2 REYES 6

1At jun k'ij xi cyma'n ke t-sanjel Dios te Eliseo: —Ba'n tu'na, aju ja jatum najlko' puro tal ch'in tuj. 2K'ontza ambil keye tu'n kxi'ye ttzi nima Jordán, ex teylex te junjun tu'n tcnet jun viga tu'n, tu'ntzun tbaj kbincha'ne jun ja ma chixin tu'n kten tuj, che chi. —Ba'n tu'n cyxi'ye, chi Eliseo xi ttzak'we'n. 3—Binchama xtalbil, txi'ya kuc'ile, chi jun cyxol. —Ba'n, jacu chinxe cyuc'ile, chi Eliseo. 4Xi'tzun Eliseo cyuc'il max ttzi nima Jordán, ex atzun e oc ten tx'emil tze'. 5Pero tej in tx'emin jun ti'j jun ttze', etz jilpaj tc'uxbil, ex xi tz'ak tuj nima. Cyja'tzun jaw sch'in: —Ay xnak'tzal, nok majen saj c'uxbil wu'ne ex ma txi tz'ak tuj nima. 6—¿Jatum xcu'x tz'ak? Chi Eliseo aju t-sanjel Dios. Tzajtzun tyec'un jatum cu'x tz'ak. Jawtzun ttx'emin Eliseo jun tal tze' ex xi t-xo'n tuj a', ex jaw ikan c'uxbil tibaj a'. 7—K'in jatza, chi Eliseo xi tma'n. Xitzun tnukpi'n tk'ab ex jatz ti'n tc'uxbil tuj a'. 8Ate rey cye aj Siria attok k'oj cyxol cyuc'il aj Israel, ex bant ti'j tu'n cyuc'il keju at cyoclen ttxlaj, alcyechak lugar jatum tu'n cycub ten ke t-soldad junjun maj. 9Xitzun t-sama'n Eliseo tkanil te rey cye aj Israel tu'n mi'n cyxi' tuj lugar lu, porque atzun cyja'tok cytzaj ke aj Siria. 10Cyja'tzun xi t-sama'n rey cye aj Israel ke t-soldad que'yilte tuj lugar ka axtok ate'ke, ic tza'nx otok tma t-sanjel Dios, ex cyja'ylex o tenba tu'n, ex cyja'tzun tten e clet nimcu maj. 11Aju rey cye aj Siria tzaj tk'oj tu'n jlu, e tzajtzun ttxco'n keju at cyoclen ttxlaj, ex xi tma'n cye: —Cymantze weye alcye jun ke ma txi tk'on tib te rey cye aj Israel. 12Xi ttzak'we'n jun cye: —Mi jun, Tat Rey. Ate Eliseo aju t-sanjel Dios at cyxol aj Israel, atzunju in k'mante te rey cye aj Israel ti'j tcyakilju yol in yolina ti'j max tuj tjaya jatum in tana. 13Xitzun tma'n cyrey aj Siria cye: —Cybime jatum ta', tu'ntzun cyxi nsama'ne junjun xinak tzyulte te. Tejtzun t-xi k'ma'n te ka atzun ta' tuj tnam Dotán, 14xi t-sama'n txkan soldad cyjax cyibaj chej tu'n cyten ma chixin, cyuc'ix carwaj in che ajben tuj k'oj, ex cyuc'ix txkan soldad; konic'an e pon tuj tnam Dotán, ex baj cytxolban cyib ti'jele tnam. 15Tejtzun kskix tuj juntl k'ij, jaw we' tmajen Eliseo, ex tej tetz, o til ke soldad cyjax cyibaj chej, cyuc'ix ke carwaj in che ajben tuj k'oj otok baj cytxolban cyib ti'jele tnam; xi'tzun k'malte te Eliseo cyja': —Xnak'tzal, ¿ti c'oquel ki'j ja'lo? 16Atzunte Eliseo xi tma'n te: —Mi'n xoba, porque mas nim ke at kuc'il twitzju cye at cyuc'il. 17Octzun ten Eliseo na'l Dios ex tma: In chin cubsane twitza Nman, tu'n tjaket twitz nmajene tu'na tu'ntzun tbant tque'yin. Jakettzun twitz majen tu'n Kman ex o til, lu twi witz nojni cyu'n soldad cyjax cyibaj chej, cyuc'ix ke carwaj in c'ant k'ak' cyi'j, ate' ti'jele Eliseo. 18Tej cyja'tok cyoc tzokpaj aj Siria ti'j Eliseo, oc ten na'l Dios ex tma: —In chin cubsane twitza Nman tu'n tcub tmoẍsa'na cywitz ke xjal lu. Cubtzun moẍix cywitz xjal tu'n Kman ic tza'nx otok txi tkanin Eliseo. 