2 Corintios 10

1Akine Pablo, ax kine chin cubsale cywitze tu'nju mans te Crist ex tbanilxix. Ic tza'n atine cyuc'ile mans kine, pero ic tza'n mi a'l kine cyuc'ile cyuw in chin yoline cyeye, che chiye. 2Cyja'tzun chin cubsale cywitze, oc npone cyxole cuchiwt mya il ti'j tu'n nyoline cyuw, porque banin ntene tu'n cyoc wic'le'ne keju in che yolin ki'je, in cyma'n ka in kbincha'ne kexe kajbile, ic tza'n in cybincha'n mastl xjal. 3Masque xjal ko'ye ic tza'n ke mastl xjal, pero aju k'oj nno'c ku'ne mya ic tten ic tza'n cye xjal. 4Porque aju kmacbile in ajben tuj k'oj mya ic tza'n cye xjal, aju kmacbile at tipumal tu'n Dios tu'n tcub cyi'j keju at cyipumal ex aj k'oj ke ti'j Dios. 5Cyja'tzun, ke xjal in che k'ojl ti'j tyol Dios in che cub nume' ku'ne, ex in cub xitj ku'ne tcyakilju makbil in cub cyk'o'n xjal tu'n mi'n tel cynic' mastl xjal ti'j Dios, ex in cub ti'j cynabl xjal ku'ne tu'n t-xi cyniman Crist, 6ex banin ktene tu'n tcub kk'o'ne cycastiw keju miban che niman, ka cuyin cyu'ne cycyakile tu'n t-xi cynimane kyole. 7Cyeye o'cx toc cywitze ti'j tza'n que'yin xjal. Ka at jun k'ukl tc'u'j ti'j ka te Crist, ximanx ti'j jlu, ic tza'n te ma txi tk'on tib te Crist, icx keye te Crist ko'ye. 8Porque masque nim in chin yoline ti'j koclene tzaj tk'o'n Kajaw, pero mlay chin ch'ixwiye, porque aju koclene tzaj tk'o'n Kajaw tu'n toc mastl cynable, mya tu'n tcub xitj cynable. 9Mi'n waje tu'n cyximane wi'je ka in che oc nsec'pu'ne cyu'n ke u'j ma che'x nsama'ne. 10Porque at junjun in k'mante: Aju u'j tu'n Pablo puro cyuw tyolbil, atzun oc in ten kuc'il minti'xix tipun ex ju tyol minti' tajben, che chi. 11Aju xjal in k'mante jlu, ximanx ti'j jlu, aju ma txi nma'ne tuj u'j mi a'l kine cyuc'ile, axju oc nbincha'ye oc npone cyuc'ile. 12At tchi ki'je tu'n toc kk'on kibe junx cyuc'il keju in baj cyyolin cyib, ex mlay txi kma'ne ka junx koclene cyuc'il. Atzun ke jlu cyu'nx nno'c cyk'o'n cyoclen, ex tuj cynabl ka o'cx ake ba'n ke, pero minti' cynabl. 13Atzun keye minti' in ko ic'e tibaj tu'n tbaj kyolin kibe, o'cx tu'n kcanune jatum ma tzaj techan Dios keye, tu'n kpon canune max cyuc'ile. 14Minti' in ko exe ti'jxi aju ma tzaj techan Dios keye; nokwit mya nej o pone cyxole, entons jaculo cymaye ka nok ku'nxe ma ko exe ti'jxi, pero ako'ye o pon neje cyxole xi kpacbane tkanil ba'n cyeye, aju in yolin ti'j Crist. 15Minti' ma ko ocxe tuj tak'unben juntl tu'n t-xi kma'ne ka keye kak'unbene. Atzun kajbile, tu'n tch'iy kak'unbene cyxole ex tu'n tex lak'e' tu'nju cyocslable in ch'iy. O'cx kaje tu'n kak'nane jatum ma tzaj techan Dios keye. 16Atzun kajbile, tu'n t-xi kpacba'ne tkanil colbil cyuj mastl tnam ti'jxi jatum ate'ye, pero mya tu'n kocxe tuj tak'unben juntl, ex mya tu'n t-xi kma'ne ka keye kak'unben. 17Alcye taj tu'n tjaw tniman tib ti'j tak'unben, mas ba'n tu'n tjaw tnimsa'n tbi Kajaw tu'nju tak'unben. 18Porque mya aju xjal in baj tyolin tib in c'met tu'n Dios, nok o'cx in c'met tu'n Dios aju xjal ba'n nne'la tak'unben twitz Kajaw.

will be added

X\