2 CRÓNICAS 32

1Tbantlenxi tcyakilju ba'n lu tu'n Ezequías, pon Senaquerib aju rey cye aj Asiria k'ojlel cyi'j aj Judá, ex baj cytxolban cyib aj Asiria cyi'jele ke tnam toc muro cyi'j tu'ntzun tcub cyi'j cyu'n. 2Tej ttil Ezequías otok pon Senaquerib tu'n toc tzokpaj ti'j tnam Jerusalén, 3xi tkanin cye aj sanjelal ex cye nejenel cye soldad ka ba'n tuj cywitz tu'n tcub makset cyibaj ke twi a' ate' ti'jxi tnam, ex atzun cye ba'n e'la tuj cywitz. 4E chmettzun nimxix xjal ex cub cymaksi'n cyibaj cycyakil ke twi a', tuc'ix twi a' nne'x ttxlaj tnam, tu'ntzun mi'n tcnet a' tu'n rey cye aj Asiria oc tpon. 5O tcyuwsa tc'u'j Ezequías ex jaw tbincha'n muro toc ti'jele tnam, ax icx e jaw tbincha'n ke ja ma' cywa'l tibaj muro ex jaw tbincha'n juntl muro ti'jxi ju tnejel. Ax icx oc tk'o'n muro ti'j lugar Milo tuj tnam toc tbi Ttanmi David, ex e baj tbincha'n nimxix lans ex makbil in che ajben tuj k'oj. 6E oc tk'o'n ke nejenel cye soldad tu'n cycawin cyibaj xjal, e oc tchmo'n tuj chk'ajlaj tcub ttzi tpwertil tnam ex xi tcyuwsa'n cyc'u'j, xi tma'n cye cyja': 7Cyk'o'nc cyipune ex cyuwx cyc'u'je. Mi'n che xobe ex mi'n baj cyc'u'je twitz rey te Asiria ex mi cywitz cycyakil soldad nimxix cyajlal uc'in tu'n, porque aju ke at kuc'il mas nim tipumal twitzju cye at cyuc'il. 8Ate jlu k'ukl tc'u'j ti'j cyipun ke xinak, atzun ke, at Kman Dios kuc'il tu'n tonin ki'j oc toc k'oj ku'n, chi Ezequías. Tejtzun cybinte tnam xjal aju tyol rey Ezequías, o ke' cyc'u'j. 9Te tibajxi jlu, tej matok in k'ojin Senaquerib aju rey cye aj Asiria ti'j tnam Laquis, cyuc'ix cycyakil ke t-soldad, e je'x t-sama'n tuj Jerusalén junjun xjal at cyoclen ttxlaj, tu'n t-xi cyma'n te Ezequías aju rey cye aj Judá, ex cye cycyakil xjal najlke tuj Jerusalén aju tkanil lu: 10Atzun jlu in tma'n Senaquerib cyeye, aju rey te Asiria: ¿Al i'j nno'c ke' cyc'u'je tu'nju cucx in che cyaj tene tuj Jerusalén, ex txolin cyi'je cyu'n ke soldad? 11Ka in tma'n Ezequías cyeye cyja': Ate Kman Dios ccolol ki'j tu'n mi'n tcub ki'j tu'n rey te Asiria, ka chi, nok in che cub sbu'ne tu'n, ex tu'n jlu jacu che naje tu'n we'yaj ex tu'n txketle'n. 12¿Myapetzun o che baj tk'uchin Ezequías ke lugar te c'ulbil cywi' ke witz, cyuc'ix ke altar teju Dios lu, ex o tma cye aj Judá ex cye aj Jerusalén tu'n cyc'ulun twitz junx altar, ex o'cx tibaj tu'n tcub cypatun storac? 13¿Minti'petzun ba'n cyu'ne aju o nbinchaye ex o cybincha ktzan nxe'chele cyi'j cycyakil tnam cyuj txkantl nasyon? ¿Baka e clet ke nasyon lu cyu'n ke cydios tu'n mi'n tcub cyi'j wu'ne? 14Cyxol cycyakil cydios ke nasyon e cub cyxitun ktzan nxe'chele ¿atpe jun o clonte cye tnam tu'n mi'n tcub cyi'j wu'ne? ¿Tza'ntzun tten tu'n cyclet cyeye tu'n Cydiose tu'n mi'n tcub cyi'je wu'ne? 15Cyja'tzun mi'n cyak'e ambil tu'n cycub sbu'ne tu'n Ezequías ex mi'n cub ti'j cynable tu'n, ex mi'n txi cynimane, porque ka mi jun dios cye ke nasyon lu o xcye' tu'n cyclet ke xjal tu'n tuj nk'abe, ex tuj cyk'ab ktzan nxe'chele, pyortzunlo aju cyeye Cydios, mlay che clete tu'n tuj nk'abe, chi Senaquerib, che chi xjal. 16Ke xjal at cyoclen ttxlaj rey te Asiria xi cyma'n nimcutl yol mya ba'n ti'j Kman Dios ex ti'j Ezequías aju tmajen. 17Ax icx e cub ttz'iban Senaquerib ke u'j in yolin mya ba'n ti'j Kman aju Cydios aj Israel, in cyma'n cyja': Ic tza'n ke cydios txkantl nasyon minti' ma che xcye' tu'n cyclet ke xjal cyu'n tuj nk'abe, ax icxtzun aju Tdios Ezequías, mlay clet tu'n tuj nk'abe aju tnam jatum in cawin. 