza'n tuj bis ta'ya, ex k'o'n oc t-xbaluna aju nno'c cyk'o'n xjal tu'n cybis ti'j jun cyimni, ex mi'n tz'oc tk'o'na perjum ti'ja, porque c'oquel tk'on tiba te jun xu'j mer ic tza'n ela'xi tyemp ta'ya tuj bis ti'j jun cyimni. 3C'oquextzuna twitz rey ex cxel tma'na te aju yol cxel nma'ne teya. Xitzun tma'n Joab aju yol tu'n t-xi tma'n xu'j te rey. 4Atzunte xu'j aj Tecoa xi' twitz rey, cub ẍmeje' tejxi tpon tacl tibaj twitz max twitz tx'otx' te jun techal te nimbil, ex xi tma'n: —Aya Tat Rey, chin tonintza. 5—¿Ti in baj ti'ja? Chi rey xi tkanin te. Atzunte xu'j xi ttzak'we'n: —Meba xu'j kine, o cyim nchmile, 6ex akine ajbel teya at cabe wale k'a ke. E oc ten k'ojlel tuj cojbil, ex tu'nju mi a'l jun el pa'nte cye, o c'ixbi jun tu'n juntl ex bi'x cyim. 7Atzun ja'lo cycyakil xjal at nxilene cyuc'il in che k'ojin wi'je, ex cyajbil tu'n t-xi nk'o'ne tuj cyk'ab aju cub byonte terman, tu'ntzun t-xelin ti'j tu'nju tcublen tbyo'n terman, ex bi'x tu'n tnaj aju etzal. Cyja'tzun cbel cybyo'n o'cxcu jun wale ic tza'n tu'n tcu'x cyyupun jun xk'a'l, ex oc cyjel cyk'o'n ktzan nchmile misicyer jun tiyjil tu'n tten tbi twitz tx'otx'. 8Xitzun ttzak'we'n rey te xu'j: —Txi'ya tjaya, jacu wile tu'n tbant ti'ja. 9Xi ttzak'we'n xu'j: —Aya Tat Rey, aju mya ba'n awt cub tz'ak wibaje ex cyibaj keju ate' tuj tja nmane, ex mya tibaja ex ju tcawbila. 10Ex xi ttzak'we'n rey: —Ka at jun ma yolin mya ba'n ti'ja, k'intza wuc'ile tu'n mi'n tlabtl ti'ja. 11Pero xi tma'ntl xu'j: —In chin cubsane twitza Tat Rey, tu'n ttzaj tma'na jun yol axix toc twitz Kman Dios, ka mi'n tak'a ambil teju xjal at nxilene tuc'il tu'n t-xelin tu'n aju tcyimlen ktzan wale, tu'ntzun mi'n tcub tbyo'n juntl wale. Atzunte rey xi tcyuwsa'n: —Cxel nma'ne jun yol axix toc twitz Kman, mi jun ttzmal twi tala cnajel. 12Pero ate xu'j cucx o yolin ex tma: —Tat Rey, k'ontza ambil tu'n nyoline, akine tmajena, nok juntl yol cxel nma'ne teya. —Chux yolina, chi rey xi tma'n. 13Xitzun tkanin xu'j te rey: —¿Tiku'ntzun ma cub t-ximana Tat Rey tu'n tbinchanteya ic tza'n jlu ti'j ju tnam etzan tu'n Dios? Ic tza'nx ju yol ma tmaya, aya at tila tu'nju tc'i'ya tu'n tajtz meltz'aj tcy'ajala aju o tz'ex ok. 14Porque ax toc kcyakil ko cymel; ic kten ic tza'n a' in cub kojl twitz tx'otx', mlay bant tu'n tjaw k'i'n. Masque icju, ate Dios minti' nne'l ti'n tchwinklal jun xjal, nok o'cx in cnet jun tumel tu'n tu'n tpon lak'e' jun xjal ttxlaj, aju otok tz'el ok nej. 15Ja'lo ma chin tzaje k'malte jlu teya Tat Rey, porque ma chin oc xobtza'ne cyu'n xjal. Cyja'tzun xcub nximane tu'n nyoline tuc'ila, ka ma cub tuj twitza tu'n tbinchanteya aju ma txi nkanine teya. 16Ka ma chin tzaj tbi'na Tat Rey, chin cletele tu'na tuj cyk'ab keju cyaj tu'n knaje cyu'n tzalu twitz ju tx'otx' tzaj tk'o'n Dios te ketzbile, akine tuc'ix wale. 17Chin ayole ti'j tzak'webl tu'na Tat Rey tu'ntzun tke' nc'u'je, porque aya nne'l tnic'a ti'j ju ba'n ex ti'j ju mya ba'n ic tza'n jun t-anjel Dios. Awt Kman Dios cyaj ten