2 REYES 10

1Attok 70 tcy'ajal Acab ate'tok tuj Samaria, cyja'tzun cub ttz'iban Jehú ke u'j ex xi t-sama'n cye ke xjal at cyoclen tuj tnam, tuc'ix cye ke cytijil xjal ex cye keju cyocsa'n te cwentil cye ke tc'wa'l Acab, ex chi in tma'n cyuj u'j cyja': 2Cyuc'ile ate' ke tcy'ajal cypatrone, cyuc'ix ke chej ex ke carwaj in che ajben tuj k'oj, tuc'ix tnam toc muro ti'j ex cyuc'ix ke macbil in che ajben tuj k'oj; octzun tpon u'j lu cyuc'ile, 3cysc'o'n jawe cyxol ke tcy'ajal cypatrone Acab aju mas mejor ex at-xix tnabl, cyk'o'n ocxe tuj tk'ukbil ktzan tman tu'n tcawin, ex che k'ojine tu'n cyclet ke tcy'ajal cypatrone, chi u'j. 4Tzaj nimxix cyxobil tu'n jlu ex cyma: Minti' e xcye' cabe rey ti'j, ¿tza'ntzun tten tu'n kxcye' ke ti'j? 5Atzunte mayordom tuj tja rey, tuc'ix gobernador tuj tnam, cyuc'ix ke cytijil xjal ex cyuc'ix ke xjal cyocsa'n te cwentil cye ke tcy'ajal rey, xi cysama'n tkanil lu te Jehú: Lu ko'ye lu, jacu ko ajbene teya, ex jacu kbinchaye tcyakil aju ctzajel tma'na, pero mlay tz'oc kk'o'ne toclen jun tcy'ajal ktzan Acab tu'n toc te rey. Binchama nok alcye ba'n tuj twitza, che chi. 6Xitzun ttz'iban Jehú juntl u'j, ex chi cyja': Ka cyk'on cyibe wuc'ile ex ka cyaje tu'n t-xi cynimane ke orden che xel nk'o'ne, tlokju nchi'j bix che tzaje wuc'ile tuj Jezreel ex cyi'ntze cywi' ke tcy'ajal cypatrone. Setenta cybaj ke tcy'ajal rey Acab ate'tok tuj tnam cyuc'il ke xjal ma' cyoclen, akeju otok che ch'isante cye. 7Tejtzun cyc'monte ke xjal aju u'j lu, tzajtzun cytzyu'n ke 70 tcy'ajal rey ex e cub cybyo'n; cu'xtzun cyk'o'n ke cywi' tuj junjun chi'l ex xi cysama'n tuc'il Jehú tuj Jezreel. 8Pontzun jun sanjel ex xi tma'n te Jehú: —Ma che ul k'i'n cywi' ke tcy'ajal rey. Xitzun tma'n Jehú: —Te cabe byuj tz'el cyu'ne, ex cyk'on cube ttzi tpwertil tnam, ex axtzun cyk'on cyaje te nchi'j. 9Te prim te juntl k'ij etz Jehú, cub we' ex xi tma'n cye cycyakil tnam xjal: —Cyeye minti' cyile. Akine in cub ximante tu'n tjaw wi'n wibe ti'j npatrone ex o cub nbyo'ne; pero ¿alcye ma cub byonte cye cycyakil jlu? 10Tz'elx cynic'e ti'j, mi jun yol minti'wt ma japun aju o tma Kman cyi'j ke tcy'ajal rey Acab. Ax te Kman ma binchante ic tza'nx ju tyol o k'manjtz tu'n Elías aju tmajen, chi Jehú. 11Ex tuj Jezreel e cub tbyo'n cycyakil mastl tiyjil Acab, cyuc'ix cycyakil ke xinak ma' cyoclen, cyuc'ix ke xjal tamiwxix tib Acab cyuc'il, ex cyuc'ix ke pal in che ajben te. Mi jun o cyaj ank'in tu'n. 12Te tibajxi xi' tuj Samaria, ex tmij be jatum ta' ju ja in che ten ke pastor tuj, 13oc noj cyi'j ke terman Ocozías aju rey te Judá. Xitzun tkanin Jehú cye: —¿Alcye keye? Atzun cye tzaj cytzak'we'n: —Terman Ocozías ko'ye, ex ma ko'xe k'olbel cye ke tcy'ajal rey Joram ex cye ke tal xu'j rey Jezabel. 