2 CRÓNICAS 25

1Toctok Amasías twi' 25 abk'i tej ttzyet tcawin ex o cawin 29 abk'i tuj Jerusalén. Aju ttxu', Joadán tbi ex ax aj Jerusalén. 2Ba'n e ela ke tbinchben Amasías tuj twitz Kman, pero minti' o tbincha tu'n tcyakil tanmi. 3Tejtzun tocxix tipun Amasías tuj tcawbil e cub tbyo'n ke xjal ma' cyoclen, akeju e cub byonte ktzan tman. 4Pero minti' e cub tbyo'n ke cyc'wa'l, ic tza'nx tz'ibamaj tuj tley Moisés tej ttzaj tma'n Kman cyja': Ke mambaj mlay cub cysentens tu'n cycyim tu'n tlaj cybinchben ke cyc'wa'l, ex mi ke c'wa'lbaj tu'n tlaj cybinchben cyman, nok o'cx teylex te junjun cymel tu'n tlaj tex til. 5E oc tchmo'n Amasías cycyakil xinak aj Judá ex aj Benjamín ex e baj tpa'n ic tza'nx junjun c'loj cyiyjil, ex e oc tk'o'n ke nejenel te jun milchak soldad ex te jun syentchak soldad. Jawtzun ti'n jun tajlal, tzaj ke' cyi'j cycyakil keju otok che japun twi' winkin abk'i. Tu'n tcyakil japun ox syent mil soldad sc'o'maj ke, banin cyten tu'n cyxi' tuj k'oj ex at cynabl tu'n cyajben ke lans ex ke makbil cyu'n. 6Ax icx e tzaj ti'n jun syent mil soldad aj Israel tu'n 75 quintal sak pwak. 7Pero ul jun t-sanjel Dios tuc'il Amasías ex xi tma'n te cyja': —Tat rey, mi'n che'x ti'na ke soldad aj Israel tuc'ila, porque mi a'l Kman at cyuc'il aj Israel ex mi cyuc'il aj Efraín. 8Ex ka ma txi'ya ic tza'n jlu cyuc'ix ke soldad aj Israel tuc'ila, masque ma tz'oc tlajwersin tiba tu'n tk'ojina, pero tu'n Dios cbel ti'ja cyu'n aj k'oj, porque ate Dios at tipumal tu'n tcamban jun xjal ex ka tu'n tcub ti'j, chi t-sanjel Dios. 9Xitzun tkanin Amasías te t-sanjel Dios: —¿Titzun cbantel ti'j 75 quintal sak pwak ma txi nk'o'ne cye soldad aj Israel? Xi ttzak'we'n t-sanjel Dios: —Jacu tzaj tk'o'n Kman mas nim teya twitz jlu. 10E eltzun tpa'n Amasías ke soldad, akeju otok che tzaj cyxol aj Efraín ex otok che ul tuc'il, ex xi tma'n cye tu'n cyaj cyja. Atzun cye soldad lu tzaj cyk'oj cyi'j aj Judá, e ajtzun cyja in che k'ojl wen. 11Octzun tipuman tib Amasías ex e je'x ti'n ke t-soldad max tuj chk'ajlaj Atz'an tbi, ex cub tbyo'n laj mil xinak aj Seir. 12Ax icx tzaj cytzyu'n aj Judá juntl laj mil xinak itz'xke, ex xi cyi'n twi' jun pic, atzun e ex cyxo'n ttxa'n xak ex cycyakil ke jlu bachu'n e oca. 13Atzun ke soldad aj Israel, akeju otok che el tpa'n Amasías tu'n mi'n cyxi' tuc'il tuj k'oj ex otok txi tma'n cye tu'n cyaj cyja, e oc tzokpaj cyi'j ke tnam ate' tuj Judá, tzajx ke' cyu'n tuj tnam Samaria ex e pon max tuj tnam Bet-horón, cub cybyo'n ox mil xjal ex xi cyi'n nimcu ti'xti at cye xjal. 14Tejtzun tajtz meltz'aj Amasías, otokxi txi aj byolte cye aj Edom, e tzaj ti'n ke tilbilal cydios aj Seir, oc tk'o'n te tdios, oc ten c'ulul cye ex cub tpatun storac cywitz. 