2 CRÓNICAS 30

1Xi t-sama'n Ezequías tkanil cyxol cycyakil aj Israel ex cyxol aj Judá, ax icx xi t-sama'n u'j cye aj Efraín ex cye aj Manasés tu'n cyul tuj tja Dios tuj Jerusalén, tu'n tcub ic'set Xjan K'ij te Kman aju Cydios aj Israel. 2Bant ti'j tu'n rey cyuc'il ke xjal at cyoclen ttxlaj ex cyuc'il cycyakil tnam xjal aj Jerusalén tu'n tcub cyic'sa'n Xjan K'ij tuj tcabin xjaw, 3tu'nju minti' otok cub ic'set tujxix tk'ijlalil banimaj ti'j, porque mya nimtok pal otok baj cyxjansan cyib, ax icx ke tnam xjal na'nxtok toc cychmon cyib tuj Jerusalén. 4Tza'nx te rey, ax icx cycyakil tnam xjal, ba'n e'la tuj cywitz aju ximbetz lu. 5Bant ti'j cyu'n tu'n t-xi' jun txocbil cyi'j cycyakil aj Israel, tzajx ke' tuj tnam Beerseba ex pon baj max tuj tnam Dan, tu'n cyul tuj Jerusalén ic'salte Xjan K'ij te Kman aju Cydios aj Israel, porque otok tz'el nim tyemp minti' in che ul baj cycyakil xjal tu'n tcub cyic'sa'n ic tza'n tz'ibamaj tuj ley. 6Cyja'tzun e je'x ke sanjel cyxol cycyakil aj Israel ex aj Judá, k'i'n ke u'j cyu'n, akeju otok cub ttz'iban rey cyuc'ix ke xjal ma' cyoclen ate' ttxlaj, tu'n t-xi cyma'n aju otok tzaj tma'n rey cyja': Akeye aj Israel, cyajtz meltz'aje tuc'il Kman aju Tdios Abraham, Tdios Isaac ex Tdios Israel, ex atzun te c'ajetz meltz'aj cyuc'ile, akeye ma che cyaj clet tuj cyk'ab cyrey aj Asiria. 7Mi'n che oque ic tza'n ktzan cyxe'chele ex ic tza'n ke cyermaniye, el cypa'n cyib ti'j Kman aju Cydios ktzan cyxe'chel, ex tu'ntzun jlu ate Dios xi k'onte cye tu'n cynaj, ic tza'n ma cyile. 8Mi'n cycyuwsaye cyanmiye ic tza'n cybincha ktzan cyxe'chele, cyk'o'ncx cyibe tjak' tcawbil Kman ex cytzaje tuj tja, aju o baj t-xjansa'n te jumajx. Che ajbene te Kman aju Cydiose, ex atzun te cxel tcolin tu'n tk'ojin cyi'je. 9Ka ma che ajtz meltz'aje tuc'il Kman, ke aj k'oj cyi'je ctzajel k'ak'an cyc'u'j cyi'j ke cyermaniye ex cyi'j ke cycy'ajale, akeju presin cyu'n ja'lo, ex che tzajel cytzokpi'n tu'n cyul juntl maj tuj tx'otx' lu, porque ate Kman aju Cydiose ba'n tz'e'y tc'u'j ex ba'n k'ak'an tc'u'j ex mlay che el ic'une tu'n ka ma che ajtz meltz'aje tuc'il, chi rey tuj u'j. 10Atzun cye aj sanjelal baj cybetin tuj tcyakil cytx'otx' aj Efraín ex aj Manasés, e je'x tuj teyle junjun tnam tejxi cypon tuj cytx'otx' aj Zabulón. Atzun cye xjal nok e jaw tze'n ex e xmayin cyi'j. 11Pero at junjun xinak cyxol aj Aser, aj Manasés ex aj Zabulón cub cymansin cyib twitz Dios ex e ul tuj Jerusalén. 12Ax icx o yolin Dios tuj cyanmi aj Judá tu'n tmoje' cyyol tu'n tjapun cyu'n aju yol otok tzaj tma'n rey ex ke xjal ma' cyoclen ate' ttxlaj, ic tza'nx otok tzaj tma'n Kman. 13Cyja'tzun nimxix xjal oc cychmon cyib tuj Jerusalén tuj tcabin xjaw, tu'n tcub ic'set nink'ij cyi'j ke pan minti' t-samel cyuj tu'n tjaw mal cyc'u'j. 14Eltzun cyi'n cycyakil ke altar ex ke lugar jatum in cub patit storac tuj Jerusalén ex xi cyxo'n tuj tk'ab xak Cedrón. 