2 REYES 7

1Atzunte Eliseo xi ttzak'we'n: —Bintza aju tyol Kman chi in tma'n: Ax or jlu nchi'j, barat ctel twi arin ttzi tpwertil tnam Samaria, nok jun sak pwak twi' jun alm, ax icx sebad nok jun sak pwak twi' cabe alm. 2Atzunte xjal onil te rey xi ttzak'we'n te t-sanjel Dios: —Masque che jaket ke tventanil cya'j tu'n Kman, pero baka jacu tzul twi c'aẍjel ic tza'n ma tmaya. Atzunte Eliseo xi ttzak'we'n: —Oc tila'ya tu'n twitza, pero teya mlay wa'na ti'j, chi Eliseo. 3At cyaje xjal at tx'a'c cyi'j minti' k'anbil ti'j ate' ttzi tpwertil tnam, in cyma'n cyxolx: —¿Ti in bant ku'n nok k'uklko tzalu, nok in ko ayon ti'j tu'n kcyim? 4Ka ma cub kximan tu'n kocx tuj tnam ko cymel, porque at nim we'yaj tuj tnam; ex ka ax ma ko cub ke' tzalu, ax icx ko cymel. Mejor ko' tuj campament jatum ate' ke soldad aj Siria; ka minti' ma ko cub byo'n cyu'n, ko ank'il; ex ka ma ko cub byo'n, malo bant-x kcyim. 5Cyja'tzun, tej toc kax e jaw we' ex cub be cyu'n tu'n cypon tuj campament jatum ate'tok ke soldad aj Siria; pero tej cypon lak'e' nikayin, o cyil mi jun xjal at. 6Porque tbincha Kman tu'n cybinte ke cysoldad aj Siria tk'ajk'ajel carwaj in che ajben tuj k'oj, tuc'ix tk'ajk'ajel cykan chej cyjax soldad cyibaj, ex cyuc'ix nimcu soldad. Tu'ntzun jlu cub cyximan aj Siria ka ate rey cye aj Israel otok txi tk'o'n pwak cye ke rey cye aj Hetey, ex cye ke rey cye aj Ejipt, tu'n cytzaj ex tu'n cyoc tzokpaj cyi'j. 7Cyja'tzun, tej toc kax, e jaw we' ex e je'l ok, ex ax cyaj cyk'o'n cyja, xbalun ja, cyuc'ix ke cychej ex ke cybur, ex cyaj cycolin tcyakil ic tza'nx tten, tu'ntzun cycolpaj ex tu'n mi'n cynaj. 8Tejtzun cypon ke cyaje xjal at tx'a'c cyi'j tuj campament jatum otok che ten ke soldad aj Siria, e ocxtzun tuj jun xbalun ja, e oc ten wa'l ex c'al; etz cyi'n sak pwak ex k'an pwak ex xbalun, ex e je'x ewal te. E aj juntl maj, ex e ocx tuj juntl xbalun ja, ax icx cybincha, etz cyi'n ke ti'xti, ex e je'x ewal te. 9Pero ul tuj cyximbetz ex cyma: —Mya tuj tumel aju in kbincha'n. Aju k'ij lu jun k'ij tu'n t-xi k'ot jun ba'n tkanil, ex atzun ke minti' in kk'o'n tkanil. Ka ma cub kyo'n te nchi'jxi, at kil ti'j jlu. Mejor ko' ma tja rey k'malte tkanil. 10E ultzun, ex tzaj cytxco'n ke cwentil tnam ex xi cyma'n cye: —Ma ko'x aje tuj campament jatum ate'tok ke soldad aj Siria, pero mi jun xjal at, ex misicyer tk'ajk'ajel twi' jun xjal in yolin. O'cx ke chej ex ke bur c'alo'n, ex ke xbalun ja ate' ke ic tza'nx cyten. 11E je'xtzun ke xk'ukil ttzi tpwertil tnam k'malte tkanil cyuc'il keju ate' tuj tja rey. 12Jawtzun we' rey, masque te konic'an, ex xi tma'n cye keju at cyoclen ttxlaj: —Cxel nchic'ba'ne cyeye aju ma cub cyximan ke aj Siria ki'j. Ba'ntl cyu'n in ko yajlanjtz tu'n we'yaj, cyja'tzun ma che ex tuj campament jatum ate' ke, ma txi cyewan cyib tuj cojbil, ex in che ayon ki'j tu'n kex tuj tnam tu'ntzun ktzyet cyu'n itz'x ko', ex tu'n cyoctz tuj tnam, chi rey. 13Pero o tma jun cyxol keju at cyoclen ttxlaj rey: —E cytzaj k'it jwe' chej cyxol keju itz'x ke, e cyxi samet junjun xinak cyibaj, ex octzun kila' ti ma baj. Ka tu'n cyank'in ex ka tu'n cycyim keju che xel samet, pero mya mas ba'n ex mya mas ploj te cye cywitz mastl aj Israel, akeju che najel oc cycyaj ten tzalu. 14E tzajtzun k'i'n cabe carwaj cyuc'ix ke chej te jawolte cye, e je'xtzun sama'n tu'n rey tu'n cyxi lpe' cyi'j ke soldad aj Siria, ex xi tma'n cye yucul cye carwaj tu'n tbaj cyque'yin jatum ate' ke. 15E je'xtzun, ex ax e je'x lpe' ti'j texlen cykan aj Siria tejxi cypon ttzi nima Jordán, ex o cyil tuj tcyakil be at nim xbalun tuc'ix mastl ti'xti otok cyaj tz'ak cyu'n aj Siria, tu'n tlaj nok elacyim e je'l ok ke tu'n cycolpaj. E ajtztzun meltz'aj ke xjal otok che'x t-sama'n rey, ex xi cytx'olba'n te rey ti'j tcyakilju otok cyil tuj be. 16Atzun ke xjal tuj Samaria e je'x naj, ex tzaj cyi'n tcyakilju o cnet cyu'n tuj cycampament aj Siria. Ex atzun o japun ju yol otok tma Kman, o c'ayinjtz arin tu'n jun sak pwak twi' jun alm; ex jun sak pwak twi' cabe alm sebad. 17Xitzun tma'n rey te xjal aju at toclen ttxlaj tu'n tcub ten cwentil ttzi tpwertil tnam, pero bi'x cyaj tjak' cykan xjal ttzi tpwertil tnam, ex axtzun cyim, ic tza'nx otok tma t-sanjel Dios tej t-xi aj rey tuc'il. 18Cyja'tzun tten o bant jlu ic tza'nx otok tma t-sanjel Dios te rey, tej tmante ka ttzi tpwertil tnam Samaria tu'n tlak'et jun alm arin nok tu'n jun sak pwak twi', ex nok tu'n jun sak pwak tu'n tlak'et cabe alm sebad. 19Ex atzunte xjal aju at toclen ttxlaj rey otok txi ttzak'we'n te t-sanjel Dios: Masque che jaket ke tventanil cya'j tu'n Kman, pero baka jacu bant ic tza'n in tma'na, chi xjal. Atzunte Eliseo xi tma'n te ka attok tu'n tic' twitz ti'j, pero mya ajun tu'n twa'n ti'j. 20Ex o japun icju, porque bi'x o cyaj tjak' cykan xjal ttzi tpwertil tnam, ex bi'x cyim.

will be added

X\