2 CRÓNICAS 28

1Otok japun Acaz twi' winkin abk'i tej ttzyet tcawin ex o cawin kaklaj abk'i tuj Jerusalén, pero mya ba'n e ela ke tbinchben tuj twitz Kman, ex minti' o tbincha ic tza'n te David aju ktzan t-xe'chel, 2nok o'cx oc lpe' cyi'j cybinchben ke rey cye aj Israel; ax icx e cub tbincha'n ke tilbilal Baal ti'j c'uxbil in cub ulj tu'n k'ak', 3ex cub tpatun storac tuj tal chk'ajlaj Ben-hinom ex e cub tpatun ke tcy'ajal te chojbil, ic tza'n ju ic'bilxix in cybincha'n ke xjal cyuj mastl nasyon, akeju otok che ex tlajo'n Kman cywitz aj Israel. 4Ax icx xi tk'o'n chojbil ex cub tpatun storac cyuj ke ja te cyc'ulbil xjal cywi' ke witz, ex cywi' ke tal witz, ex cyjak' cycyakil tze' nim cyxak. 5Tu'ntzun jlu xi k'o'n tuj tk'ab rey cye aj Siria tu'n Kman aju Tdios, o cub ti'j cyu'n aj Siria, nimcu xjal e je'x k'i'n pres ex e pon k'i'n tuj tnam Damasco. Ax icx xi k'o'n tu'n Kman tuj tk'ab rey cye aj Israel ex nimxix xjal o naj tu'n. 6Porque ate Peka aju tcy'ajal Remalías tuj junx k'ij e cub tbyo'n jun syent tuc' winkin mil xinak tuj Judá, akeju cyuwxix cyc'u'j tuj k'oj. O bant jlu tu'nju cyaj cycolin Kman aju Cydios ktzan cyxe'chel. 7Ax icx te Zicri aju aj Efraín ex cyuw tc'u'j tuj k'oj, cub byo'n Maasías tu'n, aju tcy'ajal rey, tuc'ix Azricam aju nejenel tuj tja rey, tuc'ix Elcana aju nejenel cye keju at cyoclen ttxlaj rey. 8Ax icx ke soldad aj Israel xi cypresin cab syent mil xjal aj Judá; at xu'j, at tal k'a ex at tal txin. Ax icx xi cyi'n nimcu ti'xti ex pon cyi'n tuj Samaria. 9Attok jun t-sanjel Dios ma chixin, Oded tbi, etz canul cyi'j ke soldad tej cyja'tok cyocx tuj Samaria ex xi tma'n cye: —Ma tzaj tk'oj Kman aju Cydios ktzan kxe'chel cyi'j aj Judá ex cyja'tzun ma cub cyi'j cyu'ne. Atzun cyeye ma che cub cybyo'ne tuc'il nimxix cytx'u'jile, ex aju cybinchbene mya ba'n lu ma japun tuc'il Dios tuj cya'j. 10Ax icx ma cub cyximane tu'n toc cyk'o'ne te cymajene ke xinak ex ke xu'j aj Judá ex aj Jerusalén. Pero ¿myapetzun icx cyeye in che binchane il twitz Kman aju Cydiose? 11Cyja'tzun chin cybintze ex cyk'o'n aje ke xjal ma che tzaj cypresine, akeju ax cyermaniye, porque nimxix tk'oj Kman ma tzaj cyi'je. 12Atzunte Azarías aju tcy'ajal Johanán, tuc'ix Berequías aju tcy'ajal Mesilemot, tuc'ix Ezequías aju tcy'ajal Salum, ex tuc'ix Amasa aju tcy'ajal Hadlai, akeju nejenel cye aj Efraín, e oc cymayo'n keju otok che'x aj tuj k'oj, 13ex xi cyma'n cye: —Mi'n che tzaj cyi'ne tzalu ke xjal ma che tzaj cypresine, porque tu'n jlu jacu tzaj kil ti'j tu'n Kman. Ya ma chmet kil, ex atzun cyeye cyajbile tu'n tchmet mastl, ex tu'n jlu ctzajel nimxix tk'oj Kman ki'j. 14Atzun cye soldad xi cyk'o'n ke pres tuj cycwent nejenel ex tnam xjal, tuc'ix tcyakil ti'xti otok tz'el cyi'n cye tuj k'oj, 15atzun