18Atzun cye xjal at cyoclen ttxlaj Senaquerib e yolin cyuwxix tuj yol Hebrey cye ke xjal ate'jx twi muro te Jerusalén, tu'ntzun cyjaw sec'paj xjal ex tu'n ttzaj cyxobil, tu'ntzun tcub ti'j tnam cyu'n. 19E yolin mya ba'n ti'j Cydios aj Jerusalén, ic tza'nx otok che yolin cyi'j cydios txkantl nasyon, akeju bincha'n in che cub cyu'n xjal. 20Atzunte rey Ezequías, tuc'ix Isaías aju t-sanjel Dios ex tcy'ajal Amoz, e oc ten na'l Dios, ex xi cykanin onbil te Dios aju at tuj cya'j. 21Tzajtzun t-sama'n Kman jun anjel tuj cycampament ke t-soldad rey Senaquerib ex e naj cycyakil tu'n, cyuc'ix ke capitán ex ke nejenel; atzunte rey aj meltz'aj tuj ttanmi otok tzaj tch'ixwi, ex tej tocx tuj tja tdios, axtzun cub byo'n tu'n spad cyu'nx ke tcy'ajal. 22Cyja'tzun tten clet Ezequías tu'n Dios, cyuc'ix ke xjal najlke tuj Jerusalén; minti' cub cyi'j tu'n Senaquerib aju rey te Asiria, ex minti' cub cyi'j cyu'n txkantl aj k'oj cyi'j, ex minti' e k'ojl txkantl nasyon cyi'j, akeju cyvesin cyib cyuc'il. 23Nimcu xjal xi cyi'n cyoyaj te Kman tuj Jerusalén ex xi cyi'n ke oyaj wi'yilxix te Ezequías aju rey cye aj Judá. Ex tbajlenxi jlu, oc k'o'n Ezequías te ma'xix toclen cyu'n cycyakil nasyon. 24Tuj tk'ijlalil lu tzaj jun tyabil Ezequías cyuwxix wen, oc ten na'l Dios ex tzaj tzak'we'n tu'n Dios tuc'il jun techal ma'xix t-xilen, 25pero ate Ezequías nok o'cx jaw tniman tib, minti' xi tk'o'n chjonte ti'j ju ba'n otok tc'am, ex tu'ntzun jlu tzaj tk'oj Kman ti'j, ax icx cyi'j aj Judá ex cyi'j aj Jerusalén. 26Masque jaw tniman tib Ezequías, pero te tibajxi cub tmansin tib, ax icx cybincha ke xjal najlke tuj Jerusalén, ex tu'ntzun jlu minti' tzaj tk'oj Kman cyi'j tej itz'xtok Ezequías. 27O ten nimxix tk'inumabl Ezequías ex nimxix nimbilte. O chmet nim sak pwak tuc'il, tuc'ix k'an pwak, cyuc'ix ke tal abj tbanilxix, tuc'ix perjum, cyuc'ix ke makbil in che ajben tuj k'oj ex tcyakil txcaj ti'xti wi'yilxix. 28Ax icx e jaw tbincha'n ke ja tu'n cyocx c'u't twitz awal cyuj, tuc'ix ta'l twitz uva ex chibj aseyt, ex e jaw tbincha'n ke ja tu'n cyajben cye cycyakil txcaj wacẍ ex ke cype'n ẍne'l. 29Ax icx e jaw tbincha'n ke tnam, ex o ten nimxix twacẍ ex nimxix t-ẍne'l, porque tzaj tk'o'n Dios nimxix tk'inumabl. 30Ex ax Ezequías o k'mante tu'n tcub makset tibaj twi a' Gihón, ex tk'o'n tbeyil tjak' tx'otx' tu'n tpon tuj tumlal telex k'ij tuj tnam toc tbi Ttanmi David. Cyja'tzun tcyakil aju tbincha Ezequías ba'n e'la. 31Tej ttzaj cysama'n ke xjal ma' cyoclen tuj Babilonia junjun sanjel visitaril Ezequías, ex kanilte ti'j ju binchben nim tipumal otok bant tuj tx'otx' jatum in cawin, cyaj k'o'n Ezequías tjunal tu'n Dios, tu'ntzun tic' twitz ti'j ex tu'n tel tnic' ti'j tcyakil aju at tuj tanmi. 32Aju ch'intl tx'olbaben ti'j Ezequías ex cyi'j ke tbinchben tz'aklxix, atzun tz'iban tuj u'j cub ttz'iban Isaías aju t-sanjel Dios ex tcy'ajal Amoz, ex tuj u'j jatum ta' tcyakil tx'olbaben cyi'j ke rey cye aj Judá ex aj Israel. 33Tej tcyim Ezequías ocx maku'n tuj jun pantyón tjax tibajxi cypantyón ke tiyjil David. Cycyakil aj Judá cyuc'ix ke xjal najlke tuj Jerusalén xi cyk'o'n nimbil te tej tcyim, ex aju o cawin te t-xel, atzun Manasés aju tcy'ajal.

will be added

X\