2 Pedro 1

1Akine Simón Pedro, apostl kine te Jesucrist in chin ajbene te; in xi ntz'ibane jlu cyeye, akeye ma cyc'ame jun ocslabl tbanilxix ic tza'nx keye, porque tz'aklxix aju Clolke Jesucrist, aju Kdios. 2Tenxwit nim xtalbil cyeye ex tu'n tke'xix cyc'u'je, tu'nju ojtzki'n Dios cyu'ne tuc'ix Kajaw Jesús. 3Tu'n tipumal Dios ma tzaj k'o'n ke tcyakilju in ajben tu'n tten kchwinklal ex tu'n kniman te Dios; ma tzaj k'o'n jlu ke tu'nju ojtzki'n Dios ku'n, aju o txconte ke tu'n tajwalil ex tnabl tbanilxix. 4Tu'n jlu ma tzaj tma'n Dios ke jun yol tbanilxix ex ma' t-xilen; tu'n jlu tu'n tten kchwinklal junx tuc'il Dios, ex tu'n kel ok ti'j cybinchben xjal puro tz'il, porque in pon cyc'u'j ti'j mya ba'n. 5Atzun cyeye ja'lo, tz'oc tililx cyu'ne mya nok o'cx tu'n tten cyocslable, ax icx tu'n cytene ba'n tuj tcyakil; ex mya nok o'cx tu'n cytene ba'n tuj tcyakil, ax icx tu'n tten cyojtzkible; 6ex mya nok o'cx tu'n tten cyojtzkible, ax icx tu'n cyjac'unte cyibe; ex mya nok o'cx tu'n cyjac'unte cyibe, ax icx tu'n tten cypasense; ex mya nok o'cx tu'n tten cypasense, ax icx tu'n cynimane te Dios; 7ex mya nok o'cx tu'n cynimane te Dios, ax icx tu'n toc cyitz'in cyibe; ex mya nok o'cx tu'n toc cyitz'in cyibe, ax icx tu'n tten cyc'ujlalile. 8Porque ka ma cybinchaye tcyakil jlu ex ka ma che chmet-xix, mlay che oque te cy'aj, ex mlay che cyaj tene minti'wt twitz cyak'unbene tuj ojtzkibl te Kajaw Jesucrist. 9Atzun jun xjal minti' in tbincha'n tcyakil jlu, sjumj ti'j twitz, ex moẍ te; ex ma tzic' tna'l tu'n ka o tx'jet tuj til ojtxi. 10Cyja'tzun erman, tz'oc tililx cyu'ne tu'n tke'xix cyc'u'je tu'nju o che txquete tu'n Dios ex o che jaw sc'o'ne tu'n; porque ka ma cybinchaye jlu, mlayx che cub tz'ake. 11Cyja'tzun ctzajel k'o'n cyeye tu'n cyocxe tu'n tcyakil tzalajbil tuj jun cawbil te jumajx te Kajaw ex Clolke Jesucrist. 12Cyja'tzun, cucx cxel nma'ne jlu cyeye tu'n ttzaj cyna'ne, masque ba'n cyu'ne, ex tzyu'nxix cyu'ne aju yol axix toc at cyuc'ile. 13Porque ba'n tuj nwitze tu'n tjaw nc'asune cynable na'nxtok ncyime, 14porque ba'n wu'ne ch'ix tcyim nximlale tu'n taj wanmiye tuj cya'j, ic tza'n ma tzaj tma'n Kajaw Jesucrist weye. 15Ax icx c'oquel tilil wu'ne tu'n t-xi nma'ne jlu cyeye tu'ntzun cucx tu'n ttzaj cyna'ne, ncyimlenxiye. 16Porque ma txi kchic'ba'ne cyeye aju tipumal Kajaw Jesucrist ex ju tulel, mya jun yol la'jbil ma txi kma'ne cyeye ex mya jun sbubl, nok o'cx ma txi kma'ne cyeye porque o kile tajwalil Jesucrist tu'nx tbak' kwitze. 17O kile tej ttzaj tk'o'n Kman Dios nimbil te Jesús tuc'ix nim toclen, tzaj k'ajt Dios tuj t-spic'umal in koptz'aj wen, ex tma: Atzun Nc'wa'le jlu c'ujla'nxix wu'ne, in chin tzalaje ti'j, chi Dios. 18Ax ko'ye o binte ju yol lu tej ttzaj k'ma'n tuj cya'j, tej ktene tuc'il Jesús twi witz jatum cub ten Dios. 19Ax icx at jun yol kuc'il mas segurxix, aju cyyol ke t-sanjel Dios; ic tten ju yol lu ic tza'n ttxan tzaj in c'ant tuj klolj. Cyja'tzun, ba'n tu'n t-xi cyk'o'n cywi'ye ti'j acutzun in cub spic'un, ex acutzun in ja'wil ju che'w aju jakolte t-xe cya'j, tu'n t-spic'banjtz tuj cyanmiye. 20Pero tnejel tz'elx cynic'e ti'j jlu: Aju cyyol ke t-sanjel Dios tz'iban tuj Tu'jil mlay pujet ku'n tu'n kex knabl. 21Porque minti' e pacban ke t-sanjel Dios tu'n cyex cyajbil; nok o'cx te Dios in che ajben ke xjal lu, xi cyma'n ju yol aju tzaj tma'n Dios cye, porque ẍaklu'n ke tu'n Xewbaj Xjan.

will be added

X\