15Tzajtzun tk'oj Kman ti'j Amasías ex tzaj t-sama'n jun t-sanjel tuc'il k'malte te cyja': —¿Tiku'n ma tz'oc tena kanil onbil cye ke dios te juntl nasyon, akeju minti' ma che clet xjal cyu'n tuj tk'aba? 16Pero tej t-xi tma'n t-sanjel Dios icju, tzaj ttzak'we'n rey: —¿Mapetzun tz'oc kk'o'ne toclena te k'olte consej weye? Mi'n k'ajta, ¿ex katzun taja tu'n tcub byo'na? Atzunte t-sanjel Dios minti' xi tma'n mastl yol, nok o'cx tma cyja': —Ba'n wu'ne ma cub t-ximan Dios tu'n tnaja tu'n, tu'n tlaj ma tbinchaya jlu ex tu'nju minti' ma txi tnimana nyole. 17Te tibajxi oc ten Amasías aju rey cye aj Judá kanil tconsej cye keju k'ol consej ate' ttxlaj, ex bant ti'j cyu'n tu'n t-xi cysama'n ke xjal tuc'il Joás aju tcy'ajal Joacaz ex tal tchman Jehú, aju rey cye aj Israel, tu'n t-xi cyma'n te cyja': Tzaja, chitzun rey Amasías, ex e toc k'oj ku'n. 18Atzunte Joás tzaj ttzak'we'n cyja': Aju tal ch'i'x c'ul at twi witz Líbano xi tma'n teju tze' wi'ten aju at twi witz Líbano: K'ontza tme'jela tu'n toc te t-xu'jil ncy'ajale, chi ch'i'x c'ul. Pero ic' bet jun txcup te tjak' c'ul tibaj tal ch'i'x c'ul ex bi'x baj naj tjak' tkan. 19In tma'na ka o cub cyi'j aj Edom tu'na ex tu'ntzun jlu in jaw tniman tiba. Mas ba'n ax tencja tjaya. ¿Tiku'n taja tu'n ttzaj ti'na mya ba'n tibaja ex cyibaj aj Judá? Chi Joás. 20Atzunte Amasías minti' xi tbi'n porque tu'n Dios bant icju, tu'ntzun tcub cyi'j tu'n Joás, tu'nju otok che oc ten kanil onbil cye ke cydios aj Edom. 21Tzajtzun Joás tu'n toc tzokpaj k'ojlel ti'j Amasías, ex tzyet k'oj cyu'n tuj tnam Bet-semes aju tcubsa'n tuj cytx'otx' aj Judá. 22Ex ake aj Judá cub cyi'j cyu'n aj Israel ex teyle junjun xi ok tja. 23Ate Amasías aju rey cye aj Judá ocx presin tuj Bet-semes tu'n Joás aju rey cye aj Israel, ex te tibajxi xi ti'n tuj Jerusalén ex baj t-xitun Joás jun piẍ muro toc ti'jele tnam Jerusalén te cab syent var tkan, tzajx ke' jatum ta' Pwert Efraín tbi ex pon baj max jatum ta' Pwert Escyin tbi. 24Ax icx xi ti'n tcyakil k'an pwak tuc'ix sak pwak, cyuc'ix cycyakil ke macbil ate' tuj tja Dios, akeju ate'tok tuj tcwent Obed-edom, cyuc'ix ke k'inumabl ate' tuj tja rey. Ax icx e tzyet junjun xjal ma' cyoclen tu'n, tu'n cyxi ti'n tuc'il, ex ajtzun meltz'aj tuj tnam Samaria. 25O ank'intl Amasías aju tcy'ajal Joás, aju rey cye aj Judá, olaj abk'itl tcyimlenxi Joás aju tcy'ajal Joacaz aju rey cye aj Israel. 26Aju ch'intl tx'olbaben ti'j Amasías, tej ttzaj tke' tcawin ex tejxi tpon baj, atzun tz'iban tuj u'j jatum tz'iban tcyakil tx'olbaben cyi'j ke rey cye aj Judá ex cye aj Israel. 27Atxix tej tel tpa'n tib Amasías ti'j Kman, jaw cyi'n cyib xjal ti'j tuj Jerusalén, ex atzunte xi ok tuj tnam Laquis, pero e je'x lpe' xjal ti'j max tuj tnam lu, ex matzun cub cybyo'n. 28Tzajtzun cyi'n t-ximlal tibaj jun chej cabay ex cu'x cymaku'n cyxol ktzan t-xe'chel tuj tnam toc tbi Ttanmi David.

will be added

X\