2 REYES 21

1Toctok Manasés twi' cablaj abk'i tej toc te rey ex o cawin 55 abk'i tuj Jerusalén. Aju ttxu' Manasés Hepsiba tbi. 2Pero mya ba'n e ela ke tbinchben tuj twitz Kman, porque o tbincha axju mya ba'n in cybincha'ntok ke nasyon otok che ex tlajo'n Kman cywitz aj Israel. 3E jaw tbincha'n juntl maj ke ja te cyc'ulbil xjal cywi' ke witz, akeju otok che cub t-xitun Ezequías aju ktzan tman; e jaw tbincha'n ke altar twitz tilbilal Baal, ex cub tbincha'n jun tilbilal xu'j dios Asera, ic tza'n o tbincha Acab aju rey cye aj Israel; ax icx o c'ulun twitz k'ij, twitz xjaw ex cywitz cycyakil che'w. 4Ex e jaw tbincha'n ke altar tuj tja Kman, jatum otok tma Kman ka atzun tu'n ttzaj na'n tbi te jumajx tuj Jerusalén. 5Jaw tbincha'n txkantl altar tuj tnejel ex tuj tcabin ttxa'n tpe'n tja Kman, ex e ajben tu'n tu'n cyc'ulun xjal twitz k'ij, twitz xjaw ex cywitz cycyakil che'w. 6Ax icx cub tpatun tc'wa'l te chojbil, o xnak'tzan ti'j tu'n tbant tk'ijin ex tu'n cytxquet cyanmi cyimni tu'n, ex e oc tk'o'n ke xjal spiritist ex ke xjal ba'n che cy'a'n tu'n cyten cyxol xjal. Jumajx mya ba'n e ela ke tbinchben tuj twitz Kman, ex tu'n jlu tzaj tk'oj Kman ti'j. 7Ax icx ocx tk'o'n tuj tja Dios jun tilbilal xu'j dios Asera, aju baj tbincha'n. Ex otok tma Dios te David ex te Salomón aju tcy'ajal cyja': Aju tja Dios at tuj Jerusalén, aju tnam o jaw nsc'o'ne cyxol cycyakil c'loj cyiyjil aj Israel, atzun ctzajel na'n nbiye tuj te jumajx. 8Mlay che ex nlajo'ntle ke aj Israel tuj tx'otx' xi nk'o'ne cye ke cyxe'chel ka ma che japun nleye cyu'n, ex ka ma cybincha tcyakil aju o txi nma'ne cye, ex ka ma japun cycyakil nxnak'tzbile cyu'n, aju xi tma'n nmajene Moisés cye, chi Dios. 9Atzun cye minti' xi cybi'n. A Manasés xi k'inte cye tuj be mya ba'n, ex mas nim mya ba'n o cybincha ic tza'n in cybincha'ntok ke nasyon otok che naj tu'n Kman cywitz. 10Cyja'tzun tzaj yolin Kman cyuc'il ke t-sanjel, akeju tmajen, chi cyja': 11Ma tbincha Manasés nimcu mya ba'n, mas nimxix mya ba'n ma tbincha ic tza'n in cybincha'n aj Amorrey, akeju ate'tok tuj tx'otx' nej. Ex tu'n Manasés ma che binchan aj Judá il, tu'nju ma che oc ten c'ulul cywitz tilbilal cydios xjal. 12Tu'ntzun jlu, akine Cymane, aju Cydios aj Israel, in chin k'mante jlu: Ctzajel wi'ne mya ba'n cyibaj aj Jerusalén ex cyibaj aj Judá, ocxi tel twinkil cyẍcyin keju che bil ti'j. 13Cbel nxitune tnam Jerusalén ic tza'n o tenba tnam Samaria wu'ne, ex bi'x che najel ke aj Jerusalén wu'ne, ic tza'n o tenba Acab wu'ne cyuc'ix ke tiyjil. Cyjel ten tnam Jerusalén misicyer jun xjal tuj, ic tza'n in baj tx'jet jun plat, nne'l su't a' ti'j ex in cub mutzbat. 14Atzun ch'intl tnam xjal etzan wu'ne, che cyjel ncoline ex che xel nk'o'ne tuj cyk'ab ke aj k'oj cyi'j, tu'ntzun tel k'i'n tcyakilju at cye ex tu'n tcub cyi'j cyu'n. 15Porque aju cybinchben puro mya ba'n ma tz'el tuj nwitze, ex cucx in tzaj nk'oje cyu'n, atxix tuj k'ij tej cyetz wi'ne ke cyxe'chel tuj Ejipt ex cucx ja'lo, chi Dios. 16Tu'n cylaj ke il tbincha Manasés, cyja'tzun e binchan ke aj Judá il tu'n. Tu'ntzun jlu, jumajx mya ba'n e ela ke cybinchben tuj twitz Kman. Mya o'cx jlu, ax icx e cub tbyo'n Manasés nimcu xjal minti' cyil tuj Jerusalén, ex o noj enter tnam Jerusalén tu'n cychc'el xjal. 17Aju ch'intl tx'olbaben ti'j Manasés ex ti'j tcyakilju o tbincha, cyuc'ix ke il e bant tu'n, atzun tz'iban tuj u'j jatum ta' tcyakil tx'olbaben cyi'j cyak'unben ke rey cye aj Judá. 18Tejtzun tcyim, cu'x maku'n t-xol tkan awal te tja rey, aju tkan tawal Uza. Te tibajxi aju o cawin te t-xel, atzun Amón aju tcy'ajal. 19Toctok Amón twi' 22 abk'i tej toc te rey, ex o cawin cabe abk'i tuj Jerusalén. Aju ttxu' Amón Mesulemet tbi, aju aj Jotba, ex tme'jel Haruz. 20Pero jumajx mya ba'n e ela ke tbinchben tuj twitz Kman, ic tza'nx ke tbinchben Manasés aju ktzan tman, 21porque xi lpe' ti'j mya ba'n tbincha ktzan tman, ex o c'ulun cywitz ke tilbilal akeju otok c'ulun ktzan tman cywitz. 22Cyja'tzun cyaj tcolin Amón Kman, aju Cydios ktzan t-xe'chel, ex minti' xi tniman tyol. 23Ke xjal at cyoclen ttxlaj jaw cyi'n cyib ti'j ex cub cybyo'n tuj tja, aju tja rey. 24Pero ke tnam xjal e cub cybyo'n keju otok che cub byonte te rey Amón, ex oc cyk'o'n Josías aju tcy'ajal, te rey. 25Aju ch'intl tx'olbaben ti'j Amón ex ti'j tcyakilju o tbincha, atzun tz'iban tuj u'j jatum ta' tcyakil tx'olbaben cyi'j cyak'unben ke rey cye aj Judá. 26Cu'x maku'n Amón tuj tpantyón tcub tuj tkan tawal Uza. Te tibajxi aju o cawin te t-xel, atzun Josías aju tcy'ajal.

will be added

X\