2 SAMUEL 13

1Ate Absalón aju tcy'ajal David attok jun tanb tbanilxix que'yin, Tamar tbi. Ex ate Amnón ax tcy'ajal David o t-xo' tgan ti'j txin lu, 2ex otok tz'oc tyab Amnón tu'n tbis, porque ate Tamar aju tanb na'nxtok tlonte xinak, ex tuj twitz Amnón ka minti' tumel tu'n toc ten ti'j. 3Pero ate Amnón attok jun tamiw jawni twitz Jonadab tbi, tcy'ajal Simea aju terman David. 4At jun k'ij xi tkanin Jonadab te: —Aya tcy'ajal rey, ¿ti in baj ti'ja? ¿Tiku'n teyle junjun k'ij nok cyja' toc ti'ja? ¿Maj mi'n tzaj tma'na weye? Atzunte Amnón xi ttzak'we'n: —At nim nganiye ti'j Tamar aju tanb wermaniye Absalón. 5Octzun ten Jonadab consejaril te ex tma: —Tancuya tuj tcoẍbila ex yabin cub tiba. Ex octzun tpon tmana que'yil teya, k'manxa te cyja': Binchama xtalbil samantza wanbe Tamar tu'n ttzaj tk'o'n nwaye, ex nwitzxe tu'n tbaj tbincha'n chibj tu'ntzun t-xi nchyo'ne oc twile aju ctzajel tk'o'n weye, chicuya te. 6Cubtzun tan Amnón twi watbil ex cub tyabsin tib. Ex tej t-xi' rey que'yilte te, xi tma'n Amnón te: —Binchama xtalbil, e ttzaj wanbe Tamar tu'n tcub tbincha'n cabe wabj ax tzalu, ex ax ctzajel k'onte weye. 7Xitzun t-sama'n David jun xjal max tja Tamar k'malte te: —Binchama xtalbil, txi'ya tja termaniya Amnón ex binchama ch'in twa. 8Xi'tzun Tamar tja Amnón aju t-xiban, ex coẍltok Amnón twi twatbil. Tzajtzun ti'n Tamar ch'in arin ex baj t-xyok'in, ex axtzun ma chixin oc ten binchalte wabj ex e baj ttzk'ajsa'n; 9tzaj ti'n aju c'uxbil jatum in tzk'aj pan ex xi tk'o'n wabj te, pero minti' xi twa'n Amnón, ex xi tma'n tu'n cyex cycyakil keju ate'tok tuja. 10Tejtzun cyetz baj cycyakil, xitzun tma'n Amnón te Tamar: —K'intza wabj max tuj ncwarte ex axa ctzajel k'onte weye. Tzajtzun ti'n Tamar wabj aju otok bant tu'n, ex xitzun ti'n max tuj tcwart Amnón aju t-xiban. 11Tejtzun tpon lak'e' Tamar tu'n t-xi tk'o'n twa, tzajtzun ttzyu'n Amnón tanb ex xi tma'n te: —Aya wanbe tzaja, tancuya wuc'ile. 12Atzunte Tamar xi ttzak'we'n: —Mi'n nxiban, mi'n tz'oc tk'o'na il wi'je tu'n ncub tane tuc'ila, porque minti' in binchanjtz jlu cyxol aj Israel. Mi'n tbinchaya aju mya ba'n lu. 13¿Jatum chin xe'le oc tcub nch'ixwiye? Ex atzun teya c'oquela cyxol aj Israel ic tza'n jun xjal minti' tnabl. In chin cubsane twitza tu'n t-xi'ya yolil tuc'il rey, ex mlay cub t-xc'ayin tu'n ntzaj k'o'ne teya. 14Atzunte Amnón minti' xi tniman, ex tu'nju mas nim tipun twitz Tamar, cyja'tzun oc ten ipalte ex cub tan tuc'il. 15Te tibajxi jlu oc ten Amnón ic'ul ti'j tuc'il jun ic'bil nimxix, aju ic'bil lu mas ma'xix twitzju tc'ujlalil attok ti'j nej. Cyja'tzun xi tma'n te cyja': —We'ctza ex texa. 16Xitzun ttzak'we'n Tamar: —Mi'n nxiban, porque ka ma chin ex tlajo'na ja'lo, a jlu jun mya ba'n mas ma' t-xilen twitz aju ma tbinchaya wi'je. Atzunte Amnón minti' xi tbi'n; 17nok o'cx tzaj ttxco'n ju tmajen ex xi tma'n te: —K'i'mexa xu'j lu, ex lamo'mexa tlamel ja wen. 18Extzun ti'n majen aju xu'j tuj ja, ex etztzun tlamo'n tlamel ja wen. Atzunte Tamar tocsa'ntok t-xbalun tbanilxix, aju xbalun in ajben cyu'n ke cyme'jel rey oc na'nxtok cymoje', 19jax tk'o'n tza'j tuj twi', el t-sbit'un t-xbalun tocsa'n ti'j, ex jax tk'o'n tk'ab tuj twi' ajtzun in ok' tuj be. 20Xitzun tma'n Absalón te, aju t-xiban: —¿Maj atzun Amnón aju t-xibana ma