tuc'ila, chi xu'j. 18Atzunte rey xi ttzak'we'n: —Chin cubsale twitza tu'n mi'n tcub tewana jun yol ti'j ju cxel nkanine teya. —Chux yolina Tat rey, chi xu'j xi ttzak'we'n. 19Xitzun tkanin rey te: —¿Myape a Joab ma k'mante teya tu'n tbinchanteya jlu? Entons xi ttzak'we'n ju xu'j: —Cxel nma'ne jun yol axix toc teya Tat Rey, ax toc aju ma tmaya. Ate Joab aju at toclen ttxlaja tzaj k'mante weye tu'n ntzaje, ex ax tzaj k'mante weye tcyakilju yol tu'n t-xi nma'ne teya. 20O tbincha jlu nok tu'n tch'expet t-ximbetza ti'j tcy'ajala Absalón. Masque icju, pero aya Tat Rey at nim tnabla, ojtzki'n tu'na tcyakil aju in baj tuj tx'otx' lu, ic ttena ic tza'n jun t-anjel Dios, chi xu'j. 21Xitzun tma'n rey te Joab: —Bintza, ma bant ti'j jlu wu'ne, txi'ya ex k'manxa te cu'xun Absalón tu'n tul meltz'aj. 22Atzunte Joab cub ẍmeje' ex pon tacl tibaj twitz max twitz tx'otx' te jun techal te nimbil, xi tk'o'n chjonte te rey, ex tma: —Tat Rey, ja'lo ma tz'el nnic'e ti'j ka ma nc'ame xtalbil teya, tu'nju ma tbinchaya aju xi nkanine teya, akine tmajena. 23Cubtzun be tu'n Joab, ex xi' tuj tnam Gesur k'ilte te Absalón tu'n tul tuj Jerusalén. 24Atzunte rey xi tma'n bi'x tu'n t-xi' Absalón tja ex tu'n mi'n tpon yec'ul twitz tuc'il; cyja'tzun tkanx xi' Absalón tja ex minti' ic' aj tuc'il rey. 25Cyxol cycyakil xjal aj Israel minti' juntl xinak o pon que'yin ic tza'n te Absalón, cyja'tzun cycyakil xjal in che yolin ti'j ka puro mejor que'yin. Tcyakil t-ximlal minti' ch'in tpaltil at. 26Oc nne'l tmatzo'n ttzmal twi', aju talil ttzmal twi' oc nne'l, ch'ixmi jwe' libr ic tza'nx ju malbil at tuj tja rey, ex jun maj nne'l tu'n tuj jun abk'i, tu'nju puro alxix in tna'n. 27Attok ox tcy'ajal Absalón ex jun tme'jel, Tamar tbi, ex ate txin lu tbanilxix que'yin. 28Tuj cab abk'i o ten Absalón tuj tnam Jerusalén, pero minti' pon tyec'un tib twitz rey, 29cyja'tzun tzaj txco'n Joab tu'n Absalón, tu'n t-xi' te t-xel yolil tuc'il rey; atzunte Joab minti' cub tuj twitz tu'n tpon tja Absalón. Ex o txocl Joab tcabin maj tu'n Absalón tu'n tpon tja, ax icx minti' pon. 30Xitzun tma'n Absalón cye ke tmajen: —Cybintze, aju tcojbil Joab tcub ttxlaj weye ex awa'n sebad tuj; chux cyxi'ye ex cykoptz'in oque k'ak' tuj. E je'xtzun ke tmajen Absalón ex oc cykoptz'i'n k'ak' tuj tcojbil Joab. 31Xi'tzun naj Joab max tja Absalón ex xi tkanin te: —¿Tiku'n ma tz'oc cykoptz'i'n ke tmajena k'ak' tuj ncojbile? 32Atzunte Absalón xi ttzak'we'n: —Xi txocbaja wu'ne tu'n tula tzalu, tu'ntzun t-xi nsama'ne tu'n t-xi'ya tuc'il rey te nxele, ex tu'n t-xi tma'na te ka nokx gan ma chin ajtze tuj tnam Gesur; mas ba'nwtlo nokwit max ẍin cyaj tene ma chixin. Wajbile tu'n twile twitz rey; katzun at jun il ma nbinchaye twitz, ba'n tu'n ncub byo'ne tu'n, chi Absalón. 33Xi'tzun Joab tuc'il rey ex xi tma'n te aju yol otok tma Absalón; xitzun txocbaj Absalón tu'n rey. Tejtzun tpon twitz rey, cub ẍmeje' ex pon tacl tibaj twitz max twitz tx'otx'. Atzunte rey el ttz'uban twitz.

will be added

X\