2 CRÓNICAS 24

1Toctok Joás twi' wuk abk'i tej ttzyet tcawin ex o cawin 40 abk'i tuj Jerusalén. Aju ttxu', Sibia tbi ex aj Beerseba. 2Ba'n e ela ke tbinchben Joás tuj twitz Kman, acux itz'xtok pal Joiada. 3Tzaj tjyo'n Joiada cabe t-xu'jil Joás, ex cyi'jtzun ke xu'j lu e tzaj ke tcy'ajal ex ke tme'jel. 4Te tibajxi cub t-ximan Joás tu'n t-xi tbincha'n tja Kman. 5E oc tchmo'n ke pal ex ke aj Leví ex xi tma'n cye cyja': Cyxi'ye cyuj ke tnam ate' tuj Judá, ex cychmon jawe pwak cyxol cycyakil aj Israel, aju at tu'n tchjet cyu'n tcyakil abk'i, tu'ntzun t-xi binchet tja Dios. Cyk'o'nque tilil ti'j jlu, chi Joás; atzun cye aj Leví minti' oc cyk'o'n tilil. 6Tzajtzun txco'n Joiada aju tnejel pal tu'n rey, ex xi tma'n te cyja': —¿Tiku'n minti' nno'c il ti'j tu'na tu'n ttzaj cyi'n ke aj Leví cyoyaj xjal ate' tuj Judá ex tuj Jerusalén, aju cyaj bant ti'j tu'n Moisés aju tmajen Dios, cyuc'il aj Israel, tu'n tajben ti'j ja jatum c'u'n ju yol cyaj bant ti'j tu'n Dios cyuc'il? Chi rey. 7Porque ate Atalía, aju jumajx mya ba'n tmod, cyuc'ix ke tal, otok che ocx tuj tja Dios ex otok tz'etz cyelk'a'n tcyakil ti'xti in che ajben tuj c'ulbil, akeju ate'cx tuj tja Dios, ex atzun ajben cyu'n cye ke tilbilal Baal, aju nno'c cydiosin. 8Xitzun tma'n rey tu'n tbant jun cax, ex cub cyk'o'n tetz ti'jtzi tpwertil tja Kman. 9Extzun tkanil cyu'n tuj tcyakil tx'otx' Judá ex tuj tnam Jerusalén, tu'n ttzaj cyi'n xjal chojenj te Kman, aju otok txi tma'n Moisés aju tmajen Dios cye aj Israel tuj lugar tzkij tx'otx'. 10Cycyakiltzun ke nejenel ex cycyakil tnam xjal e pon k'olte cyoyaj tuc'il tzalajbil tuj cax, tejxi tnoj cyu'n. 11Tcyakil maj oc t-xi cyi'n aj Leví aju cax cyuc'il ke xjal at cyoclen ttxlaj rey tu'n tic' cywitz ti'j, ex octzun cyque'yinte ka ya attok nim pwak tuj, in pontzun aju aj tz'ibal te rey tuc'ix ju xjal at toclen tu'n tnejel pal, c'molte pwak, in jatz cyi'n ex in xi cyi'n aju cax tu'n tcub cyk'o'n juntl maj jatum tcub. Cyja'tzun in bant cyu'n tcyakil maj ex nimxix pwak chmet cyu'n. 12Atzunte rey tuc'ix pal Joiada xi cyk'o'n pwak lu cye keju cycyajsa'n te nejenel ti'j ak'untl ti'j tja Kman, tu'n t-xi cychjo'n twi cyc'u'j ke albañil ex ke calpinter, tu'n t-xi cybincha'n tja Kman, ex tu'n cychjet ke majen ba'n che ak'nan ti'j c'uxbil ex ti'j k'an c'uxbil, tu'ntzun t-xi cybincha'n tja Kman. 13Ke nejenel ti'j ak'untl e oc ten ak'nal cyuwxix ex baj cybincha'n tja Kman ic tza'nx tten tnejel, ex aju tja Kman cyaj ten tuj segurxix. 14Tejtzun tbaj bant ak'untl cyu'n, xi cyi'n aju pwak cyaj sobryin tuc'il rey ex tuc'il Joiada, ex atzun cye xi cyma'n tu'n cybaj binchet ke macbil tu'n cyajben tuj tja Kman, tza'nx ke macbil in che ajben oc cyoc ke c'ulbil, ax icx keju in che ajben tu'n cyxi k'ot ke chojbil patun in che cub, ex ke pac' ex ke mastl macbil puro k'an pwak ex sak pwak cytx'otx'il. Acux itz'xtok pal Joiada, cucx xi cyk'o'n ju chojbil patun in cub twitz tja Kman. 15Otok tijin Joiada wen ex otok tz'el nim abk'i tu'n. Otok japun jun syent tuc'il 30 abk'i tu'n tej tcyim. 