2 REYES 3

1Otok bant wajxaklaj abk'i ttzyetlen tcawin Josafat tuj Judá, tej ttzyet tcawin Joram aju tcy'ajal Acab cyibaj aj Israel ex o cawin cablaj abk'i tuj Samaria. 2Ke tbinchben mya ba'n e ela tuj twitz Kman, pero minti' pon tbinchben ic tza'n ke tbinchben ktzan tman ex ttxu', porque el ti'n aju abj tilbilal Baal aju otok baj tbincha'n tman. 3Masque icju, pero ax il o tbincha ic tza'n ke il o tbincha Jeroboam aju tcy'ajal Nabat, akeju e binchan aj Israel il tu'n. 4Ate Mesa aju rey cye aj Moab o'cx tak'un te almil ẍne'l, ex at tu'n t-xi tk'o'n chojenj te rey cye aj Israel; jun syent mil tal tman ẍne'l ex jun syent mil tman ẍne'l nne'l lan cyi'j. 5Pero tej tcyim Acab, jawtzun ti'n tib rey cye aj Moab ti'j rey cye aj Israel. 6Etztzun rey Joram tuj Samaria ex e baj tchmo'n cycyakil ke soldad aj Israel. 7Ex xi t-sama'n Joram tkanil te rey te Judá cyja': Aju rey cye aj Moab ma jaw ti'n tib wi'je, ¿Mlaype txi'ya wuc'ile k'ojlel ti'j? Tzaj ttzak'we'n Josafat aju rey te Judá cyja': Jacu chinxe tuc'ila, cyuc'ix ke nsoldadiye ex cyuc'ix keju cyjax cyibaj ncheje, lu ko'ye te tuc'ila ex te cyuc'il ke t-xjalila. 8Pero, ¿alcye be cxel ki'n? Chi Josafat. Xi ttzak'we'n Joram cyja': Tuj be in xi' tuj lugar tzkij tx'otx' te Edom. 9Cyja'tzun, cub be tu'n rey cye aj Israel tuc'ix ju rey cye aj Judá ex tuc'ix ju rey cye aj Edom. Pero tu'nju e bet wuk k'ij, baj ju a' k'i'n cyu'n tu'n tajben cye soldad ex cye alumaj. 10Tmatzun Joram aju rey cye aj Israel cyja': —Mer ic tza'n ma ko tzaj ti'n Kman, ako' rey ox kbaj, tu'n kxi tk'o'n tuj cyk'ab aj Moab. 11Xitzun tkanin Josafat: —¿Minti'pe jun t-sanjel Dios at tzalu, tu'n t-xi tkanin te Kman alcye tu'n tbant ku'n? Chi Josafat. At jun cye keju at cyoclen ttxlaj rey cye aj Israel tma: —Atzun ta' Eliseo tzalu aju tcy'ajal Safat, aju ajben te Elías, chi xjal. 12—Jaculo tzaj tma'n ke jun yol tzajni tuc'il Kman, chi Josafat xi ttzak'we'n. Jurattzun xi' rey cye aj Israel, tuc'ix Josafat ex tuc'ix ju rey cye aj Edom, tuc'il Eliseo; 13Atzunte Eliseo xi tma'n te rey cye aj Israel: —¿Ti woclene ti'ja? Txi'ya kanil onbil cye t-sanjel cydios ktzan tmana ex ttxu'ya. Atzunte rey cye aj Israel xi tma'ntl: —Mlay, porque ate Kman ma tzaj k'inte keye, ako'ye rey ox kbaje, tu'n kcub tz'ake tuj cyk'ab aj Moab. 14Xitzun tma'n Eliseo: —Cxel nma'ne jun yol axix toc twitz Kman aju Tajaw Tcyakil, aju in chin ajbene te, nokwit minti' in chin nimane te Josafat aju rey te Judá, mlaywitlo txi nbi'ne tyola ex minti'wtlo ma txi nque'yine twitza. 15Pero ba'n tu'n ttzaj cyi'ne jun xjal ba'n chimban ti'j arpa, chi Eliseo. Ex tej toc ten xjal chimbal, ultzun T-xew Kman tuc'il Eliseo, 16ex xitzun tma'n Eliseo: —Chi Kman ma tma: Cylacuncuxe nimcu jul te chembil a' tuj chk'ajlaj lu, 17masque minti' cyk'ik' ex minti' jbal oc cyila'ye, pero aju chk'ajlaj lu cnojel tu'n a', ex cycyakiltzune che c'ale a', ax icx ke cywacẍe ex cycheje. 18Ex a jlu nok ch'in t-xilen tuj twitz Kman, porque ax icx che tzajel tk'o'n ke aj Moab tuj cyk'abe, 19ex cbajel cyxitune cycyakil tnam toc muro cyi'j ex ke tnam ma' cyoclen, ex cjawil cytx'emine tcyakil tze' ba'n tlo'njtz twitz, cmaksetel tcyakil twi a' cyu'ne, ex tcyakil tx'otx' jatum in cub awal che nojel tu'n abj cyu'ne, chi Eliseo. 20Ex o japun tcyakil jlu. Tuj juntl k'ij te prim, tuj or oc in xi k'ot oyaj, cyja' ttzaj a' tumlal Edom, ex o noj twitz tx'otx' tu'n. 21Tejtzun cybinte aj Moab ka cyja'tok cyxi' ke rey tu'n cyoc tzokpaj cyi'j, baj cychmon cyib cycyakil, tza'nx ke cu'xun otok pon cyipun tu'n cyxi' tuj k'oj, ax icx ke tij xjal, ex atzun e cub ten jatum ponin tmojonil cytx'otx'. 22Tuj juntl k'ij te prim, tej cyjaw we', in koptz'aj tkan k'ij tibaj a', ex tej t-xi cyque'yin aj Moab, puro chic' ela tuj cywitz. 23Cymatzun: Chic' te jlu. Aju ma baj, ax ke rey ma che k'ojin cyxolx, ex ma baj cybyon cyib jun tuc'il juntl. Akeye aj Moab, ko' k'ilte ke ti'xti ma che cyaj cyk'o'n, che chi. 24Pero tej cypon aj Moab ttxlaj cycampament ke soldad aj Israel, e oc tzokpaj ke aj Israel cyi'j ex e je'l ok. E je'xtzun lpe' aj Israel cyi'j ex e cub cybyo'n. 25Ex cub cyxitun ke tnam, baj cynojsa'n ke tx'otx' tu'n abj jatum in cub awal, baj cynojsa'n cycyakil twi a', ex jaw cytx'emin tcyakil tze' ba'n tlo'njtz cywitz. O'cx tnam Kir-hareset cyaj ten. Pero ke xinak k'i'n xobl plech cyu'n, baj cytxolban cyib ti'jele ex e oc tzokpaj ti'j. 26Tejtzun tel tnic' rey cye aj Moab ti'j ka ch'ixtok tcub ti'j, tzajtzun ti'n wuk syent soldad k'i'mlex spad cyu'n, tu'ntzun cyex cyxol ke soldad aj k'oj, tu'n cypon jatum ta' ju rey te Edom, pero minti' o bant icju. 27Tzajtzun ti'n aju nej tcy'ajal, aju attok toquel te rey te t-xel, ex xi tk'o'n te jun chojbil patun in cub max tibaj muro. Tzaj nimxix k'oj cyi'j aj Israel, jawtzun cyi'n ke ja xbalun jatum cycubsa'n tuj, ex e aj tuj cytanmi.

will be added

X\