binchante jlu ti'ja? Cucxju wanb, mi'n k'ajta, porque termaniya jlu. Mi'n tzaj nim tbisa tu'n jlu. Axtzun cyaj ten Tamar tja Absalón aju t-xiban, in bisun wen. 21Tejtzun tbinte rey David tcyakilju otok baj, tzaj nimxix tk'oj. 22Ax icx te Absalón minti' jun yol xi tma'n te Amnón ka ba'n ex ka mya ba'n, masque in ic'untok ti'j tu'nju otok cub tk'o'n tch'ixwi Tamar aju tanb. 23Tbajlenxi cab abk'i, ke tmajen Absalón in che matzontok cytzmal ẍne'l tuj lugar Baal-hazor tbi, nikayin ttxlaj tnam Efraín, ex e tzaj ttxcon Absalón cycyakil ke tcy'ajal rey tu'n cywa'n tuc'il. 24Ax icx xi' tuc'il rey, ex xi tma'n te: —Tat Rey, ja'lo ke xinak ate' wuc'ile in che matzon cytzmal ke nẍne'le. Akine tmajena wajbile tu'n tpona wuc'ile cyuc'ix ke xjal at cyoclen ttxlaja. 25Atzunte rey xi ttzak'we'n: —Mi'n ncy'ajal, mlay ko'xe kcyakile tu'ntzun mya nim tu'n tbaj tnajsa'na. Ex masque oc tk'o'n Absalón il ti'j tu'n t-xi', pero ate rey minti' xi', nok o'cx cub tcy'iwla'n. 26Xitzun tma'n Absalón: —Katzun mlay txi'ya, pero k'ontza ambil tu'n t-xi' Amnón wuc'ile, aju wermaniye. —¿Tiku'ntzun tajbila tu'n t-xi' Amnón tuc'ila? Chi rey xi tkanin. 27Pero oc tk'o'n Absalón il ti'j, ex cyja'tzun xi tk'o'n rey ambil tu'n t-xi' Amnón tuc'il, cyuc'ix txkantl tcy'ajal. 28Ex otok txi tma'n Amnón cye ke tmajen cyja': —Bix tz'oc cyk'o'ne cwent ti'j oc tchyo'n twi' Amnón tu'n vin, ex oc t-xi nma'ne cyeye tu'n tcub cybyo'ne, bixtzun cub cybyo'ne. Mi'n che xobe tu'n cybinchanteye jlu, porque wu'ne ju orden lu. Cyja'tzun cyuwx cyc'u'je ex tenx cyipune. 29Cyja'tzun o japun cyu'n ke tmajen Absalón aju orden xi tk'o'n cye, cub byo'n Amnón cyu'n. Cycyakiltzun ke tcy'ajal rey e jaw we', e jax tibaj cychej mul ex e je'l ok. 30Tej ate'xtok tuj cybe, pon tkanil tuc'il David ka otok che cub byo'n cycyakil ke tcy'ajal tu'n Absalón, ex ka mi jun cye otok cyaj ank'in. 31Jawtzun we' rey, el t-sbit'un t-xbalun ti'j te jun yec'bil ti'j tbis, ex cub t-xo'n tib twitz tx'otx'. Ax icx cycyakil ke xjal ate'tok tuc'il, akeju at cyoclen ttxlaj, el cysbit'un cyxbalun cyi'j; 32pero xi tma'n Jonadab aju tcy'ajal Simea, aju terman David cyja': —Tat Rey, mi'n ximana ti'j ka ma che cub byo'n cycyakil ke tcy'ajala. O'cx te Amnón ma cub byo'n, porque atzun jlu ximamaj tu'n Absalón atxix tuj k'ij tej tcub t-xo'n Amnón Tamar aju tanb. 33Cyja'tzun Tat Rey, mi'n ximana ti'j ka cycyakil tcy'ajala ma che cyim. O'cx te Amnón ma cyim. 34Atzunte Absalón otok tz'el ok. At jun cu'xun tocsa'ntok te xk'ukil o til txkan xjal cyja' cycu'tz tuj tbeyil tnam Horonaim, xi'tzun k'malte te rey ka otok til txkan xjal cyja' cycu'tz tuj tbeyil tnam Horonaim. 35Ex xi tma'n Jonadab te rey: —Que'yinxa Tat Rey, lu ke tcy'ajala che ul ic tza'nx xi nma'ne, akine ajbel teya. 36Matok in baj yolin Jonadab tej cypon ke tcy'ajal rey, ex e oc ten ok'el tuc'il tk'ajk'ajel cywi' cyuwxix. Ax icx te rey cyuc'ix cycyakil xjal at cyoclen ttxlaj nimxix o che ok'. 37Atzunte Absalón otok tz'el ok, ex xi' tuc'il Talmai, aju tcy'ajal Amiud ex rey tuj tnam Gesur, ex axtzun cyaj ten ox abk'i ma chixin. Atzunte David in ok'tok tcyakil k'ij ti'j tcyimlen Amnón aju tcy'ajal, 39pero tej t-xi tcolin tu'n tbisun ti'j tcamic Amnón, tzajtzun nimxix tgan tu'n tque'yinte twitz Absalón.

will be added

X\