16Cu'xtzun cymaku'n tuj tnam toc tbi Ttanmi David, junx cyxol ke rey otok che cyim, porque ba'n otok tbincha cyuc'il aj Israel ex otok tz'ajben tuj tak'un Dios ax icx ti'j tja Dios. 17Tcyimlenxitzun Joiada e pon ke nejenel cye aj Judá tuc'il rey ex xi cyma'n tu'n cyniman te, atzunte rey xi tbi'n aju o cyma, 18cyajtzun cycolin aju tja Kman aju Cydios ktzan cyxe'chel, ex e oc ten c'ulul cywitz ke tilbilal xu'j dios Asera ex cywitz txkantl tilbilal. Tu'ntzun jlu tzaj tk'oj Kman cyi'j aj Judá ex cyi'j aj Jerusalén. 19Cyja'tzun tzaj t-sama'n Kman ke t-sanjel cyuc'il, tu'n cyaj meltz'aj juntl maj tuc'il, pero ke xjal minti' xi cybi'n aju yol xi k'ma'n cye cyu'n t-sanjel Dios. 20Ultzun T-xew Dios tuc'il Zacarías aju tcy'ajal ktzan pal Joiada, cub we' cywitz tnam xjal ex tma cyja': Chitzun Dios ma tma: ¿Tiku'n minti' in xi cynimane ke nmandamyente? ¿Tiku'n cyu'nxe in tzaj cyi'ne mya ba'n cyibaje? Tu'nju ma chin cyaj cycoline, ax icx weye che cyjel ncoline chi Dios, chi Zacarías. 21Atzun cye xjal moje' cyyol tu'n cyoc tzokpaj ti'j Zacarías, ex xi tma'n rey tu'n toc cyxo'n tu'n abj ttxa'n tpe'n tja Kman. 22Ic' tna'l tu'n rey Joás aju xtalbil binchanjtz te tu'n Joiada aju ktzan tman Zacarías, ex cub byo'n Zacarías aju tcy'ajal Joiada tu'n Joás. Tej ch'ixtok tcyim jaw tk'ajk'ajel twi' ex tma cyja': Awt Kman tzaj que'yinte jlu ex tu'n t-xelin cyi'je ic tza'nx ma cybinchaye. 23Tbajlenxi jun abk'i e oc tzokpaj ke soldad aj Siria ti'j Joás, e ocx tuj Judá ex tuj Jerusalén, cub cybyo'n cycyakil ke nejenel cye tnam xjal ex tcyakil ti'xti ex cyi'n, xi cysama'n tuc'il rey cye aj Damasco. 24Ke aj Siria nic'xi cybaj e pon, pero tu'n Kman cub cyi'j txkan soldad nimxix cybaj cyu'n, tu'nju otok tz'el cypa'n cyib aj Judá ti'j Kman aju Cydios ktzan cyxe'chel. Cyja'tzun tten cub tcastiw Joás. 25Tejtzun cyaj meltz'aj aj Siria, ate Joás nim te otok tza'w tuj k'oj, ex atzun ke xjal at cyoclen ttxlaj jaw cyi'n cyib ti'j, tu'n t-xelin cyu'n tu'nju tcublen tbyo'n tcy'ajal pal Joiada; cyja'tzun cub cybyo'n ax twi twatbil. Cu'xtzun maku'n Joás cyu'n tuj tnam toc tbi Ttanmi David, pero minti' ocx k'o'n tuj cypantyón ke rey. 26Akeju jaw cyi'n cyib ti'j Joás, atzun ke jlu: Zabad aju tal Simeat, aju aj Amón, ex Jozabad aju tal Simrit, aju aj Moab. 27Aju yol tz'iban cyi'j ke tcy'ajal Joás ex ti'j nimcu yol o cyma ke t-sanjel Dios ti'j, ex ti'j tjawlen tbincha'n tja Dios; tcyakil jlu atzun tz'iban cyuj ke u'j jatum ta' tcyakil tx'olbaben cyi'j cyak'unben ke rey. Te tibajxi, aju o cawin te t-xel, atzun Amasías aju tcy'ajal.

will be added

X\