2 SAMUEL 1

1Tcyimlenxitzun Saúl, pon juntl maj David tuj tnam Siclag tcublenxi cyi'j aj Amalec tu'n, ex axtzun cyaj ten cabe k'ij. 2Tujtzun toxin k'ij at jun xinak sbit'naj t-xbalun toc ex tjax tx'otx' tuj twi' te jun techal te bis, atzun tzajni cyxol t-soldad Saúl. Tejtzun tpon twitz David, cub mutze' twitz tx'otx' te jun techal te nimbil. 3Atzunte David xi tkanin te: —¿Jatum sajaya? —Ma chin etz tzokpaje cyxol ke soldad aj Israel, chi xjal xi ttzak'we'n. 4—¿Titzun ma baj? Binchama xtalbil k'mantza weye, chi David xi t-xjelin. —Ma che el ok ke soldad tuj k'oj ex nimcu ma che cub, ax icx ma cyim Saúl tuc'ix Jonatán aju tcy'ajal, chi xjal. 5—¿Tza'ntzun tten ma tbiya ka ma cyim Saúl tuc'ix Jonatán aju tcy'ajal? Chi David teju cu'xun aju otok tzul k'malte tkanil. 6Atzunte cu'xun xi ttzak'we'n: —Tc'ulbacu atintoke twi witz Gilboa tej xwile Saúl pakltok tibaj tkan tlans, ex ch'ixtok tcub ti'j cyu'n ke aj k'oj, akeju ate'jx cyuj carwaj ex cyibaj chej. 7Tejtzun sajtz tque'yin ttzal ti'j ex tej ẍin til, ẍinx ttxco'n. Atzun weye jurat naj xi nnimane. 8Sajtzun tkanin weye alcye kine, atzun weye xi nma'ne, aj Amalec kine. 9Sajtzun tma'n weye: Lak'e'tza ntxlaje ex chin tbyoncuya te jumajx, tu'nju ma tz'oc ta'w wi'je ex minti' tumel tu'n ncyime, chi Saúl. 10Cyja'tzun tten ẍin pon lak'e'ye ttxlaj ex xcub nbyo'ne, porque sel nnic'e ti'j ka tcublenxi tz'ak twitz tx'otx' mlayx tz'ank'intl, tu'nju nimxix otok c'ixbi. Ex ma tz'el wi'ne aju coron tjax tuj twi', tuc'ix aju c'uxbil tcub tkul tk'ab, tu'n ttzaj wi'ne tuc'ila tat, chi cu'xun. 11Atzunte David cyuc'ix ke tuc'il, baj cysbit'un cyxbalun te jun techal ti'j cybis, 12ex bi'x e jaw ok' tu'n cybis ti'j tcyimlen Saúl ex ti'j tcyimlen Jonatán aju tcy'ajal. Ax icx e jaw ok' cyi'j aj Israel akeju etzan tu'n Kman, tu'nju otok che cub byo'n tuj k'oj; cyja'tzun minti' e wa'n tejxi toc kax. 13Te tibajxi xi tkanin David teju cu'xun otok pon k'inte tkanil: —¿Yajtzun teya, jatum tzajniya? —Stranjer xjal kine ex aj Amalec kine, chi cu'xun. 14—¿Tza'ntzun tten xtnimari tiba tu'n toc tk'o'n tk'aba ti'j rey aju sc'o'maj tu'n Kman Dios? Chi David. 15Tzajtzun ttxco'n David jun soldad ex xi tma'n te: —Chux byoncuya. Octzun tbyo'n ex bi'x cyim aj Amalec tu'n. 16Atzunte David xi tma'n: —Tu'nxa ma tzaj ti'na camic tibaja, porque tu'nxa ma tzaj tma'na tila, tej saj tma'na ka otok cub tbyo'na aju rey sc'o'maj tu'n Kman. 17Xitzun tbitzan David jun bitz te bis ti'j tcyimlen Saúl, ex ti'j tcyimlen Jonatán aju tcy'ajal, 18ex xi tma'n tu'n t-xi xnak'tzet bitz lu cye aj Judá. Aju bitz lu tz'ibamaj tuj u'j cyaj ttz'iban Jaser. 19Akeye aj Israel, ma che cub ke tbanil nejenel cyeye max cywi' ke witz. Ti tten ma che cub ke xjal nim cyipun. 20Mi'n txi cyma'ne tkanil tuj tnam Gat, ex mi'n txi cytx'olba'ne cyuj cay tuj tnam Ascalón, tu'ntzun mi'n cyjaw tzalaj ke xu'j aj Filistey, ex tu'n mi'n cyjaw t'icpaj tu'n tzalajbil ke xu'j mya nimal Dios. 21Akeye witz Gilboa, miwt tzajtl jbal cyibaje ex mi tk'ab che'w, ex miwt tzaj ch'iy awal ma chixin tu'n t-xi k'ot te oyaj, tu'nju atzun e baj waban ke makbil cye ke soldad cyuw cyc'u'j tuj k'oj. Atzun baj naj tkoptz'ajel aju makbil in ajben te Saúl, mer ic tza'n minti' otok tz'oc su'n aseyt ti'j. 22Mi jun maj cucx ma che ajtz Saúl ex Jonatán tuj k'oj, tcyakil maj ma che cub ke xjal at nim cyipun tuj k'oj tu'n t-spad Saúl, ex tu'n tplech Jonatán. 23Ate Saúl ex Jonatán c'ujla'nxix ke ex nim cygan xjal cyi'j, misicyer el cypa'n cyib cyi'jx, mi tej itz'xtok ke ex mi tej cycyim. Mas cyuw che ojkelan ic tza'n ke t'iw, ex mas nim cyipun ic tza'n ke balun. 24Akeye xu'j aj Israel, che ok'e ti'j Saúl aju tzaj k'inte cyxbalune tbanilxix ex tz'umin twitz; ex aju tzaj k'onte adorn k'an pwak ttx'otx'il tu'n toc cyk'o'ne ti'j cyxbalune. 25Ti tten ma che cub keju at cyipun tuj k'oj. Ma cyim Jonatán max cywi' ke witz. 26Nimxix in chin bisune ti'ja wermaniye Jonatán. Nimxix o chin tzalaje ti'ja porque aju tc'ujlalila te weye puro ba'n, mas ic tza'n tc'ujlalil jun xu'j. 27Ti tten ma che cub keju at nim cyipun tuj k'oj. Ma che naj ke cymacbil akeju in che ajben tuj k'oj, chi David tuj tbitz.

will be added

X\