2 REYES 16

1Otok bant wuklaj abk'i ttzyetlen tcawin Peka aju tcy'ajal Remalías, tej ttzyet tcawin Acaz aju tcy'ajal Jotam, aju rey te Judá. 2Toctok Acaz twi' winkin abk'i tej ttzyet tcawin, ex o cawin kaklaj abk'i tuj Jerusalén, pero mya ba'n e ela ke tbinchben tuj twitz Kman aju Tdios; minti' o tbincha ic tza'nx te David aju ktzan t-xe'chel, 3nok o'cx xi lpe' ti'j cybinchben ke rey cye aj Israel, asta cub tpatun tcy'ajal te chojbil ic tza'nx costumr ic'bilxix in cybincha'n ke nasyon, akeju otok che ex tlajo'n Kman cywitz aj Israel. 4Ax icx xi tk'o'n ke chojbil ex cub tpatun storac cyuj ke ja in che ajben te cyc'ulbil xjal cywi' ke witz, icx cywi' ke tal witz ex cyjak' cycyakil tze' pin cyxak. 5Tuj tk'ijlalil lu, ate Rezín aju rey te Siria, tuc'ix Peka aju tcy'ajal Remalías, aju rey cye aj Israel, e je'x tuj Jerusalén tu'n cyoc tzokpaj ti'j rey Acaz, ex baj cytxolban cyib ti'jele tnam, pero minti' cub ti'j cyu'n. 6Tzyet tnam Elat tu'n rey te Siria tu'n toc te cye aj Siria, e ex cylajo'n aj Siria ke aj Judá tuj tnam Elat. Atzun e ul aj Edom ex axtzun e cyaj ten najal tuj, ex ax ate' ja'lo. 7Atzunte Acaz xi t-sama'n junjun sanjel tuc'il Tiglat-pileser aju rey te Asiria, tu'ntzun t-xi cyma'n te cyja': Akine ajbel teya mer ic tza'n jun tcy'ajala kine. Cyja'tzun tzaja ex chin tcloma twitz rey te Siria ex te rey cye aj Israel, akeju niban cyoc tzokpaj wi'je. 8Ax icx tzaj ti'n Acaz sak pwak tuc'ix k'an pwak at tuj tja Kman, ex cyuc'ix ke k'inumabl ate' tuj tja rey, ex xi t-sama'n te jun oyaj te rey te Asiria. 9Tzajtzun tbi'n rey aju tkanbetz, oc tzokpaj ti'j tnam Damasco ex tzyet tu'n; te tibajxi e je'x tpresin ke xjal najl tuj, atzun e pon ti'n tuj tnam Kir, ex cub byo'n Rezín tu'n. 10Tejtzun t-xi' rey Acaz tuj tnam Damasco tu'n tc'ulbante tib tuc'il Tiglat-pileser aju rey te Asiria, o til aju altar at ma chixin. Cubtzun tbincha'n jun tilbilal altar twitz jun u'j, ex xi t-sama'n tu'n tpon tuc'il pal Urías tu'ntzun tcub tbincha'n jun altar ic tza'nx jlu. 11Cubtzun tbincha'n Urías jun altar ic tza'nx tilbilal otok tzaj t-sama'n rey Acaz max tuj Damasco. Tej tul meltz'aj rey Acaz, otok baj bant altar tu'n Urías. 12Tejtzun tul meltz'aj rey tajtzlenxi tuj Damasco, o til ju altar otok baj bant, xitzun lak'e' ti'j ex cub tk'o'n oyaj tibaj. 13Ex cub tpatun jun chojbil tibaj, tuc'ix toyaj ti'j twitz awal, cub tko'n toyaj ta'l twitz uva tibaj altar, ex xi ttx'itpu'n cychc'el ke alumaj tibaj, akeju e je'x tk'o'n te chojbil te mojbabl tibil. 14Atzunju altar k'an c'uxbil, aju tcub twitz tja Kman, aju cyaj ten t-xol ac'aj altar tuc'il tja Kman, el ti'n Acaz tuj tlugar ex cub tk'o'n tumlal tbank'ab k'ij te ac'aj altar. 15Te tibajxi xi tma'n te Urías cyja': Ja'lo, tibaj ac'aj ma tij altar cbel tpatuna oyaj aju patun in cub te prim, tuc'ix oyaj ti'j twitz awal in xi k'ot te kale, tuc'ix toyaj rey patun in cub, ex toyaj ti'j twitz awal, tuc'ix cyoyaj tnam xjal patun in cub, ax icx cyoyaj ti'j twitz awal ex ti'j ta'l twitz uva; ax icx cxel ttx'itpu'na tibaj altar tcyakil cychc'el ke oyaj patun in che cub, ex keju in che'x k'o'n te chojbil. Atzunju altar k'an c'uxbil, o'cx tu'n tajben te weye tu'n nk'ijine, chi Acaz. 16Tbinchatzun pal Urías tcyakil aju tma rey Acaz te. 17Eltzun ti'n rey Acaz ke tcyajil pac' cytxlaj cycyakil cyk'ukbil tcubil a', ex el ti'n aju nintz pil tcub cyibaj ke tilbilal wacẍ k'an c'uxbil ke, akeju tzyulte nintz pil, ex cub tk'o'n tibaj txkan abj bincha'maj. 18Ex tu'n ttzalaj rey te Asiria ti'j, el ti'n twitz tja Kman aju wa'lbil tuc'ix ju xmuj tjawtok tibaj, aju otok jaw bincha'n tu'n tajben tuj k'ij te ojlabl, ex cyaj tlamo'n ttzi ja tetz ti'jtzi, aju in ajben te rey tu'n tocx tuj tja Dios. 19Aju ch'intl tx'olbaben ti'j Acaz ex ti'j tcyakilju o tbincha, atzun tz'iban tuj u'j jatum ta' tcyakil tx'olbaben cyi'j cyak'unben ke rey te Judá. 20Tejtzun tcyim, cu'x maku'n cyxol ktzan t-xe'chel tuj tnam Ttanmi David tbi. Te tibajxi aju o cawin te t-xel, atzun Ezequías aju tcy'ajal.

will be added

X\