2 CRÓNICAS 33

1Toctok Manasés twi' cablaj abk'i tej ttzyet tcawin ex o cawin 55 abk'i tuj Jerusalén, 2pero mya ba'n e ela ke tbinchben tuj twitz Kman, tu'nju o tbincha axju mya ba'n cybincha ke nasyon otok che ex tlajo'n Kman cywitz aj Israel. 3E jaw tbincha'n juntl maj ke ja cywi' ke witz jatum in che c'ulun xjal mya nimal Dios ke, akeju otok che cub t-xitun Ezequías aju ktzan tman; e jaw tbincha'n ke altar jatum tu'n cyc'ulun xjal twitz tilbilal Baal, ex e cub tbincha'n ke tilbilal xu'j dios Asera, ax icx o c'ulun twitz k'ij, twitz xjaw ex cywitz cycyakil che'w ate' twitz cya'j, 4ex e jaw tbincha'n ke altar tuj tja Kman jatum otok tma Kman cyja': Atzun ctel nbiye tuj te jumajx tuj Jerusalén. 5Jaw tbincha'n txkantl altar tuj cycabil ttxa'n tpe'n tja Dios jatum tu'n cyc'ulun xjal cywitz che'w, twitz k'ij ex twitz xjaw. 6Ax icx e cub tpatun ke tc'wa'l te chojbil tuj chk'ajlaj Ben-hinom, o bant ttxocon cyi'j cyanmi cyimni, o bant tk'ijin, o bant mañ tu'n ex oc ten kanil t-xjel cye ke spiritist ex cye ke xjal ba'n che cy'a'n. Jumajx mya ba'n e'la ke tbinchben tuj twitz Kman, cyja'tzun tzaj nim tk'oj Kman ti'j tu'n jlu. 7Ax icx ocx tk'o'n tuj tja Dios aju tilbilal otok bant tu'n; aju ja lu otok yolin Dios ti'j tuc'il David ex Salomón aju tcy'ajal cyja': Ctel nbiye te jumajx tuj ja lu tuj Jerusalén, aju tnam o jaw nsc'o'ne cyxol cycyakil cyiyjil aj Israel. 8ex mlay che'x nlajo'ntle ke aj Israel tuj tx'otx' o txi nk'o'ne cye ktzan cyxe'chel, ka ma txi cyniman tcyakilju o txi nma'ne cye ex ka ma che japun ke nxnak'tzbile, ke nleye ex ke nmandamyente cyu'n, aju xi nma'ne te Moisés, chi Dios. 9Baj tzpet cynabl aj Judá ex aj Jerusalén tu'n Manasés, ex mas nimxix mya ba'n o cybincha ic tza'n otok cybincha ke nasyon otok che naj tu'n Kman cywitz aj Israel. 10O yolin Kman tuc'il Manasés ex cyuc'il t-xjalil, pero minti' xi cybi'n. 11Tu'ntzun jlu e tzaj ti'n Kman ke nejenel cye t-soldad rey te Asiria, tzyet Manasés cyu'n, oc cyk'o'n c'uxbil tkul tk'ab, baj cyc'alo'n tu'n caden k'an c'uxbil ex xi cyi'n tuj Babilonia. 12Tejtzun tten tuj yajbil oc ten na'l Dios, cub tmansinxix tib twitz Dios aju Cydios ktzan t-xe'chel, 13ex tej toc ten na'l Dios o tzaj tbi'n Dios aju tkanbetz, xi tk'o'n Kman ambil te tu'n taj meltz'aj tuj Jerusalén ex tu'n tc'monte toclen juntl maj te cawil. Eltzun tnic' Manasés ti'j, ate Kman aju Dios axix toc. 14Tbajlenxi jlu jaw tbincha'n Manasés juntl maj aju muro toc ti'jxi tnejel, aju toc ti'jele tnam toc tbi Ttanmi David, aju muro xi'ynix tumlal telex k'ij teju chk'ajlaj Gihón tu'n tpon tuj tk'ab xak, tejxi tpon max ttzi pwert Tpwertil Cyiẍ tbi, ex cyaj ten ju tal witz Ofel tujxi muro, ex ma'xix oc twa'l muro tu'n. Ax icx e cub tk'o'n ke nejenel cye soldad cyuj cycyakil ke tnam toc muro cyi'j ate' tuj Judá. 15Ax icx e je'tz ti'n tuj tja Kman ke cydios txkantl nasyon, tuc'ixju tilbilal otok cub tbincha'n, ex cyuc'ix cycyakil ke altar otok che jaw tbincha'n te cyc'ulbil xjal twi witz, jatum tcubsa'n tja Dios ex tuj tnam Jerusalén, ex e je'x t-xo'n ti'jxi tnam. 16Te tibajxi xi tbincha'n aju altar te Kman ex e je'x tk'o'n ke chojbil te mojbabl tibil tibaj, ex ke chojbil te ak'bil chjonte, ex xi tma'n cye aj Judá tu'n cyc'ulun twitz Kman aju Cydios aj Israel. 17Masque icju, atzun cye xjal cucx xi cyk'o'n ke chojbil cywi' ke witz jatum in che c'uluntok nej cywitz ke tilbilal, pero akeju oyaj lu, te Kman xi cyk'o'n. 18Aju ch'intl tx'olbaben ti'j Manasés ex ti'j tna'j Dios ex cyi'j ke yol cyma ke t-sanjel Dios te, aju tzaj k'ma'n cye tu'n Dios aju Cydios aj Israel, atzun tz'iban tuj u'j jatum ta' tcyakil tx'olbaben cyi'j cyak'unben ke rey cye aj Israel. 19Aju tna'j Dios ex aju tzak'webl o tc'am, cyuc'ix cycyakil ke il o tbincha ex ju tten mya tz'aklxix, cyuc'ix ke lugar cywi' ke witz jatum e jaw tbincha'n ke ja te cyc'ulbil xjal mya nimal Dios ke, ex jatum e cub tk'o'n ke tilbilal xu'j dios Asera ex ke mastl tilbilal tej na'nxtok tcub tmansin tib twitz Dios, atzun tz'iban tcyakil jlu tuj u'j ti'j tx'olbaben cyaj cytz'iban ke t-sanjel Dios. 20Tejtzun tcyim Manasés, cu'x maku'n tuj tx'otx' twitz tja. Te tibajxi aju o cawin te t-xel, atzun Amón aju tcy'ajal. 21Toctok Amón twi' 22 abk'i tej ttzyet tcawin ex o cawin cab abk'i tuj Jerusalén. 22Ke tbinchben mya ba'n e e'la tuj twitz Kman ic tza'nx ke tbinchben Manasés aju ktzan tman. Cub tk'o'n chojbil cywitz cycyakil ke tilbilal otok baj tbincha'n Manasés aju ktzan tman, ex o c'ulun cywitz. 23Atzun te minti' cub tmansin tib twitz Dios ic tza'n tbincha Manasés aju ktzan tman, nok o'cx oc ten binchal nimxix mya ba'n. 24O moje' cyyol ke xjal at cyoclen ttxlaj tu'n cybinchante mya ba'n ti'j ex cub cybyo'n ax tuj tja. 25Atzun cye tnam xjal e cub cybyo'n keju otok che cub byonte ktzan rey Amón, ex oc cyk'o'n Josías aju tcy'ajal tu'n tcawin te t-xel.

will be added

X\