2 SAMUEL 11

1Tuj coresma te juntl abk'i, tuj tk'ijlalil oc in che ex ke rey tuj k'oj, xi t-sama'n David Joab cyuc'ix cycyakil keju at cyoclen ttxlaj, cyuc'ix cycyakil ke soldad aj Israel, ex e cub ke aj Amón cyu'n, ax icx baj cytxolban cyib ti'j tnam Rabá. Atzunte David ax cyaj ten tuj Jerusalén. 2At jun kale jaw we' David tuj tcoẍbil, ex tej in bet tic' twi tja tzaj tque'yin lu jun xu'j tbanilxix que'yin matok in chin. 3Xi t-sama'n David jun sanjel tu'n tbinte alcye ju xu'j lu, ex ultzun k'ma'n te ka ate Betsabé, aju tme'jel Eliam ex t-xu'jil Urías aju aj Hetey. 4Xitzun t-sama'n David junjun sanjel k'ilte ju xu'j. Ultzun k'i'n tuc'il, ex cub tan David tuc'il, te tibajxi aj meltz'aj xu'j tja. Ate xu'j lu matok tbajlen ttx'jon tib ti'j ẍwo'j in c'u'l ti'j. 5Bi'x oc ten tal xu'j, ex xi t-sama'n tkanil ti'j jlu tuc'il David. 6Atzunte David xi t-sama'n jun xjal k'malte te Joab tu'n tajtz sama'n Urías tu'n, aju aj Hetey, ex tbinchatzun Joab icju. 7Tejtzun tpon Urías twitz David, xi tkanin te tza'ntok ta' Joab ex ke soldad, ex alcye tkanil ti'j k'oj. 8Te tibajxi xi t-sama'n tu'n t-xi' tja ex tu'n tbaj ttx'jo'n ti'j tkan. Tejtzun tetz Urías tuj tja rey, xi t-sama'n rey jun wabj tbanilxix te Urías, ic tza'n jun oyaj te. 9Atzunte Urías ax ex ak'bil tu'n ttzi tpwertil tja rey, junx cyuc'il ke soldad in che xk'ukin tja rey, ex minti' xi' tja. 10Tejtzun tbinte David ka minti' otok txi' Urías tja, xi tkanin te: —¿Tiku'n minti' xi'ya tjaya tul-lenxiya tuj tbeya? 11Atzunte Urías xi ttzak'we'n: —Tza'nx ju cax c'ubl tley Dios ex ke soldad cye aj Israel ex aj Judá, atzun in che tan cyuj tal ja t-xak tze'yin cywi', ax icx te Joab aju nejenel weye ex ke sanjelal teya Tat Rey, ax in che cub tan tuj cojbil; ¿maj chin oquextzune tuj njaye tu'n nwa'ne ex tu'n nc'ane ex tu'n ncub tane tuc'il nxu'jile? Aya Tat Rey, mlayx bant jlu wu'ne. 12Atzunte David xi tma'n te: —Tencja ja'lo ex nchi'jxitzun txi'ya. Cyja'tzun cyaj ten Urías tuj Jerusalén tuj juntl k'ij. 13Xitzun txco'n tu'n David tu'n twa'n ex tu'n tc'an vin junx tuc'il, max tejxi tchyo'n twi' tu'n. Ya te konic'an etz Urías ex xi' tal cyuc'il ke soldad xk'ukil tja rey, ex minti'x xi' tja. 14Te prim tuj juntl k'ij cub ttz'iban David jun u'j tu'n t-xi t-sama'n te Joab; ex ax ti'j Urías xi t-sama'n ju u'j. 15Chitzun in tma'n tuj u'j cyja': Cyk'o'nque Urías tuj tnejel txol jatum mas cyuw ta' k'oj, ex cycolincje tjunal tu'ntzun tc'ixbi ex tu'n tcyim. 16Cyja'tzun tten, tej tbaj cytxolban cyib Joab ti'jele tnam tu'n cyk'ojin, xi tma'n Joab te Urías tu'n tcub ten tuj lugar jatum ba'ntok tu'n jatum ate' ke soldad aj k'oj mas cyuw che k'ojin. 17E je'tztzun ke soldad cwentil tnam k'ojlel ti'j Joab, ex e cub junjun cyxol ke t-soldad David cyu'n, ex tuc'ix Urías cyim, aju aj Hetey. 18Xitzun t-sama'n Joab jun tkanil cabalxix ti'j k'oj tuc'il David, 19ex xi tma'n te sanjel cyja': Oc tbaj ttx'olba'na tcyakil tkanil ti'j k'oj te rey, 20katzun ma jaw k'ojl rey ex ka ma tzaj tkanin teya: ¿Tiku'n ẍe pon lak'e'ye k'ojlel ti'j tnam? Baka minti' ba'n cyu'ne ke xjal lu in cu'tz cyxo'n jun ti'xti max twi muro, 21ic tza'n o baj tuj tnam Tebes tej tcub byo'n Abimelec aju tcy'ajal Jerobaal tu'n jun xu'j cu'tz t-xo'n jun cya' max twi muro ex tu'ntzunju cyim. ¿Tiku'ntzun ẍe pon lak'e'ye ttxlaj muro? ka chi, atzun teya txi tma'na te: Ax icx ma cyim Urías aju aj Hetey ex nejenel cyxol t-soldadiya, chicuya. 22Xi'tzun ju sanjel, ex tej tpon xi ttx'olba'n te David tcyakilju otok txi tma'n Joab te. 23Ax icx xi tma'n sanjel te David: —Ke soldad ẍe etz k'ojlel ki'je tuj chk'ajlaj, ex cyja'tok tcub ki'je cyu'n, pero tu'nju cyuw oc k'oj cyi'j ku'ne, cyja'tzun e aj meltz'aj tu'n cyocx ttzi tpwertil tnam. 24Cyja'tzun max twi muro saj cyxo'n ke cyplech ki'je ako'ye t-soldadiye Tat Rey, ex ma che cyim junjun nejenel cyxol ke soldad, ex tuc'ix Urías aju aj Hetey ma cyim. 25Atzunte David xi ttzak'we'n te sanjel: —K'manxa te Joab tu'n mi'n ttzaj tbis tu'n jlu, porque tcyakil jlu atzun in baj tuj k'oj. Nok o'cx tu'n tk'ojin ti'j tnam tuc'il mas tipun max oc tcub ti'j tu'n. Atzun teya cyuwsanxa tc'u'j. 26Tejtzun tbinte t-xu'jil ktzan Urías ka otok cyim tchmil, oc ten bisul ti'j. 27Tej tjapun baj tk'ijlalil tbis xu'j, xi tma'n David tu'n ttzaj k'i'n tuc'il, ex o tc'am tuj tja. Oc te t-xu'jil ex ultzun itz'j jun tcy'ajal David ti'j xu'j. Pero mya ba'n e'la tuj twitz Dios aju tbincha David.

will be added

X\