2 Corintios 6

1In ko ak'nane junx tuc'il Dios, cyja'tzun in ko cubsane cywitze tu'n mi'n cyc'monteye t-xtalbil Dios nokx gan. 2Porque in tma'n Dios tuj Tu'jil: Ma nbiye tyola ex ma tzul tk'ijlalil tu'n t-xi nk'o'ne nxtalbile teya, ma tzul canun aju tk'ijlalil colbil ex chin onile ti'ja, chi tuj Tu'jil. Ja'lo tk'ijlalil xtalbil; ja'lo tk'ijlalil colbil. 3Minti' in cub kk'o'ne tolsabl cywitz xjal tu'ntzun mi'n cyyolin xjal mya ba'n ti'j kak'unbene. 4Nno'c tilil ku'ne tu'n kele ba'n tuj tcyakil, porque ajbel ko'ye te Dios, nim nnic'x ku'ne, pero tuj tcyakil at nim kpasense; at maj in ko yajlanjtze, at maj minti' in canun aju in ajben keye, at maj in ko tzyete tu'n bis; 5at maj in ko baj asyaline, at maj in ko ocx k'o'ne tuj pres, at maj in che jaw tilj xjal ki'je, nim in ko ak'nane, at maj minti' in ko tane ex at maj nnic'x we'yaj ku'ne. 6Tuj tcyakil nno'c tilil ku'ne tu'n kele ba'n, tu'nju kanmiye sak, tu'nju at knable, tu'nju at kpasense, tu'nju at kbanile, tu'nju at Xewbaj Xjan kuc'ile, tu'nju at kc'ujlalile axix toc, 7tu'nju axix toc ju yol in xi kma'ne, tu'nju at tipumal Dios kuc'ile, ex tu'nju in ko bete tuj tumelxix; ic tten jlu ic tza'n jun k'ojbil tuj kbank'abe ex tuj knayaje tu'n kclete. 8At maj in ko nimanjtze cyu'n xjal ex at maj minti' in ko nimanjtze, at maj in che yolin xjal ba'n ki'je ex at maj in che yolin mya ba'n ki'je; in ko oc k'o'ne nic'al yol, pero ax toc kyole. 9Mer ic tza'n minti' ojtzki'n kwitze cyu'n xjal, pero ojtzki'nxix kwitze cyu'n; mer ic tza'n ch'ix kcyime, pero itz'x ko'ye; in ko c'ixbisanjtze, pero minti' in ko cyime. 10At nim kbise, pero cucx in ko tzalaje; meba xjal ko'ye, pero nim xjal in che oc k'inun ku'ne; misicyer ch'in at keye, pero tcyakil at keye. 11Clarxix in chin yoline cyuc'ile, akeye aj Corint, nimxix kc'ujlalile cyi'je. 12Keye at kc'ujlalile cyi'je, atzun cyeye minti' cyc'ujlalile ki'je. 13In chin cubsane cywitze ic tza'n jun mambaj in cubsan cywitz tc'wa'l, ic tza'n weye at nc'ujlalile cyi'je, ax icx cyeye atwit cyc'ujlalile wi'je. 14Mi'n tz'oc cymojban cyibe cyuc'il ke mya ocslal, porque mya ax cynable ic tza'n cye. Porque baka cyuc'in cyib keju tz'aklxix cyuc'il keju mya tz'aklxix. Ex baka at tmojbabl tib spic'un tuc'il klolj. 15Ex baka mojl tyol Crist tuc'il tyol tajaw il. Ex baka at toclen ocslal tuc'il ju mya ocslal. 16Ex baka junx tten tja Dios cyuc'il ke tilbilal. Porque akeye tja Dios, aju Dios itz', ic tza'n o tma Dios chi cyja': Ax chin najale cyxol ex chin betele cyxol; ex chin oquele te Cydios, atzun cye che oquel te jun tnam etzan wu'ne, chi tuj Tu'jil. 17Cyja'tzun ax icx in tma'n; Cyetze cyxol ex cypa'mil cyibe cyi'j, chi Kman; ex mi'n tz'oc cymaco'ne aju ttz'ilil. Octzun che c'metele wu'ne. 18Chin oquele te Cymane, atzun cyeye che oquele te ncy'ajale ex te nme'jele, chi Kman aju at tipumal tu'n bant tcyakil tu'n, chi tuj Tu'jil.

will be added

X\