2 REYES 5

1Attok jun xinak Naamán tbi, nejenel cye t-soldad rey cye aj Siria. Aju xjal lu ma'xix toclen tuj twitz rey ex c'ujla'nxix tu'n, porque ate Kman otok tzaj onin te tu'n tcub cyi'j ke aj k'oj cyi'j aj Siria tu'n. Aju xinak lu cyuw tc'u'j tuj k'oj, pero yabtok tu'n jun wik tx'a'c minti' k'anbil ti'j. 2At jun c'loj soldad cye aj Siria, tej cyxi aj k'ojlel cyi'j aj Israel, tzaj cytzyu'n jun tal txin, ex oc te tmajen t-xu'jil Naamán. 3Aju tal txin lu xi tma'n te t-xu'jil Naamán: —Nokwit ba'n t-xi' npatrone tuc'il t-sanjel Dios at tuj Samaria, jacu banix tx'a'c ti'j. 4Xi'tzun Naamán tuc'il rey ex xi ttx'olba'n aju otok tma tal txin. 5Atzunte rey cye aj Siria xi ttzak'we'n: —Ba'n t-xi'ya, ex jacu txi nsama'ne jun u'j te cyrey aj Israel. Xi'tzun Naamán; xi ti'n wuk quintal tuc' 50 libr sak pwak, ex jun quintal tuc' 50 libr k'an pwak, tuc'ix laj pak xbalun, 6ex xi ti'n aju u'j te rey cye aj Israel, ex chi in tma'n tuj u'j: Aju til u'j lu tu'n tel tnic'a ti'j ka akine ma chinx samante Naamán. Aju xjal lu ajun cyxol keju at cyoclen ntxlaje, ex waje tu'n tbanix tu'na te jun wik tx'a'c minti' k'anbil ti'j. 7Tejtzun tjaw t-sch'i'n rey cye aj Israel aju u'j, el t-sbit'un t-xbalun te jun techal ti'j tbis, ex tma: —¿Baka Dios kine, tu'n tel wi'ne tchwinklal jun xjal, ex ka tu'n tjaw ank'in wu'ne, tu'nju ma tzaj sama'n jun xinak wuc'ile tu'n toc nk'anine ex tu'n tbanix tx'a'c ti'j wu'ne? Tz'elx cynic'e ti'j, aju xjal lu in jyon tumel tza'n tten tu'n tul k'ojlel wi'je, chi rey. 8Tej tbinte Eliseo aju t-sanjel Dios ka otok tz'el t-sbit'un rey t-xbalun ti'j, tu'n tlaj u'j otok pon sama'n tuc'il, xi t-sama'n jun tkanil te rey cyja': ¿Tiku'n ma tz'el t-sbit'un t-xbaluna ti'ja? E ttzaj ju xinak lu wuc'ile, ex c'elel tnic' ti'j ka at jun t-sanjel Dios cyxol aj Israel. 9Xi'tzun Naamán tuc'ix tcarwaj ex ke tchej, ex ax cub we' ttzi tja Eliseo. 10Atzunte Eliseo xi t-sama'n jun t-sanjel tu'n t-xi tma'n te Naamán cyja': Txi'ya, ex tx'jon baj tiba wuk maj tuj nima Jordán, ex aju t-ximlala cbanixel. 11Tzaj ttx'u'jil Naamán, ic'tzun ex tma: —Kape c'eletz ju xjal yolil wuc'ile, nchiwe, ex kape cbel we' tu'n tcubsan wi'je twitz Tdios, ex tu'n tbaj tmaco'n ju ntx'a'que, ex tejwitlo xbant icju, mawtlo chin banixe. 12Mas ba'n ke nima Abana ex Farfar, akeju ate' tuj Damasco, cywitz cycyakil nima at tuj cytx'otx' aj Israel. ¿Myapetzun mas ba'n awt ẍinxe tx'jol wibe cyuj ke nima lu tu'n nbanixe? Chi Naamán. In k'ojl wen tej tic' tuj lugar lu. 13Pero e pon lak'e' ke tmajen ttxlaj ex xi cyma'n te: —Tat, nokwit mas cyuwxix jun tumel saj k'ma'n teya tu'n t-sanjel Dios tu'n tbinchanteya, mawtlo bant tu'na. Yajtzun te jlu aju ma tma teya, nok ch'in t-xilen, tu'n ttx'jonte tiba tuj a' ex bi'x cbanixela, che chi majen. 14Xi'tzun Naamán, ex cu'x tlamon tib wuk maj tuj nima Jordán ic tza'nx otok tzaj k'ma'n te tu'n t-sanjel Dios, ex aju t-ximlal ic oc ic tza'n t-ximlal jun tal c'wa'l, ex bi'x banix. 