2 CRÓNICAS 21

1Cyimtzun Josafat ex cu'x maku'n tuj tnam toc tbi Ttanmi David aju ktzan t-xe'chel, ex aju cyaj ten te rey te t-xel, atzun Joram aju tcy'ajal. 2Ke terman Joram, akeju ax tcy'ajal Josafat ke, atzun ke jlu: Azarías, Jehiel, Zacarías, Azarías, Micael ex Sefatías. Cycyakil ke jlu tcy'ajal Josafat ke, aju rey cye aj Judá. 3Otok txi tk'o'n cyman nimcu oyaj cye; xi tk'o'n k'an pwak, sak pwak ex mastl ti'xti wi'yilxix, ax icx xi tk'o'n junjun tnam cye, akeju toc muro cyi'j ate' tuj Judá, pero aju cawbil xi tk'o'n te Joram porque atzun nej tcy'ajal. 4Tejtzun tcyuwset Joram tuj tcawbil e cub tbyo'n cycyakil ke terman tu'n spad, cyuc'ix junjun nejenel cye aj Israel. 5Toctok twi' 32 abk'i tej ttzyet tcawin ex o cawin wajxak abk'i tuj Jerusalén. 6Oc lpe' ti'j cybinchben ke rey cye aj Israel ex ti'j tbinchben rey Acab ex ke tiyjil, porque o moje' tuc'il jun tme'jel Acab, cyja'tzun mya ba'n e ela ke tbinchben Joram tuj twitz Kman. 7Pero minti' o tajbe Kman tu'n cynaj ke tiyjil David, tu'n tlaj ju yol otok tzaj ttziyan te David tu'n cucx tu'n cyjaw sc'et ke tiyjil tu'n cyoc te rey. 8Tuj tk'ijlalil tej tcawin Joram jaw cyi'n cyib aj Edom cyi'j aj Judá, el cypa'n cyib ex oc cyk'o'n jun cyex cyrey. 9Atzunte Joram xi' cyuc'il tcapitán ex cyuc'ix cycyakil ke tcarwaj in che ajben tuj k'oj, pero baj cytxolban cyib aj Edom cyi'jele ex tujxtzunju konic'an lu jaw we' Joram cyuc'ix ke capitán cye tcarwaj, e octzun tzokpaj cyi'j aj Edom ex cub cyi'j cyu'n. 10Masque icju, pero e etz aj Edom tjak' tcawbil Judá, ex cytenx ja'lo. Ex tujx tk'ijlalil lu etz tnam Libna tjak' tcawbil Judá, porque otok cyaj tcolin Joram Kman aju Cydios ktzan t-xe'chel. 11Ax icx e jaw tbincha'n Joram ke lugar cywi' ke witz tuj Judá jatum tu'n cyc'ulun ke xjal cywitz ke tilbilal, ex tu'ntzun jlu el cypa'n cyib aj Jerusalén ex aj Judá ti'j Kman. 12Tc'amtzun Joram jun u'j tu'n Elías aju t-sanjel Dios, ex chi u'j in tma'n: Ate Kman aju Tdios David aju ktzan t-xe'chela in tma'n teya cyja': Minti' ma tz'oc lpe'ya ti'j tbinchben Josafat aju ktzan tmana ex ti'j tbinchben rey Asa aju ktzan tchmana, 13nok o'cx ma tz'el tcano'na ti'j cybinchben ke rey cye aj Israel, ex tu'n tlaja ma tz'el cypa'n cyib ke xjal aj Judá ex aj Jerusalén ti'j Kman, ic tza'n o tbincha Acab ex ke tiyjil. Ax icx o che cub tbyo'na ke termaniya, akeju mas ba'n cymod twitza. 14Cyja'tzun cbel tk'o'n Kman jun nintz c'ixbisabl cyibaj ke t-xjalila, cyibaj ke tc'wa'la, cyibaj ke t-xu'jila ex tibaj tcyakilju at teya. 15Ex atzun teya ctzajel jun yabil ti'ja minti' k'anbil ti'j. C-yabtela tu'n tc'u'ja ex oc che bajel k'ay ke t-xk'iltxa'ya, chi Elías tuj tu'j. 16Tu'n Kman tzaj cyk'oj aj Filistey ex aj Arabia ti'j Joram, ake jlu cyvesin cyib cyuc'il aj Etiopía; 17cubtzun be cyu'n ex e oc tzokpaj cyi'j aj Judá, xi cyi'n tcyakil k'inumabl cnet cyu'n tuj tja rey, xi cyi'n ke tc'wa'l ex ke t-xu'jil. O'cxcu jun tc'wa'l cyaj clet, Ocozías tbi, aju ch'i'p. 18Te tibajxi tcyakil jlu cub tk'o'n Kman tcastiw Joram, o yabt tu'n tc'u'j, minti' k'anbil ti'j. 19Eltzun k'ij ex tej tbant cab abk'i ttzyetlen tu'n yabil, e baj k'ay ke t-xk'iltxa' tu'n yabil ex cyimtzun tuc'il nimxix ta'w. Ke t-xjalil minti' cub cyk'o'n jun nintz k'ak' te nimbilte ic tza'n otok cybincha cyi'j ktzan t-xe'chel. 20Toctok twi' 32 abk'i tej ttzyet tcawin ex o cawin wajxak abk'i tuj Jerusalén. Tej tcyim mi jun o bisun ti'j. Cu'xtzun maku'n tuj tnam toc tbi Ttanmi David, pero minti' ocx k'o'n tuj cypantyón ke rey.

will be added

X\