2 Corintios 3

1¿Ocpetzun ko oquel tene juntl maj yolil ki'je tu'n kc'mete cyu'ne? ¿Maj il ti'j tu'n t-xi ki'ne jun u'j tu'n kc'mete cyu'ne ex ka tu'n ttzaj cyk'o'ne jun u'j te okxenbil keye, ic tza'n in cybincha'n junjuntl xjal? 2Mi'n, porque ax keye jun ku'je tz'iban tuj kanmiye, in jaw cysch'i'n cycyakil xjal ex ojtzki'n cyu'n; mya il ti'j juntl u'j te okxenbil keye. 3K'ancha'lxix ta' jlu, tu'j Crist keye, ate Crist o tz'ibante nok tu'n kak'unbene. Ate u'j lu mya tu'n tint tz'iban, nok o'cx tu'n T-xew Dios, aju Dios itz'; ex mya twitz tz'lom abj tz'iban, atzun tz'iban tuj kanmiye. 4Cyja'tzun, tu'n jlu in ke' kc'u'je ti'j Dios nok tu'n Crist. 5Minti' ch'in koclene ku'nx kibxe, ex mlay ko ximane ti'j ka at ch'in jacu bant ku'ne ku'nx kibe; o'cx ate Dios in tzaj k'onte koclene ex knable. 6Ex axte Dios oc k'onte koclene tu'n koque ajbel ti'j ju ac'aj yol cyaj bant ti'j tu'n Dios kuc'il. Aju yol lu mya jun ley tz'iban, nok o'cx tu'n tipumal T-xew Dios; porque aju ley tz'iban, in cub cysentens xjal tu'n tu'n cycyim, atzunju Xewbaj Xjan in tk'o'n chwinklal. 7Aju ley tzaj tk'o'n Dios te Moisés tz'iban twitz abj, ex tzaj tyec'un Dios t-spic'umal tej ttzaj k'o'n. Ke aj Israel minti' o cyipa tu'n toc cyque'yin twitz Moisés tu'n tlaj in koptz'aj twitz wen, masque nok te cab k'ij tu'n tkoptz'aj twitz. Aju ojtxi ley, masque in tma'n tu'n cycyim xjal, pero tzaj tyec'un Dios t-spic'umal ti'j. 8Ka ic tten jlu, yajtzun ju yol in tzaj tk'o'n Xewbaj Xjan ¿myapetzun mas tbanilxix? 9Porque ka in koptz'aj twitz Moisés tej ttzaj k'o'n ju ley, aju in cub cysentens xjal tu'n tu'n tlaj cyil, yajtzun ju yol aju in tma'n tu'n koc tz'aklxix tu'n Dios, ¿myapetzun mas tbanilxix? 10Porque aju ojtxi ley, masque tbanilxix nej, pero ya ja'lo mya tbanilxix, porque at juntl yol ma tzaj k'o'n mas tbanilxix. 11Masque cyja'tok tnaj aju ojtxi ley, pero tzaj tyec'un Dios t-spic'umal ti'j, yajtzun ju ac'aj yol, ¿myapelo mas tbanilxix? Porque cyjel ten te jumajx. 12K'ukl kc'u'je ti'j jlu, cyja'tzun in ko yoline clarxix. 13Mya ic ktene ic tza'n Moisés, xi tewan twitz tu'n jun xbalun tu'n mi'n toc cyque'yin aj Israel oc tcub yupj ju spic'un in koptz'aj twitz, aju spic'un lu cyja'tok tnaj. 14Pero ke aj Israel jpet tuj cynabl ex cucx cyten ja'lo, porque oc in jaw cysch'i'n ju yol cyaj bant ti'j tu'n Dios cyuc'il ojtxi, minti' nne'l cynic' ti'j, porque ax toc ju xbalun makolte cywitz; aju xbalun lu o'cx tu'n Crist nne'l ti'n. 15Ex cucx cyten ja'lo oc in jaw cysch'i'n tuj tley Moisés, ax toc ju xbalun makolte twitz cyanmi tu'n mi'n tel cynic' ti'j. 16Pero oc cyajtz meltz'aj xjal tuc'il Kajaw c'elel k'i'n ju xbalun. 17Aju Kajaw axte Xewbaj; ex jatum ta' T-xew Kajaw atzun at tzokpibl ke. 18Cyja'tzun, kcyakil in kkoptz'a'n t-spic'umal Kajaw ic tza'n tuj jun espej, porque mya maksi'n kwitz tu'n xbalun; cyja'tzun in ko ch'expet tu'n koc ic tza'n tilbilal Crist, ex mas in koptz'aj t-spic'umal Crist ki'j junjun k'ij; atzun in tbincha'n Kajaw, axju Xewbaj.

will be added

X\