2 Pedro 3

1Akeye erman at nc'u'je cyi'je, atzun tcabin u'j jlu in xi ntz'ibane cyeye; tuj cycabil u'j ma txi nk'o'ne cynable ex ma jaw nc'asune cynable tu'n cyximane tuj tumelxix, 2tu'ntzun ttzaj cyna'ne aju yol o k'manjtz ojtxi cyu'n ke t-sanjel Dios xjan, ex tu'n ttzaj cyna'ne tmandamyent Kajaw ex Clolke, aju xi cypacba'n ke apostl e ten cyuc'ile. 3Tnejel tz'elx cynic'e ti'j jlu: Tuj mancbil tk'ijlalil che ul ke xmayil in cybincha'n aju cyex cyajbil, 4ex in cyma'n: ┬┐Jatumtzun ta' tu'n tul Crist ic tza'n tzaj tma'n? Porque atxix tej cycyim ke kxe'chel, ttenx tcyakil ic tza'n t-xe tnejel tej tbant twitz tx'otx', che chi. 5Cyu'nx mi'n cyaj tu'n tel cynic' ti'j jlu: Ojtxi o binchanjtz cya'j tuc'ix tx'otx' tu'n tyol Dios, atzun jatz jlet tx'otx' tuj a' ex axtzun tcub tx'otx' tibaj a', 6cyja'tzun cycyakil keju ate' twitz tx'otx' ojtxi e cyaj mulk'aj tjak' a' ex e naj. 7Atzun te cya'j tuc'ix tx'otx' akeju ate' ja'lo, tzyu'n ke tu'nx tyol Dios, c'u'n ke tu'n cybaj tz'e'y tu'n k'ak' tuj tk'ijlalil jwisi ex tuj tk'ijlalil oc cynaj ke xjal mya nimal Dios ke. 8Pero erman, akeye at nc'u'je cyi'je, tz'elx cynic'e ti'j jlu: Tuj twitz Kajaw jun k'ij junx ta' ic tza'n jun mil abk'i, ex jun mil abk'i junx ta' ic tza'n jun k'ij. 9Ate Kajaw mlay tzic'x ti'j tyol aju tziyimaj tu'n ic tza'n in cyma'n junjun: Ma tzic'x ti'j tyol, che chitzun. Mya ma tzic'x ti'j tu'n, nok o'cx tu'nju at tpasens ki'j, porque mi'n tajbil Kajaw tu'n tnaj jun xjal, nok o'cx tajbil tu'n tajtz ti'j cyanmi cycyakil. 10Aju tk'ijlalil Kajaw minaben tzul, ic tten ic tza'n jun elek' nnu'l konic'an; tujtzun tk'ijlalil lu cnajel cya'j tuc'il jun tk'ajk'ajel in julin wen, ex tcyakilju at cbel ulj tu'n k'ak', ex ju tx'otx' tuc'ix cybinchben xjal at twitz cbajel tz'e'y tu'n k'ak'. 11Katzun il ti'j tu'n tcub ulj tcyakil jlu, ┬┐yajtzun cyeye, myapelo il ti'j tu'n cyank'ine ba'n, ex tu'n tel cypa'n cyibe ti'j tcyakil mya ba'n, ex tu'n cynimane te Dios? 12Tz'oc tililx cyu'ne tu'n tbant cytene ex tu'n cyayone ti'j tk'ijlalil oc tul Dios; porque oc tpon tk'ijlalil oc tul Dios, c'oquel tk'ak'al cya'j, cbel ulj, ex tcyakilju at cbel ulj tu'n k'ak'. 13Atzun ke in ko ayon ti'j ac'aj cya'j ex ac'aj tx'otx' jatum cbinchetel aju tz'aklxix cyu'n cycyakil, ic tza'n tzaj ttziyan Dios ke. 14Cyja'tzun erman, akeye at nc'u'je cyi'je, che ayone ti'j tcyakil jlu, tz'oc tililx cyu'ne tu'n cytene minti' ch'in tz'il cyi'je oc tul Kajaw, ex minti' cypaltile, ex tu'n tten cymojbabl cyibe. 15Tz'elx cynic'e ti'j jlu: Tu'nju at nim tpasens Kajaw at colbil ke, ic tza'n tyol kerman Pablo aju at-xix kc'u'j ti'j xi ttz'iban cyeye, ic tza'nx ju tnabl tzaj tk'o'n Dios te. 16Tuj tcyakil tu'j Pablo in yolin ti'j tcyakil jlu; at junjun yol tuj tu'j cyuw tu'n tel knic' ti'j; ke xjal mya xnak'tzamni ke ex mya cyuw cyten in baj cymeltz'un ju yol lu, ex in baj cymeltz'u'n mastl yol tz'iban tuj Tu'jil, cyja'tzun cyu'nx che najel. 17Cyja'tzun erman, akeye at nc'u'je cyi'je, bi'maj jlu cyu'ne, cycwentin oc cyibe tu'n mi'n cyxi lach'o'ne cyu'n xjal mya ba'n ke ex ma che el tzpet ti'j ju yol axix toc; cycwentin oc cyibe tu'n cycyaj tene wa'lxix tu'n mi'n cycub tz'ake. 18Pero che ch'iyxe tuj t-xtalbil Kajaw ex Clol ke Jesucrist ex tz'elx mastl cynic'e ti'j. Nimanxwit ju tbi ja'lo ex te jumajx. Icxwitju.

will be added

X\