2 CRÓNICAS 36

1Atzun cye aj Judá tzaj cyi'n Joacaz aju tcy'ajal Josías ex oc cyk'o'n te rey tuj Jerusalén te t-xel ktzan tman. 2Toctok Joacaz twi' 22 abk'i tej toc te rey ex o cawin ox xjaw tuj Jerusalén. 3Atzunte Necao aju rey te Ejipt el ti'n toclen Joacaz tu'n mi'n tcawintl tuj Jerusalén, el tkanin jun chojenj cye xjal, te 75 quintal sak pwak tuc'ix 75 libr k'an pwak. 4Ax icx oc tk'o'n rey toclen Eliaquim aju terman Joacaz, tu'n toc te rey tuj Judá ex tuj Jerusalén, ex baj tch'expu'n tbi Eliaquim; Joacim juntl tbi oc tk'o'n, ex atzunte Joacaz xi ti'n tuj Ejipt. 5Toctok Joacim twi' 25 abk'i tej toc te rey ex o cawin junlaj abk'i tuj Jerusalén, pero mya ba'n e ela ke tbinchben tuj twitz Kman aju Tdios. 6Atzunte Nabucodonosor aju rey te Babilonia tzaj k'ojlel ti'j, ex baj tc'alo'n tu'n caden k'an c'uxbil ex xi ti'n tuj Babilonia. 7Ax icx xi ti'n Nabucodonosor txkan macbil ate' tuj tja Kman, pon ti'n tuj Babilonia ex e ocx tk'o'n tuj tja tdios at tuj Babilonia. 8Aju ch'intl tx'olbaben ti'j Joacim ex ke tbinchben mya ba'n ex aju baj ti'j, atzun tz'iban tuj u'j jatum ta' tcyakil tx'olbaben cyi'j ke rey cye aj Israel ex ke rey cye aj Judá. Ex aju o cawin te t-xel, atzun Joaquín aju tcy'ajal. 9Toctok Joaquín twi' wajxaklaj abk'i tej ttzyet tcawin ex o cawin ox xjaw tuc'il laj k'ij tuj Jerusalén. Mya ba'n e ela ke tbinchben tuj twitz Kman. 10Ch'ixtok tcubil jbal, xi tma'n Nabucodonosor tu'n t-xi k'i'n Joaquín tuj Babilonia junx cyuc'il ke macbil wi'yilxix at tuj tja Dios, ex oc tk'o'n Nabucodonosor Sedequías aju terman tman Joaquín tu'n toc te rey tuj Judá ex tuj Jerusalén. 11Toctok Sedequías twi' 21 abk'i tej ttzyet tcawin ex o cawin junlaj abk'i tuj Jerusalén. 12Ke tbinchben mya ba'n e ela' tuj twitz Kman aju Tdios. Minti' xi tniman aju yol tzaj k'ma'n te tu'n Jeremías aju t-sanjel Dios. 13Ax icx jaw ti'n tib ti'j rey Nabucodonosor masque otok txi ttziyan jun yol axix toc tu'n mi'n tk'ojin ti'j, ex cub tcyuwsa'n tanmi tu'n mi'n tajtz meltz'aj tuc'il Kman aju Cydios aj Israel. 14Ax icx nimxix il cybincha cycyakil nejenel cyxol pal cyuc'ix ke tnam xjal; e je'x lpe' ti'j tcyakil mya ba'n in cybincha'n ke nasyon mya nimal Dios, ex baj cytz'ilsa'n tja Dios, aju otok jaw t-sc'o'n Dios ex otok baj t-xjansa'n tuj Jerusalén. 15Ate Kman aju Cydios ktzan cyxe'chel coc'x e tzaj t-sama'n ke t-sanjel k'malte tyol cye, tu'nju in tz'e'ytok tc'u'j cyi'j xjal etzan tu'n ex ti'j tja. 16Atzun cye nok e jaw tze'n cyi'j ke t-sanjel Dios, e oc ten xmayil cyi'j ex el cyic'un aju cyyol; tu'ntzun jlu tzaj tk'oj Dios cyi'j xjal etzan tu'n, cyja'tzun minti' ic'x ti'j tu'n tcub cycastiw. 17Tzajtzun ti'n Kman aju rey te Babilonia k'ojlel cyi'j, ex cycyakil ke cu'xun e cub tbyo'n tu'n spad ax tuj tja Dios; minti' tzaj tz'e'y tc'u'j cyi'j cu'xun mi cyi'j k'apoj, mi cyi'j tij xjal ex mi cyi'j keju otok che tijin wen. Cycyakil ke jlu e je'x tk'o'n Kman tuj tk'ab Nabucodonosor. 18Cycyakil ke macbil ate' tuj tja Dios, ke nmak ex ke ch'in, ex ke k'inumabl ate' tuj tja Dios tuc'ix tk'inumabl rey ex cyk'inumabl ke xjal ma' cyoclen ttxlaj, tcyakil jlu xi ti'n rey tuj Babilonia. 19Ax icx cub cypatun tja Dios, cub cyxitun muro toc ti'j tnam Jerusalén, oc cyk'o'n cyk'ak'al ke tbanil tja rey ex baj cyxitun tcyakil ti'xti wi'yilxix. 20Akeju minti' e cub byo'n tu'n spad, e je'x k'i'n tuj Babilonia, ex e oc te tmajen rey ex te cymajen ke tcy'ajal, tejxi tcub ti'j Babilonia tu'n rey cye aj Persia. 21Baj icju tu'ntzun tjapun aju tyol Dios otok tma Jeremías aju t-sanjel Dios. Cyja'tzun o tz'ojlan tx'otx' atxix tej tbaj xitj tnam cyu'n aj k'oj ex tejxi tjapun 70 abk'i. 22Tuj tnejel abk'i ttzyetlen tcawin Ciro aju rey cye aj Persia, ate Kman o c'asunte tnabl tu'n tbant jun orden tu'n; cub ttz'iban aju orden cyuj u'j ex xi tma'n tu'n cyjaw sch'it cywitz xjal, ex e je'x t-sama'n cyuj cycyakil tnam jatum in cawin. O bant orden lu tu'ntzun tjapun tyol Kman aju o k'manjtz tu'n Jeremías. 23Aju yol in tma'n tuj u'j, atzun jlu: Chitzun Ciro aju rey cye aj Persia: Ate Kman Dios at tuj cya'j ma tzaj tk'o'n woclene ti'j tcyakil cawbil twitz tx'otx', ex ma tzaj tma'n weye tu'n tjaw nbincha'ne jun nintz ja te c'ulbil te tuj Jerusalén, aju tnam ta' tuj tx'otx' Judá. Cyja'tzun, nok alcyex cyeye toc te tajlal cyxol ke xjal etzan tu'n Dios, awt Dios onil te ex ba'n tu'n t-xi' tuj Jerusalén, chi tuj u'j.

will be added

X\