15Ate Naamán cyuc'ix cycyakil xjal uc'in tu'n e je'x tu'n cypon tuc'il Eliseo. Tejtzun cypon tuc'il, xi tma'n Naamán te: —Ja'lo ma tz'el nnic'e ti'j, tuj tcyakil twitz tx'otx' minti' juntl Dios at aju axix toc Dios; nok o'cx aju Cydios aj Israel. Cyja'tzun in chin cubsane twitza tu'n t-xi tc'mo'na jun oyaj wu'ne, akine ajbel teya, chi Naamán. 16Atzunte Eliseo xi ttzak'we'n: —Cxel nma'ne jun yol axix toc twitz Kman aju in chin ajbene te, mlay tzaj nc'mone toyaja. Masque ela' maj xi tma'n Naamán, pero minti' cub tuj twitz Eliseo tu'n t-xi tc'mo'n. 17Xitzun tma'n Naamán te: —Ka icju, k'ontzniya ambil weye tu'n t-xi wi'ne cabe chej cytx'otx' aj Israel, porque mlay cub npatune ke alumaj ex mlay txi nk'o'ne chojbil te junxitl dios, nok o'cx te Kman. 18Nok o'cx in chin cubsane twitz Kman tu'n tcub tnajsa'n wile oc t-xi' rey aju npatrone tuj tja dios Rimón tbi tu'n tc'ulun twitz, tzul-lo tzyu'n nk'abe tu'n ex oclo chin bel ẍmeje'ye tuc'il tuj tja tdios; cuchiwt cub tnajsa'n Kman wile tu'n tlaj jlu, chi Naamán. 19Atzunte Eliseo xi ttzak'we'n te: —K'oncu beya, mi'n bisuna. Cubtzun be tu'n Naamán. 20Tej otok txi lak'e' ch'in, ate Giezi tmajen Eliseo aju t-sanjel Dios cub t-ximan: Nok cucx ma tz'aj Naamán aju aj Siria tu'n npatrone, ex minti' ma cyaj ti'n aju oyaj sul ti'n. Cxel nma'ne jun yol axix toc twitz Kman, chin xel kelane tu'n tpon cnet wu'ne, kape jacu tzaj tk'o'n jun oyaj weye. 21Xitzun lpe' Giezi ti'j Naamán tu'n tpon cnet tu'n; tejtzun tajtz tque'yin Naamán lepchix t-xi' Giezi ti'j, cu'tz naj tuj tcarwaj tu'n tc'monte, ex xi tkanin te: —¿Ti ma baj? 22—Mi'n, minti' jun ti'xti ma baj, chi Giezi xi ttzak'we'n, —pero ma chin tzaj sama'ne tu'n npatrone tu'n t-xi nma'ne teya at cabe cu'xun t-sanjel Dios ma ẍe ul ja'lo, ex ma ẍe tzaj tuj tiwitz tx'otx' cye Efraín, cyja'tzun in chin cubsane twitza tu'n ttzaj tk'o'na ox mil sak pwak tuc'ix cabe pak xbalun, chi Giezi. 23Atzunte Naamán xi ttzak'we'n: —Binchama xtalbil, k'inxa kak mil sak pwak. Nimxix o cubsan Naamán twitz Giezi tu'n t-xi tc'mo'n, ex cu'x tk'o'n tuj cabe sac junx tuc'il cabe pak xbalun, ex xi tk'o'n cye cabe tmajen tu'n t-xi cyi'n ex tu'n cycub nej twitz Giezi. 24Tejtzun cypon twi' tal witz, xitzun tc'mo'n Giezi aju sak pwak tuj cyk'ab ke tmajen Naamán, ocx tc'u'n tuj tja, ex baj tk'olben tib cyuc'il. 25Pontzun Giezi tuc'il Eliseo aju tpatrón, atzunte Eliseo xi tkanin te: —¿Jatum ma txi aja, Giezi? —Baka at jatum ma chinx aje, chi Giezi xi ttzak'we'n. 26Pero xi tma'ntl Eliseo te: —Ma tz'el nnic'e ti'j, at jun xinak xcu'tz tuj tcarwaj tu'n tc'monjtza tu'n. Baka a tk'ijlalil jlu tu'n ttzaj c'met pwak ex xbalun, ex baka a tk'ijlalil jlu tu'n tlak'et tkan awal ex ka tkan uva, ex ka ẍne'l ex ka wacẍ, ex ka majen xinak ex ka majen xu'j. 27Cyja'tzun, aju tx'a'c toctok ti'j Naamán nej, cjawil jlet ti'ja, ax icx cyi'j ke tiyjila te jumajx, chi Eliseo. Tejtzun tel tpa'n tib Giezi ti'j Eliseo, aju t-ximlal otok noj ti'j tu'n tx'a'c sak que'yin ic tza'n ttxa che'w.

will be added

X\