2 REYES 11

1Tejtzun tbinte Atalía aju ttxu' Ocozías ka otok cyim tal, e cub tbyo'n cycyakil tcy'ajal ktzan rey Ocozías. 2Pero ate Josaba, aju tanb ktzan Ocozías ex tme'jel ktzan rey Joram, etz k'inte Joás aju tcy'ajal Ocozías cyxol ke mastl tcy'ajal rey, akeju cyja'tok cycub byo'n, el tewan twitz Atalía, junx tuc'il ju xu'j cwentil te, ex e ocx tk'o'n tuj jun tal cwart. Cyja'tzun minti' cub byo'n, 3ex atzun ocx ewan Joás kak abk'i tuj tja Kman junx tuc'il ju xu'j ch'isal te. Ex atok te Atalía in cawin cyibaj aj Judá. 4Tujtzun twukin abk'i xi tma'n Joiada tu'n cyxi txocbaj ke capitán cyuc'ix ke xk'ukil tja rey, e ocx ti'n tuj tja Kman, ex bant ti'j jun yol tu'n cyuc'il, tu'n ttzaj cyma'n jun yol axix toc tuj tja Kman, ex tzajtzun yec'un Joás cye, aju tcy'ajal ktzan rey, tu'n Joiada. 5Ex xi tma'n cye: Atzun jlu cbantel cyu'ne: Te ox c'loj c'elel cybaje, jun c'loj cybaje c'oquel ten xk'ukil tja rey tuj k'ij te ojlabl; 6atzun juntl c'loj che bel ten jatum ta' pwert Shur tbi; atzun juntl c'loj che bel ten twitz pwert ti'jxi cwartel cye ke xk'ukil. Cyja'tzun cte'la tu'n t-xk'ukinjtz tja rey cyu'ne. 7Ax icx, aju cabe c'loj xk'ukil cjawitz cyturn tuj k'ij te ojlabl, ax che xe'l xk'ukil tuj tja Kman jatum ta' rey. 8Ex atzun cyeye c'oquel cytxolban cyibe ti'jele rey, ex teyle junjun tzyu'n tmacbil aju in ajben tuj k'oj, ex ka at jun ma tz'ocx tlamon tib cyxole, bi'x cymel. Atzun cyeye che xe'le tuc'il rey nok jatum oc t-xi'. 9Atzun cye capitán o cybincha tcyakil ic tza'n otok tma pal Joiada. Teyle junjun capitán cyuc'ix ke soldad ate'tok tuj cycwent e pon tuc'il pal Joiada, tza'nxix keju in che ocx xk'ukil tuj k'ij te ojlabl, ax icx keju in jatz cyturn. 10Xitzun tk'o'n pal ke lans cye ke nejenel cye soldad, cyuc'ix ke makbil in che ajben tuj k'oj, akeju tetok rey David nej, ex atzun ate'tok tuj tja Kman. 11E cubtzun ten ke xk'ukil tuj cylugar, xi'x ke' tuj tbank'ab tja Kman ex pon baj tuj tnayaj, ex e cub ten ti'jele altar, ex teyle junjun k'i'n tmacbil in ajben tuj k'oj tu'n cycwentin ti'j rey. 12Etztzun ti'n Joiada aju tcy'ajal rey, jax tk'o'n coron tuj twi' ex xi tk'o'n jun copya te ley te. Te tibajxi jax tko'n aseyt tuj twi' ex tma ka otok tz'oc te rey. Cycyakiltzun jaw txak'an cyk'ab ex e jaw sch'in cyja': Ba'nwt tz'el tk'ija, aya rey. 13Tejtzun tbinte Atalía in che sch'intok ke soldad xk'ukil tja rey, ax icx ke xjal, xi'tzun tuj tja Kman jatum ate'tok cycyakil xjal. 14O til, lu rey wa'lcub ttxlaj tkan ja, ic tza'nx in bant cyu'n oc nno'c jun rey. Ex ate'tok ke nejenel ttxlaj, cyuc'ix ke xjal ba'n che k'ajtzan chun, ex lu ke xjal nimxix in che tzalajtok ex in che k'ajtzantok cyi'j ke chun. Eltzun t-sbit'un t-xbalun Atalía, ex jaw sch'in cyja': —Ma che oc meltz'aje wi'je. Ma che oc meltz'aje wi'je. 15Xitzun tma'n Joiada cye ke capitán cye soldad: —Cyi'n exa xu'j lu cyxole, ex cybyo'ncuye keju che xel lpe' ti'j, chi Joiada. Tu'nju otok tma pal tu'n mi'n tcub byo'n xu'j tuj tja Kman, 16cyja'tzun, tzaj cytzyu'n ex xi cyi'n ttzi cyja chej, jatum ta' tja rey, ex atzun cub cybyo'n. 17Te tibajxi, xi tcyuwsa'n Joiada te rey ex cye tnam xjal tu'n cyoc te jun tnam etzan tu'n Kman, ax icx xi tma'n tu'n tbant ti'j jun yol tu'n rey cyuc'il tnam xjal. 18E je'xtzun cycyakil tu'n cypon tuj ja te c'ulbil te Baal ex cub cyxitun, cub cyxitun ke altar cyuc'ix ke tilbilal in che c'ulun twitz. Atzunte Matán, aju pal in ajben twitz Baal, ax cub cybyo'n cywitz altar. E cubtzun tk'o'n Joiada ke xk'ukil tuj tja Kman; 19e tzajtzun ti'n ke capitán cye soldad, cyuc'ix ke xk'ukil tja rey, cyuc'ix cycyakil tnam xjal, ex etz k'i'n rey cyu'n tuj tja Kman ex pon cyi'n max tuj ja jatum in che cawin rey, ocxtzun ttzi ja jatum cycubsa'n ke xk'ukil, ex cubtzun ke' Joás tuj k'ukbil te cawbil, 20ex cycyakil tnam xjal e jaw tzalaj. Tu'nju otok cub byo'n Atalía tu'n spad tuj tja rey, cyja'tzun, cycyakil xjal e cyaj ten tuj tzalajbil, akeju ate' tuj tnam. 21Toctok Joás twi' wuk abk'i tej ttzyet tcawin.

will be added

X\