19Xitzun tma'n Eliseo cye aj Siria: —Mya a be k'i'n cyu'ne, ex mya a tnam jlu aju in che jyone ti'j. Che lpetze wi'je, ex jacu che'x nẍaklu'ne tuc'il ju xjal in che jyone ti'j. E je'xtzun ti'n Eliseo ke soldad lu tuj tnam Samaria. 20Tejtzun cypon ma chixin, oc ten Eliseo na'l Dios ex tma: Ja'lo Nman, jakoma cywitz tu'n tbant cyque'yin. Tejtzun tjaw cyque'yin cywitz, lu ate'tok tuj Samaria. 21Tejtzun cyilwaj tu'n rey cye aj Israel, xi tkanin te Eliseo: —¿Che belpe nbyo'ne ke jlu, Tat? 22Atzunte Eliseo xi ttzak'we'n: —Mi'n, mi'n che cub tbyo'na. ¿Baka in che cub tbyo'na keju in che tzyet tu'na tuj k'oj? K'onxa cywa ex cyc'a ex sama'n aja ke tuc'il cypatrón, chi Eliseo. 23Tbinchatzun rey jun nintz wa'n te cye; tejtzun cybaj wa'n ex tej cybaj c'a'n, xi tma'n rey cye tu'n cyaj meltz'aj ex e ajtzun tuc'il cypatrón. Ex bi'xtzun xi cycolin ke aj Siria tu'n cypon k'ojlel cyi'j aj Israel. 24Te tibajxi jlu, ate Ben-adad aju rey te Siria oc tchmo'n cycyakil ke t-soldad, e je'x ex baj cytxolban cyib ti'jele tnam Samaria, tu'n cyoc tzokpaj ti'j. 25Tzajtzun jun nintz we'yaj tuj tnam Samaria tu'nju baj cytxolban cyib aj k'oj ti'j, ex tu'ntzun jlu japun 80 sak pwak ti'j tbakil twi' jun bur, ex atzun ti'j jun lak ttxa palom, jwe' sak pwak japun ti'j. 26At jun k'ij in bettok rey cye aj Israel twi muro te tnam, ex xi sch'in jun xu'j ti'j ex tma: —Onina wi'je, Tat Rey. 27Atzunte rey xi ttzak'we'n: —Ka minti' in onin Kman ti'ja, ¿tza'ntzun tten taja tu'n wonine ti'ja? ¿Jacupetzun cnet triw te twaya wu'ne, ex ta'l twitz uva te tc'a'ya? 28¿Titzun ma baj ti'ja? Chi rey. Atzunte xu'j xi ttzak'we'n: —Aju xu'j lu tzaj tma'n weye: K'intza tala tu'n t-xi kchyo'n ja'lo, ex atzun weye wal cxel kchyo'n nchi'j, chi xu'j weye. 29Bajtzun ktzk'ajsa'ne aju weye wal ex baj kchyo'ne. Tujtzun juntl k'ij, xi nma'ne te tu'n ttzaj tk'o'n te tal tu'n t-xi kchyo'ne, atzun te ma tz'el tewan tal, chi xu'j. 30Tejtzun tbinte rey tyol xu'j, el t-sbit'un t-xbalun ti'j te jun techal ti'j tbis. Ex tu'nju tjaxtok twi muro te tnam, o cyil ke xjal ka ch'i'x twitz t-xbalun toc te tujxi. 31Tmatzun rey cyja': Tzajxwit nim ncastiwoye tu'n Dios ka mi'n sel ntx'emine twi' Eliseo tujx ju k'ij ja'lo, aju tcy'ajal Safat. 32K'ukltok Eliseo ma tja cyuc'il ke cytijil xjal. Otok txi t-sama'n rey jun cyxol ke xinak ate' tuc'il, pero tej na'nxtok tpon t-sanjel rey, xi tma'n Eliseo cye ke tij xjal: —Cyk'onque cwent ti'j rey byol xjal ma tzaj t-sama'n jun xjal tu'n tel tx'emin nwi'ye tu'n. Ex cyk'onque cwent ti'j oc tul xjal ma tzaj lajo'n, bix tz'ex cylamo'ne tlamel ja ex ax che oc tene tzyulte tu'n mi'n toctz tjako'n, porque k'ajk'aj tbinx tkan tpatrón lepchix ttzaj ti'j. 33Matok in yolin Eliseo cyuc'il ke tij xjal tej tpon t-sanjel rey twitz ex tma: —Tcyakilju mya ba'n ma tzaj ki'j, tu'n Kman ma tzaj tk'o'n. ¿Ti tten tu'n toc ke'tl nc'u'je ti'j? Chi t-sanjel rey.

will be added

X\