2 Corintios 7

1Akeye erman at nc'u'je cyi'je, atzunju yol lu tzaj ttziyan Dios ke. Cyja'tzun ktx'jo'mel tcyakilju in tz'ilsante kchibjal ex in tz'ilsante kanmi; ex atwit tchi Dios tuj kwitz ex tu'n t-xi kk'on kib te Dios tu'n kajben o'cx te te jumajx. 2Cybinchame xtalbil, cyk'ontze ambil keye tu'n kyoline cyuc'ile. Mi jun xjal ma kbinchaye mya ba'n ti'j, mi jun xjal ma tz'el txalpuj ku'ne, mi jun xjal ma cub ksbu'ne. 3Minti' ma txi nma'ne jlu cyeye tu'n woc tene ilil cyi'je; porque ojtxi txi nma'ne cyeye, nim nc'ujlalile cyi'je, ka tu'n kcyim, junx tu'n kcyim, ex ka tu'n kank'in, junx tu'n kank'in. 4Nimxix in ke' nc'u'je cyi'je, ex nim in chin tzalaje cyi'je; ma k'ukbanjtzxix nc'u'je; ex mas nim in chin tzalaje tuj tcyakil yajbil keye. 5Porque tej ktene tuj Macedonia minti' o ko ojlan ch'ine, nok o'cx tichak yajbil keye tzaj; jun, in che k'ojin xjal ki'je, ex juntl, tzaj kxobile tuj kanmiye. 6Pero ate Dios in k'ukbante cyc'u'j keju in che bisun, ex o k'ukbanjtz kc'u'je tu'n, tu'nju ul Tito. 7Mya nok o'cx k'ukbanjtz kc'u'je tu'nju ul Tito, ax icx tu'nju otok k'ukbanjtz tc'u'j Tito cyu'ne. Tzaj tma'n Tito keye nim cyganiye ki'je ex tza'n tten tzaj cybise tu'n tlaj ju mya ba'n tzaj cyxole, ex at cyc'u'je wi'je; cyja'tzun mas in chin tzalaje. 8Porque masque tzaj cybise wu'ne tu'nju u'j xi nsama'ne cyeye, pero minti' in chin bisune ja'lo tu'n jlu; balo tzaj ch'in nbise ti'j nej, porque ma wile tzaj cybise tu'nju u'j xi nsama'ne cyeye, masque nok te cab k'ij e bisune. 9Pero ja'lo in chin tzalaje; myatzun ti'j ju cybise tzaj in chin tzalaje, nok o'cx in chin tzalaje tu'nju tzaj cybise tu'n tajtz ti'j cyanmiye; porque tzaj cybise ic tza'nx tajbil Dios, cyja'tzun minti' jun mya ba'n ma kbinchaye cyeye. 10Porque aju kbis in tzaj ic tza'nx tajbil Dios in ajtz ti'j kanmi tu'n tu'n kclet, ex mlay tzajtl kbis ti'j; atzun cye xjal cybis, in tzaj camic tu'n. 11Che ximane ti'j, aju cybise tzaj ic tza'nx tajbil Dios nim ma tz'ajben; porque tu'n jlu ma tz'oc tilil cyu'ne tu'n tbant ti'j ju mya ba'n tzaj cyxole, ex cyja'tzun ma che cyaj tene minti' cyile, tzaj cyk'oje ti'j ju o baj cyxole, tzaj cyxobile, tzaj nim cyganiye tu'n cylonteye nwitze, at cyc'u'je ki'je, ex cub cyk'o'ne tcastiw ju xjal o binchan il. Tcyakil jlu bant ti'j cyu'ne minti'tl cyile ti'j. 12Cyja'tzun, aju u'j xi ntz'ibane, mya tu'n tlaj ju xjal binchante ju mya ba'n, ex mya tu'n tlaj ju xjal o binchanjtz mya ba'n ti'j, nok o'cx xi ntz'ibane tu'n tel cynic'e ti'j ka nim cyganiye ki'je twitz Dios. 13Cyja'tzun ma ke' kc'u'je tu'nju ma k'ukbanjtz cyc'u'je. Pero mas nimxix in ko tzalaje tu'nju in tzalaj Tito; porque ma k'ukbanjtz tc'u'j Tito cyu'ne cycyakile. 14Aju o txi nma'ne te Tito ka mejor ocslal keye, ax toc, minti' ma tzaj nch'ixwiye tu'n, tcyakilju ma txi kma'ne cyeye ax toc; ax icx ju yol xi kma'ne te Tito ka mejor ocslal keye, ma tz'el ax toc. 15Ex mas in tenxix tc'ujlalil Tito cyi'je oc in tzaj tna'n tza'n tten xi cynimane tyol cycyakile, ex oc in tzaj tna'n tza'n tten c'met cyu'ne at tchiylal tuj cywitze. 16In chin tzalaje, porque tuj tcyakil ma ke' nc'u'je cyi'je.

will be added

X\