14Xitzun tma'n Jehú cye ke xjal ate' tuc'il: —Cytzyu'ntze ke. E tzajtzun tzyu'n cyu'n ke xjal otok che oc lpe' ti'j Jehú, ex eltzun cytx'emin cywi' ttzi xoch tcub jatum ta' ju ja in che ten ke pastor tuj. 42 cybaj ke xinak, ex mi jun cye jlu o cyaj ank'in. 15Tejtzun tic' Jehú tuj lugar ma chixin, oc noj ti'j Jonadab aju tcy'ajal Recab, cyja'tok ttzaj tu'n tul tuc'il. Xi k'olben Jehú te ex tma: —¿Ba'npe t-ximbetza wi'je, ic tza'nx weye nximbetz ti'ja? —Ba'nwe nximbetz ti'ja, chi Jonadab xi ttzak'we'n. —Katzun icju, chuxni k'ontz tk'aba, chi Jehú. Xitzun tk'o'n tk'ab Jonadab ex jax k'i'n tu'n Jehú tuj tcarwaj, 16ex tma: —Ko' wuc'ile ex jacutzun tila aju nganiye ma tzaj tu'n tbant tajbil Kman wu'ne. Cyja'tzun xi k'i'n Jonadab tu'n Jehú tuj tcarwaj. 17Ex tejtzun tpon Jehú tuj Samaria, e cub tbyo'n cycyakil ke tiyjil Acab, akeju otok che cyaj ank'in. E cub baj cycyakil, ic tza'nx otok tma Kman te Elías. 18Te tibajxi jlu oc tchmo'n Jehú cycyakil tnam xjal ex xi tma'n cye: —Ate Acab myaxix nim o c'ulun twitz Baal, atzun weye nimxix chin c'ulule twitz. 19Cyja'tzun, ba'n tu'n cytzaj cytxco'ne cycyakil ke t-sanjel Baal, cyuc'ix ke xjal in che c'ulun twitz, ex cyuc'ix cycyakil ke pal in che ajben te, mi jun tu'n tcyaj ten, porque ma bant tten jun nintz chojbil wu'ne te nimbil te Baal. Ka at jun minti' ma pon, cbel t-sentens tu'n tcyim, chi Jehú. Pero bant tten aju sbubl lu tu'n Jehú, tu'ntzun cynaj cycyakil ke xjal in che c'ulun twitz Baal; 20cyja'tzun xi tma'n tu'n tex tkanil ti'j nink'ij ma' t-xilen te Baal, ex banttzun icju. 21Te tibajxi, e je'x t-sama'n ke sanjel cyxol cycyakil aj Israel, ex cycyakil keju in che c'ulun twitz Baal e pon tuj ja te c'ulbil te. Mi jun cye minti'wt pon, cyja'tzun o nojxix aju ja in ajben te c'ulbil te Baal. 22Xitzun tma'n Jehú te xjal c'u'l xbalun tu'n ttzaj ti'n ke xbalun te cye keju xjal in che c'ulun twitz Baal, ex banttzun tu'n icju. 23Atzunte Jehú tuc'ix Jonadab aju tcy'ajal Recab e ocx tuj ja te c'ulbil te Baal, ex xi tma'n Jehú cye xjal cyja': —Cyque'yin baje ka mi a'l jun at cyxole, akeju in che c'ulun te Kman, porque o'cx at tu'n cyten akeju in che c'ulun te Baal. 