cye nejenel jaw cysc'o'n junjun xinak tu'n cycyaj ten ke pres tuj cycwent, cyuc'ix ke ti'xti otok tz'el k'i'n cye. Cyxol ke ti'xti lu tzaj cyi'n ke xbalun tu'n toc cyk'o'n cyi'j ke xjal ski't cyi'j, oc cyk'o'n cyxajab, xi cyk'o'n cywa ex cyc'a, oc cyk'anan ke ẍil cyi'j, cycyakil keju minti' cyipun tu'n cybet e jax cyk'o'n cyibaj ke bur, xi cyi'n tu'n cypon tuj Jericó aju tnam at nim tkan xa'j tuj, ex e cyaj cyk'o'n cyuc'il ke cyxjalil. Te tibajxi jlu e ajtz meltz'aj tu'n cyul tuj Samaria. 16Tuj tk'ijlalil lu xi t-sama'n rey Acaz junjun xjal kanil onbil tuc'il rey cye aj Asiria, 17porque otok che oc tzokpaj juntl maj aj Edom cyi'j aj Judá, otok cub cyi'j cyu'n, ex otok che'x cyi'n junjun aj Judá pres. 18Ax icx ke aj Filistey otok cub cyi'j ke tnam cyu'n, akeju ate' tuj chk'ajlaj t-xe witz ex tuj tx'otx' Néguev, aju cyetok aj Judá, ex otok tz'el cyetzan ke tnam lu: Bet-semes, Ajalón, Gederot, Soco, Timna ex Gimzo, cyuc'ix ke aldey ate' cyi'jele, ex otok che cub ten najal cyuj. 19Porque tu'n Kman cub cycastiw aj Judá, nok tu'n tlaj Acaz aju cyrey, porque xi tk'o'n Acaz ambil cye aj Judá tu'n cybinchante nimcu mya ba'n, ex jumajx otok tz'el tpa'n tib Acaz ti'j Kman. 20Pero minti' o onin Tiglat-pileser aju rey cye aj Asiria ti'j rey Acaz, nokpe o tzaj tu'n toc tzokpaj k'ojlel ti'j ex oc ten yajlal te. 21Masque etz ti'n rey Acaz ke ti'xti wi'yilxix ate' tuj tja Kman, cyuc'ix keju ate' tuj tja rey ex keju ate' tuj cyja ke nejenel, tu'n t-xi tk'o'n te chojenj te rey te Asiria, pero mi tu'n jlu minti' o cnet onbil tu'n. 22Ex masque o tzaj nim mya ba'n tibaj rey Acaz, pero cucx o binchan il twitz Kman. 23Xi tk'o'n chojbil cye ke cydios aj Damasco, como cyu'ntzun ke jlu otok cub ti'j. Cub t-ximan cyja': Ka o che onin ke cydios aj Siria cyi'j ke cyrey, ax icxtzun weye, jaculo che onin wi'je ka ma txi nk'o'ne chojbil cye, chi Acaz. Tu'ntzun jlu o tzaj nimcu mya ba'n tibaj ex cyibaj cycyakil aj Israel. 24E oc tchmo'n Acaz ke macbil ate' tuj tja Dios ex bi'x e baj tbuchin, cyaj tlamo'n ke tpwertil tja Dios ex xi tma'n tu'n cyjaw binchet altar cyuj cycyakil t-scyin cay te tnam Jerusalén, tu'n cyajben cye cydios xjal mya nimal Dios ke. 25E jaw tbincha'n ke altar cyuj cycyakil tnam ate' tuj Judá, tu'ntzun tcub patit storac cywitz junxitl dios, ex tu'n jlu tzaj tk'oj Kman ti'j, aju Cydios ktzan t-xe'chel. 26Aju ch'intl tx'olbaben ti'j ex ti'j tcyakilju o bant tu'n, atxix tej ttzaj ke' ex tejxi tpon baj, atzun tz'iban tuj ju u'j jatum ta' tcyakil tx'olbaben cyi'j ke rey cye aj Judá ex cye aj Israel. 27Tejtzun tcyim, cu'x maku'n cyuc'il ktzan t-xe'chel tuj tnam Jerusalén, pero minti' ocx maku'n tuj cypantyón ke rey. Te tibajxi, aju o cawin te t-xel, atzun Ezequías aju tcy'ajalx.

will be added

X\