2 Corintios 4

1Cyja'tzun minti' in ko cub numje, porque ma kc'ame ju koclene lu tu'nju ma tzaj k'ak'an tc'u'j Dios ki'je. 2Ex ma tz'el kpa'n kibe ti'j ju in bant cyu'n xjal tuj ewaj ch'ixbajilxix; minti' in ko sbune ex minti' in baj ksmo'ne tyol Dios; o'cx in ko ank'ine twitz Dios ex nno'c tilil ku'ne tu'n kele ba'n tuj cywitz cycyakil xjal, tu'nju in xi kchic'ba'ne ju yol axix toc. 3Ka minti' nne'l cynic' xjal ti'j tkanil colbil in xi kpacba'ne, pero mya cycyakil, o'cx keju in che'x tuj najen minti' nne'l cynic' ti'j. 4Ke xjal lu mya ocslal ke, cyja'tzun ma moẍsanjtz cynabl tu'nju cydios xjal at tuj tk'ijlalil ja'lo, tu'ntzun mi'n tel cynic' ti'j ju spic'un in koptz'aj cyibaj; aju spic'un lu atzun tkanil ba'n ti'j Crist, ex ate Crist tbanilxix ex tilbilal Dios. 5Aju yol in xi kpacba'ne mya ki'jxe, nok o'cx ti'j Jesucrist; atzun in xi kma'ne, ate Jesucrist Kajaw; atzun keye ma ko oque te cymajene nok tu'nju at kc'u'je ti'j Jesús. 6Porque tu'n Dios tzaj tma'n tu'n tcub koptz'aj ju spic'un tuj klolj, ex tu'n Dios ma tzaj koptz'aj ju spic'un tuj kanmi, tu'ntzun tel knic' ti'j tza'n tten Dios tu'nju in koptz'aj t-spic'umal ti'j twitz Jesucrist. 7Aju k'inumabl lu atzun ta' kujxi, ako' ic kten ic tza'n c'il, tx'otx' ktx'otx'il, tu'ntzun tel knic' ti'j, ate Dios in tzaj k'onte nimxix kipumal, mya ku'nxke. 8In ko yajlanjtz tuj tcyakil, pero at jatum tu'n kex tu'n ktzokpaj; nim nnic' ki'j, pero at jatum tu'n toc ke' kc'u'j ti'j. 9In ko jaw lajo'n, pero minti' in ko cyaj colin tu'n Dios; in ko cub xo'n twitz tx'otx', pero minti' in ko naj. 10Nok jachak cucx nne'lje' ki'j tu'n kcyim, ic tza'n baj ti'j Jesús, tu'ntzun tyec'unjtz ti'j kximlal ka ax tchwinklal Jesús in tzaj tk'o'n ke. 11Porque itz'xcu ko'ye, cucx nne'lje' ki'je tu'n kcyime tu'n tlaj Jesús, tu'ntzun tyec'unjtz ti'j kximlale ka ax tchwinklal Jesús in tzaj tk'o'n keye, masque cyja' tnaj kximlale. 12Cyja'tzun kk'on kibe tu'n kcyime, ex tu'n jlu ma cycambaye cychwinklale. 13At jun yol in tma'n tuj Tu'jil: Xi wocsla'ne, cyja'tzun in chin yoline, chi tuj Tu'jil. Icx keye ax knable jlu, ma txi kocsla'ne, cyja'tzun in ko yoline. 14Porque ba'n ku'n, jaw ank'in Kajaw Jesús tu'n Dios, icx ke ko jawil ank'in tu'n junx tuc'il Jesús, ex ko xel k'i'ne junx cyuc'ile tu'n kpon twitz. 15Porque tcyakil jlu nnic'x ku'ne tu'n cyc'monteye jun ba'n; ka ma cyc'am nimcu xjal t-xtalbil Dios, ax icx nimcu xjal tu'n t-xi cyk'o'n chjonte te Dios, tu'ntzun tjaw nimsa'n tbi. 16Cyja'tzun, minti' in ko cub numje masque cyja' tbaj tipun kximlale, pero aju kanmiye in tc'mo'n ac'aj tipumal junjun k'ij. 17Porque aju yajbil keye ja'lo mya nim ex nok te jurat, pero tu'n jlu ctzajel k'o'n jun koclene ma'xix ex te jumajx. 18Porque myatzun toc kwitze ti'j ju k'ancha'l, atzun toc kwitze ti'j ju minti' k'ancha'l; porque aju k'ancha'l, nok te cab k'ij, atzunju minti' k'ancha'l, te jumajx.

will be added

X\