24E ocxtzun ke xjal in che c'ulun te Baal tuj ja te c'ulbil te, tu'ntzun t-xi cyk'o'n ke chojbil ex ke oyaj patun in che cub. Ex atzunte Jehú e cub tk'o'n 80 xinak ttxa'n pe'n, ex bi'x xi tma'n cye cyja': —Ka at jun ma txi tzokpinte jun cye ke xinak lu, akeju ma che'x nk'o'ne tuj cyk'abe, axtzun cnajel te t-xel. 25Te tibajxi, tej tbaj cyk'o'n ke oyaj patun in che cub, xitzun tma'n Jehú cye ke soldad cwentil te ex cye ke xjal ma' cyoclen ate' ttxlaj: —Cyocxe ex che cybyo'ncuye. Mi jun tu'n ttzokpaj. Atzun ke xinak ate' tuc'il Jehú e oc ten byol cye tu'n spad, ex e je'tz cyxo'n ti'jxi ja. Te tibajxi e ocx max tujxi ja te c'ulbil te Baal, 26etztzun cyi'n ke tilbilal cyocx tuj ja te c'ulbil te, ex cub cypatun. 27Ax icx cub cypa'n aju tilbilal Baal, cub cyxitun ju ja te c'ulbil te, oc cyk'on te jun lugar jatum tu'n cypon xjal txa'l, ex cucx tten ja'lo. 28Cyja'tzun cub t-xitun Jehú cycyakil tilbilal Baal cyxol aj Israel tu'ntzun mi'n cyc'ulun cywitz. 29Masque icju, pero cucx o binchan Jehú il, ic tza'n o tbincha Jeroboam aju tcy'ajal Nabat, aju e binchan ke aj Israel il tu'n, porque cucx o c'ulun cywitz ke tilbilal tal tor k'an pwak cytx'otx'il, akeju ate' tuj Dan ex tuj Betel. 30Xitzun tma'n Kman te Jehú: Tu'nju ba'n ma tbinchaya nwitze ex tz'aklxix ke tbinchbena, porque ma che cub tbyo'na ke tcy'ajal Acab ic tza'nx otok cub nximane tu'n tbant cyi'j, cyja'tzun ax jun tcy'ajala c'oquel te rey tu'n tcawin cyibaj aj Israel, ax icx jun tchmana ex jun ttxca tchmana, chi Kman. 31Masque icju, pero mya tu'n tcyakil tanmi Jehú o japun tley Kman tu'n, aju Cydios aj Israel, porque cucx o binchan il, ic tza'n o tbincha Jeroboam, aju e binchan aj Israel il tu'n. 32Tuj tk'ijlalil lu, tzyet tu'n tel k'i'n cytx'otx' aj Israel tu'n Kman. Oc tzokpaj Hazael cyi'j aj Israel tuj tcyakil tmojonil cytx'otx': 33tzajx ke' max tuj tumlal tjawitz k'ij ti'jxi nima Jordán, ex tuj tcyakil tx'otx' Galaad, cyuc'ix cytx'otx' aj Gad, aj Rubén ex aj Manasés, ex tzajx ke' tuj tnam Aroer, aju tcub ttxlaj tk'ab xak Arnón, ex pon baj tuj Galaad ex Basán. 34Aju ch'intl tx'olbaben ti'j Jehú ex ti'j tcyakilju o tbincha, ex cyi'j ke tbinchben ma'xix cyxilen, atzun tz'iban tuj u'j jatum ta' tcyakil tx'olbaben cyi'j cyak'unben ke rey cye aj Israel. 35Tejtzun tcyim, cu'x maku'n tuj tnam Samaria, ex aju o cawin te t-xel, atzun Joacaz aju tcy'ajal. 36O cawin Jehú 28 abk'i cyibaj aj Israel tuj tnam Samaria.

will be added

X\