2 REYES 1

1Tcyimlenxitzun Acab, jaw cyi'n cyib aj Moab cyi'j aj Israel. 2Atzunte Ocozías tzaj tz'ak ttzi' jun ventan tuj tcabin colin tja rey at tuj Samaria, ex nim te c'ixbi. E je'xtzun t-sama'n ke sanjel tu'n cyxi' kanil te Baal-zebub aju cydios aj Ecrón ka tu'n tbanix. 3Pero xi tma'n t-anjel Kman te Elías aju aj Tisbe: Txi'ya makolte cye ke t-sanjel rey te Samaria, ex kaninxa cye cyja': ¿Minti'pe Dios at cyxol aj Israel, tu'nju ma che'xe kanilte cyxjele te Baal-zebub aju cydios aj Ecrón? 4Cyja'tzun, ate Kman in k'mante te Ocozías cyja': Ya mlay jaw we'tla tuj tcoẍbila, nok o'cx cnajela, chi t-anjel Dios te Elías. Xi'tzun Elías ex o bant tu'n icju. 5Tejtzun cypon meltz'aj ke sanjel twitz rey, xi tkanin cye: —¿Tiku'n ma che ajtz meltz'aje? 6Atzun cye xi cytzak'we'n: —Porque at jun xinak setz tuj kbeye ex saj tma'n keye tu'n kajtz meltz'aje tuc'il rey aju otok txi samante keye, ex tu'n t-xi kma'ne te cyja': Chi Kman in tma'n: ¿Baka minti' Dios at cyxol aj Israel tu'nju in che'x t-sama'na ke xjal kanil t-xjela te Baal-zebub aju cydios aj Ecrón? Tu'nju ma tbinchaya jlu, ya mlay jaw we'tla tuj tcoẍbila, nok o'cx cnajela, chi xjal, che chi ke sanjel. 7Atzunte rey xi tkanin cye: —¿Tza'n que'yin aju xinak setz tuj cybeye, aju saj k'mante jlu? 8—Aju xinak lu ttz'umal alumaj t-xbalun tocsa'n, ex tz'u'm c'albil tc'u'j, che chi xi cytzak'we'n. —Entons a Elías aju aj Tisbe, chi rey xi ttzak'we'n. 9Xi t-sama'n rey jun capitán cyuc'ix 50 soldad jyolte Elías. Tejtzun cypon, lutok Elías k'ukl twi' jun witz. Xitzun tma'n capitán te: —Aya t-sanjel Dios, ma tzaj tma'n rey tu'n tcu'tza. 10Tzajtzun ttzak'we'n Elías: —Ka ax toc akine t-sanjel Dios, e ttzaj k'ak' twitz cya'j tu'n tcub tz'e'ya tu'n, cyuc'ix ke 50 t-soldadiya. Jurattzun cu'tz k'ak' twitz cya'j ex e baj tz'e'y tu'n. 11Xi t-sama'ntl rey juntl capitán cyuc'ix 50 soldad. Xitzun capitán ex xi tma'n te Elías cyja': —Aya t-sanjel Dios, ma tzaj tma'n rey tu'n tcu'tz naja. 12Tzaj ttzak'we'ntl Elías: —Ka ax toc akine t-sanjel Dios, e ttzaj k'ak' twitz cya'j tu'n tcub tz'e'ya tu'n, cyuc'ix ke 50 t-soldadiya. Jurattzun cu'tz k'ak' twitz cya'j ex e baj tz'e'y tu'n. 13Xi t-sama'n rey toxinmajin juntl capitán cyuc'ix 50 soldad, pero aju toxin capitán jax max jatum ta' Elías, cub ẍmeje' twitz, oc ten cubsal twitz ex tma: —Aya t-sanjel Dios binchama xtalbil, mi'n txi tkanina te Dios tu'n ncyime cyuc'ix keju 50 ajbel teya lu; 14porque ma tzaj k'ak' tuj cya'j ex ma che cub tz'e'y ke cabe capitán cyuc'ix ke xinak uc'in cyu'n. In chin cubsane twitza tu'n ttzaj k'ak'an tc'u'ja wi'je, chi capitán. 15Tzajtzun tma'n t-anjel Kman te Elías: —Txi'ya tuc'il ex mi'n xoba twitz. Cu'tztzun Elías ex xi' tuc'il capitán tu'n t-xi' tuc'il rey, 16ex xi tma'n te: —Chi Kman ma tma: Tu'nju ma che'x t-sama'na ke sanjel kanilte t-xjela te Baal-zebub aju cydios aj Ecrón, mer ic tza'n minti' Dios at cyxol aj Israel jatum tu'n t-xi tkanin t-xjela te, cyja'tzun mlay jaw we'tla tuj tcoẍbila, nok o'cx cnajela, chi Elías. 17Cyimtzun Ocozías ic tza'nx otok tma Kman te Elías. Tu'nju minti' tc'wa'l Ocozías tzaj, cyja'tzun aju o cawin te t-xel, atzun Joram aju terman. A jlu o baj tuj tcabin abk'i ttzyetlen tcawin Joram aju tcy'ajal Josafat tuj Judá. 18Aju ch'intl tx'olbaben ti'j Ocozías ex ti'j tbinchben, atzun tz'iban tuj u'j jatum ta' tcyakil tx'olbaben cyi'j cyak'unben ke rey cye aj Israel.

will be added

X\