2 CRÓNICAS 23

1Tujtzun twukin abk'i xi tma'n Joiada tu'n cyxi txocbaj ke capitán, akeju at jun syentchak soldad tuj cycwent ex atzun ke jlu: Azarías aju tcy'ajal Jeroham, Ismael aju tcy'ajal Johanán, Azarías aju tcy'ajal Obed, Maasías aju tcy'ajal Adaía ex Elisafat aju tcy'ajal Zicri. Octzun cychmon cyib ex bant ti'j jun cyyol tuc'il Joiada. 2Atzun ke jlu baj cybetin tuj tcyakil tx'otx' Judá ex e oc chmo'n ke aj Leví cyu'n; e tzaj cyuj cycyakil tnam ate' tuj Judá, cyuc'ix ke nejenel cye junjun c'loj cyiyjil aj Israel. Cycyakil ke jlu e tzaj tu'n cyul tuj Jerusalén. 3Cycyakiltzun tnam xjal otok tz'oc cychmon cyib twitz tja Dios, bant ti'j jun cyyol tuc'il rey. Ex tmatzun Joiada cye: Lu tcy'ajal rey at tzalu cyxole; atzunju ba'n tu'n toc te rey ic tza'n o tzaj ttziyan Kman cye tiyjil David. 4Atzun jlu cbantel cyu'ne akeye pal ex aj Leví, akeye in che ajbene tuj k'ij te ojlabl: Ox c'loj c'elel cybaje; jun c'loj cbel ten cwentil ttzi tja Dios, 5ex juntl c'loj che tel tuj tja rey, atzun juntl c'loj che bel ten ttzi pwert toc tbi Simyent. Ex cycyakiltzun tnam xjal che bel ten cyuj ke ttxa'n pe'n twitz tja Dios. 6Pero mi jun tu'n tocx tuj tja Dios, nok o'cx ke pal ex ke aj Leví, akeju ate' tuj cyturn, o'cx ake ba'n tu'n cyocx porque cyxjansan cyib, atzun mastl tnam xjal, ax tu'n cycyaj ten ttxa'n pe'n ic tza'n in tma'n tley Kman. 7Ex atzun ke aj Leví cbel cytxolban cyib ti'jele rey, ex teylex te junjun k'i'mlex tmacbil in ajben tuj k'oj, ex ka at jun xjal taj tz'ocx tuj tja Kman, cymel. Ex che xe'le tuc'il rey nok jatum oc t-xi', chi Joiada. 8Ke aj Leví ex ke xjal aj Judá o cybincha tcyakilju xi k'ma'n cye tu'n pal Joiada. Ex teylex te junjun nejenel e oc tchmo'n ke xinak ate' tuj tcwent, tza'nx keju in che ocx tuj cyturn tuj k'ij te ojlabl, ax icx keju in che etz, porque ate pal Joiada minti' xi tk'o'n ambil cye tu'n cyaj cyja. 9Xitzun tk'o'n pal Joiada ke lans ex ke makbil ma tij cyuc'ix ke tal ch'in cye ke capitán akeju at jun syentchak soldad tuj cycwent. Ake jlu tetok David tnejel ex atzun ate'tok tuj tja Dios. 10Ex e cub ttxolba'n cycyakil tnam xjal tuj tcyakil ttxa'n pe'n twitz tja Dios ti'jele altar, ex teylex te junjun k'i'mlex t-spad tu'n cycwentin ti'j rey. 11Atzunte Joiada cyuc'ix ke tcy'ajal etz cyi'n tcy'ajal rey, jax cyk'o'n jun coron tuj twi', xi cyk'o'n jun tu'jil tley Dios tuj tk'ab, jax cyko'n aseyt tuj twi' ex oc cyk'o'n toclen te rey. Cycyakiltzun e jaw sch'in in cyma'n: Ba'nwit tz'el tk'ija, aya Rey. 12Tejtzun tbinte Atalía tk'ajk'ajel cywi xjal in che t'icpaj tu'n tzalajbil ex in che sch'intok twitz rey, xi'tzun jatum ate'tok cycyakil xjal twitz tja Dios. 13O til, lu rey wa'l tcub t-xe tkan adorn ttxlaj ttzi tja Dios, ex lu ke nejenel ex ke k'ajtzal chnab ate' ttxlaj. Ke xjal in che tzalaj wen, in che k'ajtzantok chun, ex ke bitzal k'i'mlex chnab cyu'n in jaw nej cywi' cyi'j ke bitz te nimbil. Eltzun t-sbit'un Atalía t-xbalun ex jaw sch'in cyja': —Ma che oc meltz'aje wi'je, ma che oc meltz'aje wi'je. 14Pero xi tma'n pal Joiada cye ke capitán cye soldad: —Cyi'mexe cyxol xjal, ex ka at jun ma tz'oc ten colol ti'j, cybyoncuye tu'n spad, chi Joiada. Porque otok txi tma'n pal cye tu'n mi'n tcub cybyo'n ax tuj tja Dios. 15Tzajtzun cytzyu'n ex tejtzun cypon jatum nno'cx be ttzi cyja chej ttxlaj tja rey, axtzun cub cybyo'n. 16Te tibajxi jlu, bant ti'j jun tyol Joiada cyuc'il cycyakil tnam xjal, ax icx tuc'il rey, tu'n cyoc te jun tnam etzan tu'n Dios. 17E je'xtzun cycyakil tuj tja tilbilal cydios xjal Baal tbi ex bi'x cub cyxitun ja, ax icx baj cyk'uchin ke altar ex baj cypaẍu'n ke tilbilal, atzunte Matán aju pal te Baal, cub cybyo'n cywitz ke altar. 18Te tibajxi jlu e cub tk'o'n Joiada ke xk'ukil tuj tja Kman, cycyajsa'n ke tjak' cycawbil ke pal ex ke aj Leví, akeju otok che baj pa'n tuj cyturn tu'n David tu'n cyajben tuj tja Kman, tu'n t-xi cyk'o'n ke chojbil patun in che cub te Kman, ic tza'n tz'ibamaj tuj tley Moisés ex ic tza'n cyaj tma'n David, tu'n t-xi cyk'o'n tuc'il tzalajbil ex bitz. 19Ax icx e cub tk'o'n ke xjal xk'ukil ttzi tja Kman, tu'ntzun mi jun xjal tu'n tocx ka otok tzic' tibaj tley Moisés. 20Te tibajxitzun jlu e tzaj ttxco'n ke capitán, akeju at jun syentchak soldad tuj cycwent, ke xjal ma' cyoclen, ke gobernador te tnam ex cycyakil xjal, tu'n tex cyi'n rey tuj tja Kman, tu'ntzun tpon cyi'n tuj tja rey. Atzun e ocx tuj pwert tcub te jawni ex ocxtzun cyk'o'n tuj k'ukbil te cawbil. 21Ex cycyakil tnam xjal e jaw tzalaj, ex tu'nju otok cyim Atalía tu'n spad, cyja'tzun cycyakil tnam xjal e cyaj ten tuj txubtxaj.

will be added

X\