15Tuj tcyajlajin tajlal tcabin xjaw cub cybyo'n aju tal tman ẍne'l in xi k'ot tuj Xjan K'ij. Atzun ke pal ex ke aj Leví tzaj cych'ixwi, baj cyxjansan cyib ex xi cyi'n ke alumaj tuj tja Kman tu'n t-xi k'ot aju oyaj patun in cub. 16Tzyet juntl maj cyak'nan ic tza'nx nac'umaj ti'j tuj tley Moisés aju tmajen Dios. Ake pal in che cub chitunte chic' aju in xi k'o'n cye cyu'n aj Leví. 17Ex tu'nju at nimcu xjal na'nxtok tbaj cyxjansan cyib, cyja'tzun xi k'o'n tuj cycwent ke aj Leví tu'n tcub cybyo'n ke alumaj in che'x k'ot tuj Xjan K'ij, aju otok tzul cyi'n ke xjal na'nxtok tbaj cyxjansan cyib, tu'ntzun cyxjanset ke alumaj. 18Nimxix xjal cyxol aj Efraín, aj Manasés, aj Isacar ex aj Zabulón e wa'n ti'j wabj te Xjan K'ij, pero minti' japun cyu'n ic tza'nx tz'iban tuj ley, tu'nju minti' otok baj cyxjansan cyib. Atzunte Ezequías oc ten na'l Dios cyi'j cyja': Aya Nman aju Cydios ktzan kxe'chele nimxix t-xtalbila, 19najsancuya cyil cycyakil keju in che jyon ti'ja tu'n tcyakil cyanmi, masque na'nx tbaj cyxjansan cyib ic tza'n in tma'n ley ti'j tjaya, chi Ezequías. 20Atzunte Kman tzaj tbi'n aju tkanbetz Ezequías ex cub tnajsa'n cyil tnam xjal. 21Cyja'tzun ke aj Israel, akeju ate'tok tuj Jerusalén, cub cyic'sa'n tuc'il nim tzalajbil wuk k'ij nink'ij ti'j pan minti' t-samel tuj tu'n tjaw mal tc'u'j, ex atzun ke pal ex ke aj Leví jaw cynimsa'n tbi Kman, in che bitzan tcyakil k'ij tuc'il tk'ajk'ajel cywi chnab cyuwxix wen. 22Atzunte Ezequías xi tk'o'n chjonte cye cycyakil aj Leví, tu'nju at-xix cynabl tu'n cyajben te Kman. Ex tuj wuk k'ij e wa'n ti'j wabj bant tuj nink'ij, ex xi cyk'o'n ke chojbil te mojbabl tibil, ex jaw cynimsa'n tbi Kman aju Cydios ktzan cyxe'chel. 23Cycyakil tnam xjal bant ti'j cyu'n tu'n toc juntl wuk k'ij nink'ij, ex cub cyic'sa'n tuc'il nim tzalajbil; 24xi tk'o'n Ezequías aju rey cye aj Judá mil tor cye tnam xjal tuc'ix wuk mil ẍne'l; ax icx ke nejenel cye xjal xi cyk'o'n mil tor cye tnam xjal tuc'ix laj mil ẍne'l. Ex nimcu pal baj cyxjansan cyib. 25Cycyakil xjal aj Judá o che tzalaj, ax icx ke pal ex ke aj Leví, cyuc'ix cycyakil xjal otok che tzaj tuj Israel, cyuc'ix ke stranjer xjal otok che tzaj tuj Israel ex keju ax najlke tuj Judá. 26Nimxix e tzalaj ke xjal tuj Jerusalén, porque atxix tuj tk'ijlalil Salomón aju tcy'ajal David ex rey cye aj Israel, na'nxtok tbant juntl maj icju tuj Jerusalén. 27Te tibajxi e jaw we' ke pal ex ke aj Leví, e oc ten cy'iwlalte cye tnam xjal, e tzaj bi'n tu'n Kman, ex aju cyna'j Dios japun max tuj cya'j tuc'il Dios tuj tnajbil xjan.

will be added

X\